រាជធានីភ្នំពេញ ៖ បើសេចក្តីរាយការណ៍បឋមបានឱ្យដឹងថា ជនសង្ស័យ2នាក់ចាញ់ហ្គេមបាញ់ត្រីអស់លុយ ក៏បែកគំនិតថ្មីចេញដើរកាច់.កម៉ូតូប្រជាពលរដ្ឋបានសម្រេច ហើយបម្រុងជិះរត់គេច ស្រាប់តែត្រូវកម្លាំងល្បាតប៉ុស្តិ៍នគរបាលរដ្ឋបាលទន្លេបាសាក់ ល្បាតពួនស្ទាក់ក្នុងមូលដ្ឋាន ក៏ប្រទះឃើញជនសង្ស័យទាំង២នាក់ជាក់ស្តែង រួចធ្វើការប្រដេញតាមឃាត់ខ្លួនបានភ្លាមៗផងដែរ បង្កឱ្យមានការភ្ញាក់ផ្អើលកាលពីម៉ោង2 រំលងអធ្រាត្រឈានចូលថ្ងៃទី20 ខែមីនា ឆ្នាំ2020 នៅចំណុចផ្ទះលេខ18 ក្រុម12 ភូមិ3 ផ្លូវសុធារស សង្កាត់ទន្លេបាសាក់ ខណ្ឌចំការមន ។
សេចក្តីរាយការណ៍បន្តថា ជនសង្ស័យខាងលើឈ្មោះ ធឿន វុទ្ធី ភេទប្រុស អាយុ27ឆ្នាំ ស្នាក់នៅផ្ទះជួល ផ្លូវ163 សង្កាត់អូឡាំពិក ខណ្ឌបឹងកេងកង និងម្នាក់ទៀតមិនស្គាល់អត្តសញ្ញាណនោះទេ បានរត់គេចខ្លួនបាត់ស្រមោល ។ ហើយនៅចំពោះមុខសមត្ថកិច្ច ពួកគេបានសារភាពថា មូលហេតុដែលគេបែកគំនិតចេញលួចបែបនេះ ដោយសារតែពួកគេចាញ់ល្បែងហ្គេមបាញ់ត្រី និងគ្មានលុយសម្រាប់ទិញថ្នាំញៀនប្រើប្រាស់។
យោងតាមប្រភពពីសមត្ថកិច្ចបានប្រាប់ឱ្យដឹងថា មុនពេលកើតហេតុ ជនរងគ្រោះបានទុកម៉ូតូ ម៉ាក HONDA AIR BLADE ពណ៌ទឹកប្រាក់លាយខ្មៅ ស៊េរីឆ្នាំ2013 ពាក់ស្លាកលេខភ្នំពេញ1GQ-6496 នៅមុខផ្ទះកើតហេតុខាងលើ ដោយបានចាក់សោ.កទុកចោល ហើយក៏ដើរទៅជួបមិត្តភ័ក្ដិនៅណាហ្គាវើល2 បាត់ទៅ។ លុះដល់ម៉ោងកើតហេតុ ក៏លេចមុខជនសង្ស័យចំនួន2នាក់ ជិះម៉ូតូមួយគ្រឿង ម៉ាកសង់ប៊ិចពណ៌ខ្មៅ អត់ចាំស្លាកលេខ ធ្វើដំណើរតាមបណ្ដោយផ្លូវសុធារស ដោយជិះទៅមកជាច្រើនជុំ ។
សមត្ថកិច្ចបន្តថា ដោយគួរឱ្យសង្ស័យ ក៏បានធ្វើតាមឃ្លាំមើល ស្រាប់តែឃើញក្រុមជនសង្ស័យជិះម៉ូតូមកឈប់នៅផ្ទះកើតហេតុ រួចទម្លាក់ជនសង្ស័យឈ្មោះ ធឿន វុទ្ធី ឱ្យចុះទៅធ្វើសកម្មភាព ចំណែកបក្សពួកគេម្នាក់ទៀតជិះម៉ូតូគេចខ្លួនបាត់ទៅ។ ភ្លាមៗនោះជនសង្ស័យឈ្មោះ ធឿន វុទ្ធី ក៏ដើរទៅធ្វើសកម្មភាពកាច់.កម៉ូតូបានសម្រេច រួចជិះបំរុងរត់គេចខ្លួន តែត្រូវកម្លាំងល្បាតប៉ុស្តិ៍នគរបាលរដ្ឋបាលទន្លេបាសាក់ មកដល់ភ្លាមៗធ្វើការឃាត់ខ្លួនសាកសួរនាំ តែធ្វើឲ្យជនសង្ស័យភ័យស្លន់ស្លោក៏បន្ថែមល្បឿនម៉ូតូយ៉ាងលឿនព្យាយាមរត់គេចខ្លួន ក៏ត្រូវបានក្រុមកម្លាំងល្បាតធ្វើការប្រដេញតាមឃាត់ខ្លួន រហូតដល់ផ្លូវ302 កែងនឹងផ្លូវព្រះនរោត្តម សង្កាត់បឹងកេងកង1 រួចក៏ឃាត់ខ្លួនបានជាក់ស្ដែងតែម្តង បន្ទាប់មកនាំមកកាន់ប៉ុស្តិ៍នគរបាលរដ្ឋបាលទន្លេបាសាក់ ដើម្បីសួរនាំបន្ត។
ក្រោយឃាត់ខ្លួនសមត្ថកិច្ចដកហូតបានឧបករណ៍ កាច់.កម៉ូតូមួយកំប្លេរ និងធ្វើតេស្ដទឹកនោម រកសារធាតុញៀនលើជនសង្ស័យ ជាលទ្ធផល គឺវិជ្ជមាន ។ បច្ចុប្បន្នជនសង្ស័យត្រូវបានកម្លាំងសមត្ថកិច្ចប៉ុស្តិ៍នគរបាលរដ្ឋបាលទន្លេបាសាក់ កសាងសំណុំរឿង ដើម្បីបញ្ជូនទៅកាន់អធិការដ្ឋានខណ្ឌចំការមន ចាត់ការបន្តតាមនិតិវិធី ៕ (កែសម្រួលដោយ ៖ បុប្ផា)
ចែករំលែកព័តមាននេះ