ខេត្តបាត់ដំបង៖ អភិបាលខេត្តបាត់ដំបង នៅព្រឹកថ្ងៃទី១៨ មីនា បានបញ្ជាឲ្យកម្លាំងចម្រុះចុះរឹបអូសត្រាក់ទ័រមួយគ្រឿង ដែលជនទុច្ចរិតកំពុងលួចឈូសឆាយរំលោភយកដីព្រៃលិចទឹកនៅក្នុង«តំបន់៣» ដែលជាតំបន់ហាមឃាត់នៅត្រង់ចំណុច«ចាក់អន្ទង់» ស្ថិតក្នុងភូមិសាស្ត្រ ភូមិប៉ោយតាសេក ឃុំបឹងព្រីង ស្រុកថ្មគោល ក្រោយពីជនទុច្ចរិតមួយក្រុមនោះ បានប៉ះទង្កិចគ្នាមួយប្រាវជាមួយកម្លាំងចម្រុះ កាលពីពាក់កណ្ដាលអាធ្រាត្រ ។ នេះបើតាមលោកប៊ុត ម៉ក់ ប្រធានមន្ទីរទំនាក់ទំនង ជាមួយ រដ្ឋសភា ព្រឹទ្ធសភា និង អធិការកិច្ច ខេត្តបាត់ដំបង ដែលបានប្រាប់កោះសន្តិភាព នៅរសៀលថ្ងៃដដែលនេះ។
លោកប៊ុត ម៉ក់ បានផ្ដល់ព័ត៏មានថា មន្ត្រីការិយាល័យជំនាញរបស់លោក បានសហការជាមួយកម្លាំងកងរាជអាវុធហត្ថ រួមទាំងអាជ្ញាធរដែនដីផង បានចុះបង្ក្រាបបទល្មើសឈូសឆាយរំលោភដីព្រៃលិចទឹក នៅត្រង់ចំណុចខាងលើ ដែលបង្កឡើងដោយជនមួយក្រុម ។ លោកបានប្រាប់ថា កម្លាំងចម្រុះបានប៉ះទង្គិចជាមួយក្រុមល្មើស នៅវេលាម៉ោងប្រហែល១១យប់ថ្ងៃទី១៧ មីនា ខណៈក្រុមនោះបានព្យាយាមរារាំងសមត្ថកិច្ចមិនឲ្យចូលជិតត្រាក់ទ័រពួកគេ ដែលកំពុងឈូសដីព្រៃលិចទឹកនៅក្នុង«តំបន់៣»។ ប៉ុន្តែមិនមានអំពើហិង្សាកើតឡើងទេ ព្រោះកម្លាំងចម្រុះបានសម្រេចដកថយមួយជំហាន ចៀសវាងការប្រទូស្ដរ៉ាយគ្នា។ លុះនៅព្រឹកថ្ងៃទី១៨ មីនា ក្រោយពីមានបញ្ជាពីលោកអភិបាលខេត្តឲ្យកម្លាំងចម្រុះចុះរឹបអូសត្រាក់ទ័រប្រព្រឹត្តបទល្មើសនោះ ទើបកម្លាំងចម្រុះសម្រេចចុះអនុវត្តបទបញ្ជានេះ ហើយពេលនេះ កម្លាំងចម្រុះបាននិងកំពុងអនុវត្តតាមនៅតិវិធីហើយ។
គេមិនទាន់ប្រាប់ពីអត្តសញ្ញាណនៃក្រុមជនទុច្ចរិត ដែលយកត្រាក់ទ័រទៅលួចឈូសឆាយរំលោភយកដីព្រៃលិចទឹកនៅក្នុង«តំបន់៣»ខាងលើនេះនៅឡើយទេ។ ប៉ុន្តែបើតាមប្រភពពីមន្ត្រីមូលដ្ឋានបានឲ្យដឹងថា ក្រុមជនទុច្ចរិតមួយក្រុមនោះ បានប្រើប្រាសត្រាក់ទ័រម៉ាកគូប៊ូតាមួយគ្រឿងសំងំធ្វើសកម្មភាពលួចឈូសឆាយដីព្រៃលិចទឹក នៅចំណុចខាងលើនេះ អស់រយៈពេលប៉ុន្មានថ្ងៃកន្លងមកហើយ។ ប្រភពដដែលបានបញ្ជាក់ថា ក្រុមនេះ បានលួចធ្វើសកម្មភាពភាគច្រើននៅពេលយប់ ហើយទំនងបែបអាងមន្ត្រីមានអំណាចនៅពីក្រោយខ្នងផង ទើបក្រុមនេះហ៊ានរំលោភបំពានច្បាប់យ៉ាងគគ្លើនបែបនេះ ។ មិនតែប៉ុណ្ណោះ ក្រុមនេះថែមទាំងហ៊ានប្រឈមមុខយ៉ាងកំរោល ជាមួយកម្លាំងសមត្ថកិច្ចដែលចុះបង្ក្រាបទៀតផង រហូតក្រុមបង្ក្រាបសុខចិត្តដកថយមិនតបតឡើយ។
