រាជធានីភ្នំពេញ ៖ មកទល់ពេលនេះ មហាជនច្រើនឡើងកាន់តែមានអារម្មណ៍តក់ ស្លុតនឹងជំងឺរលាកផ្លូវដង្ហើមធ្ងន់ធ្ងរ(Covid-19) បន្ទាប់ពីមានជនជាតិខ្មែរបានកើតជំងឺនេះជាហូរហែ ។ ដោយសារការភ័យខ្លាចនេះ បានធ្វើឱ្យមនុស្សភាគច្រើនបាត់បង់អារម្មណ៍ចង់ធ្វើអី ឬទៅណា ខណៈដែលកម្មវិធីជួបជុំក៏ត្រូវកាត់ បន្ថយ ។ យ៉ាងណាក៏ដោយលោកចាន់ រតនា ដែលជាកីឡាករផង និងជាគ្រូបង្វឹកផងបានអះអាងថា លោកមិនតក់ស្លុតដល់ថ្នាក់បោះបង់ក្ដីស្រមៃនោះទេគឺលោកនៅតែប្រឹងប្រែងហ្វឹកហាត់ ដោយគ្រាន់តែបង្កើនការប្រុងប្រយ័ត្នជាងមុនប៉ុណ្ណោះ។
អ្នកគាំទ្រក្នុងស្រុកជាច្រើនបានដឹងរួចហើយថា ចាន់ រតនា ដែលជាអ្នកលេងគុនចម្រុះប្រចាំនៅសង្វៀនល្បីលំដាប់ពិភពលោកONE Championship ខកឡើងសង្វៀនប្រមាណជា៨ខែមកហើយ បើគិតចាប់ពីការឡើងសង្វៀន លើកចុងក្រោយនាពាក់កណ្ដាលខែសីហា ឆ្នាំ ២០១៩ ។ ជាមួយនឹងការខកខាននេះហើយ ដែលលោកប្រកាសថា ត្រូវប្រឹងឡើងវិញដើម្បីកុំឱ្យបាត់ឈ្មោះ នៅក្នុងវិស័យប្រដាល់។
កីឡាករវ័យ៣៤ឆ្នាំរូបនេះបញ្ជាក់ថា លោកនៅតែហាត់ខ្លួនឯងជាប្រចាំដដែលមិនសម្រាកទេ ទោះជាមេរោគ Covid-19 ផ្ទុះឡើងថ្មីៗនេះក្ដី ប៉ុន្តែលោកត្រូវការពារខ្លួននិងថែរក្សាអនាម័យឲ្យបានល្អ ។ លោកហាត់ខ្លួនឯងដើម្បីឲ្យកម្លាំងល្អឡើងព្រោះដៃគូជប៉ុនរបស់លោកត្រូវជួបខាងមុខគេខ្លាំងណាស់ ។ តែលោកក៏បានប្រកាសផ្អាកក្លិបរយៈពេល២សប្ដាហ៍ ដើម្បីរួមចំណែកទប់ស្កាត់ជំងឺកាចសាហាវនេះផងដែរ ។
ការតាំងចិត្តនេះ គឺបន្ទាប់ពីលោកមានឱកាសឈ្នះកីឡាករជំនាញចំបាប់គុយបាGustavo Balart នៅក្នុងកម្មវិធី ONE: DREAM OF GOLD កាលពីខែសីហា ឆ្នាំ២០១៩ កន្លងទៅនៅប្រទេសថៃ ។ ម្ចាស់ក្លិបសិល្បៈរូបនេះមានការតាំងចិត្តខ្ពស់ថា ពេលលោកខានវ៉ៃច្រើនខែលោកក៏មិនទាន់ហ៊ានប៉ាន់ស្មានថាកម្លាំងយ៉ាងណានោះដែរដូច្នេះហើយទើបមានតែការហ្វឹកហាត់ដើម្បីកុំឱ្យធ្លាក់ដៃដោយមិនអាចតក់ស្លុតរឿងកូវីត១៩ ហើយបោះបង់អាជីពនោះឡើយ។
លោក Lorenzo ជាគ្រូបង្វឹកជនជាតិបរទេស ដែលតែងតែបង្ហាត់កម្លាំងដល់លោកចាន់ រតនា ដើម្បីឲ្យរូបគេអាចទប់ទល់ការប្រកួតរយៈពេល៣ទឹកបានងាយស្រួល និងចេះគ្រប់គ្រងការប្រកួតនៅពេលហត់នោះ ក៏គាំទ្រជំហររបស់កីឡាកររូបនេះក្នុងពេលផ្ទុះជំងឺកូវីតផងដែរ ។ គ្រូបង្វឹកមកពីLLFitness បានបញ្ជាក់ថា កម្លាំងសំខាន់ណាស់ដែលចាន់ រតនា ត្រូវធ្វើឲ្យកាន់តែល្អនិងចេះគ្រប់គ្រងការប្រកួតថាពេលអស់កម្លាំងត្រូវធ្វើយ៉ាងណាឬពេលកម្លាំងពេញត្រូវធ្វើយ៉ាងណា ។ អ្វីដែលសំខាន់រតនានឹងជួបគូប្រកួតខ្លាំងជាង Balart ទៅទៀត ដូច្នេះត្រូវរៀបចំកម្លាំងឲ្យបានល្អជាងមុន ។ គ្រូបង្វឹកសញ្ជាតិអុីតាលី រូបនេះបន្តថា រតនាខំប្រឹងខ្លាំងណាស់ ។
រតនាហាត់ក្បាច់ជីជិតស៊ូនៅក្លិប H/art Academy ជាមួយគ្រូបង្វឹកខូវ វិវឌ្ឍនាដើម្បីត្រៀមខ្លួនចូលប្រកួតនាពេលខាងមុខនិងហាត់ការពារកុំឲ្យគ្រោះថ្នាក់ពេលគូប្រកួតចាប់ផ្ដួលលើក្ដាររេញ ។ លោកចង់ឲ្យរតនា កើនកម្លាំងខ្លាំងមានភាពអំណត់និងថាមពលខ្លាំងដើម្បីបំបាក់គូប្រជែង ។
គួរបញ្ជាក់ថា ចាន់់ រតនា ជាកីឡាករកម្ពុជាតែម្នាក់គត់ដែលទទួលជោគជ័យច្រើនជាងគេ បំផុតនៅសង្វៀនអន្តរជាតិONE និងឈ្នះ៣ដងជាប់គ្នាក្លាយជាកីឡាករកម្ពុជាល្អបំផុតប្រចាំ សង្វៀនធំបំផុតក្នុងប្រវត្តិសាស្ត្រកីឡាករអាស៊ី ។
ក្នុងការប្រកួតបន្ទាប់ ចាន់ រតនា ទំនងជួបជើងខ្លាំងមកពីជប៉ុន Yuya Wakamatsu នាពេលឆាប់ៗនេះ ប៉ុន្តែកម្មវិធីមួយចំនួនរបស់ONE ត្រូវបានពន្យារពេលដោយសារមេរោគCovid-19 ។ រតនាបានបង្ហើបថា រូបគេត្រូវជួប Yuya តាំងពីខែតុលាម្ល៉េះប៉ុន្តែបែរខកខានទៅវិញដោយសាររូបគេមានបញ្ហាសុខភាព ៕ (កែសម្រួលដោយ ៖ បុប្ផា)
ចែករំលែកព័តមាននេះ