លោកឆេង ភារម្យ ប្រធានការិយាល័យអធិការកិច្ចនៃមន្ទីរទំនងទំនាងជាមួយរដ្ឋសភា ព្រឹទ្ធសភា និងអធិការកិច្ចខេត្ត ដែលកំពុងដឹកនាំកម្លាំងចុះអនុវត្តបទបញ្ជារបស់លោកអភិបាលខេត្ត បានប្រាប់កោះសន្តិភាពពីកន្លែងកើតហេតុមកថា កម្លាំងចម្រុះពិតជាបានប្រឈមមុខដាក់គ្នាជាមួយក្រុមលួចឈូសដីព្រៃលិចទឹកនោះមែន ពេលកម្លាំងចុះទៅដល់ចំណុចកើតហេតុនៅពាក់កណ្ដាលអធ្រាត្រ។ លោកបានឲ្យដឹងថា ក្រុមជនសង្ស័យមានបក្សពួកចំនួន៤នាក់ បានព្យាយាមបញ្ចេញសកម្មភាពរារាំងសមត្ថកិច្ចមិនឲ្យចូលទៅកាន់ទីតាំងដែលពួកគេកំពុងឈូសដីព្រៃ ហើយពួកគេថែមទាំងនាំគ្នាស្រែកចោទប្រកាន់កម្លាំងចម្រុះថា «ចោរ ចោរ» ទៀតផង។ ដោយសារតែមិនចង់ឲ្យមានការប្រឈមមុខដាក់គ្នាធ្ងន់ធ្ងរ ទើបកម្លាំងចម្រុះសុខចិត្តដកថយ ដើម្បីស្នើសុំគោលការណ៏ថ្នាក់លើជាថ្មី។
លោកឆេង ភារម្យ បានបញ្ជាក់ថា ក្រោយពីមានការប៉ះទង្កិចគ្នានៅយប់ថ្ងៃទី១៧ មីនា ក្រុមឈូសដីព្រៃទាំងនោះ បានបើកត្រាក់ទ័រចេញពីតំបន់នោះ យកទៅបន្ធូរកង់ទុកចោលនៅក្នុងរោងមួយកន្លែង។ ប៉ុន្តែនៅព្រឹកថ្ងៃទី១៨ មីនា ទើបលោកអភិបាលខេត្ត ចេញបញ្ជាឲ្យកម្លាំងចម្រុះដែលមានមន្ត្រីការិយាល័យរបស់លោក មន្ត្រីកងរាជអាវុធហត្ថ និង អាជ្ញាធរដែនដី ចុះទៅរឹបអូសត្រាក់ទ័រមួយគ្រឿងនោះ ហើយពេលនេះកម្លាំងចម្រុះកំពុងចាត់ការតាមនីតិវិធីហើយ។
សូមបញ្ជាក់ថា បច្ចុប្បន្ននេះ ការរំលោភបំពានដីព្រៃលិចទឹកនៅក្នុងតំបន់ហាមឃាត់(តំបន់២និងតំបន់៣) នៃបឹងទន្លេសាប ដែលបង្កឡើងដោយជនទុច្ចរិតមានលុយ មានអំណាច បាននិងកំពុងផុសផុលកាន់តែខ្លាំងឡើងៗ បើទោះជារាជរដ្ឋាភិបាល បានចេញបញ្ជាឲ្យបង្កើតគណៈកម្មការមួយ ដើម្បីចុះស្រាវជ្រាវដកហូតដីព្រៃលិចទឹកដែលជនទុច្ចរិតបានរំលោភបំពាន និង ស្វែងរកមុខជនប្រព្រឹត្តបទល្មើសទាំងនោះចាត់ការតាមច្បាប់ក្ដី។ រហូតមកដល់ពេលនេះ គេមិនទាន់ឃើញមន្ត្រីថ្នាក់ក្រោម អនុវត្តនូវបទបញ្ជារបស់រាជរដ្ឋាភិបាល ឲ្យមានប្រសិទ្ធភាពនៅឡើយទេ។
ផ្ទុយទៅវិញ គេពិនិត្យឃើញបទល្មើសឈូសឆាយរំលោភយកដីព្រៃលិចទឹកនេះ ពីសំណាក់ជនទុច្ចរិតដែលមានលុយ មានអំណាច បានធ្វើសកម្មភាពកាន់តែខ្លាំងទ្វេដងនាសព្វថ្ងៃនេះ នៅក្នុង«តំបន់៣» ដោយគ្មានការថមថយឡើយ។ នេះដោយសារតែមន្ត្រីថ្នាក់ក្រោមស្ទាក់ស្ទើរក្នុងការអនុវត្តច្បាប់ ហើយការអនុវត្តច្បាប់នៅមានកំរិត ក្នុងការដាក់ទោសទណ្ឌលើជនប្រព្រឹត្ត ទើបជនល្មើសកាន់តែបង្កើនសកម្មភាពបទល្មើស ផ្គើននិងច្បាប់កាន់ខ្លាំង។ បទល្មើសនេះកំពុងកើតមានពេញបន្ទុក នៅក្នុងស្រុកមោងឬស្សី ស្រុកសង្កែ ស្រុកឯកភ្នំ និង ស្រុកថ្មគោល ។
ចែករំលែកព័តមាននេះ