ប៉ូលិស​នាំ​ខ្លួន​អ្នកក្លាហាន​ម្នាក់​ខាង​បំពុល​សង្គម​មក​ដុះក្អែល​ចេញ


ខេត្តសៀមរាប ៖ កម្លាំង​នគរបាល​ផែន​ការងារ​សន្តិសុខ​នៃ​ស្នងការដ្ឋាន​នគរបាល​ខេត្តសៀមរាប បន្ត​ឃាត់ខ្លួន​ជនសង្ស័យ​ម្នាក់​បន្ថែម​ទៀត ពី​បទ​ផ្សព្វផ្សាយ​ព័ត៌មាន​មិន​ពិត នៅ​ព្រឹក​ថ្ងៃ​ទី​១១ ខែ​មីនា ឆ្នាំ​២០២០​នេះ ដោយ​មានការ​អនុញ្ញាត​ពី​លោកស្នងការ​នគរបាល​ខេត្ត និង​សម្របសម្រួល​ពី​លោក​ព្រះរាជអាជ្ញា​អម​សាលាដំបូង​ខេត្តសៀមរាប ។

ទើប​កម្លាំង​នគរបាល ផ​ន​ការងារ​សន្តិសុខ បាន​ដឹកនាំ​កម្លាំង​ការិយាល័យ​ប្រឆាំង​បទល្មើស​បច្ចេកវិទ្យា ដោយ​សហការ​ជាមួយ​អធិការដ្ឋាន​នគរបាល​ក្រុង​សៀមរាប ប៉ុស្តិ៍​នគរបាល​សង្កាត់​ស្លរ​ក្រាម ចុះ​ទៅ​ធ្វើការ​នាំ​ខ្លួន​ម្ចាស់​គណនី​ហ្វេ​ស​ប៊ុ​ក «​ឡ​ន លី គ្រួសារ​រីករាយ​» ឈ្មោះ ភុ​ត ថុ​នា ភេទ ប្រុស អាយុ​៣២​ឆ្នាំ ទីលំនៅ​បច្ចុប្បន្ន​ភូមិ​បឹង​ដូន​ប៉ា ស​ង្តា​ត់​ស្ល​ក្រាម ក្រុង​សៀមរាប ខេត្ត​សៀម​រាប ដែល​ជាប់​ពាក់ព័ន្ធ​នឹង​ការ​បង្ហោះ​ព័ត៌មាន​មិន​ពិត និង​បំពុលសង្គម កាលពី​ថ្ងៃ​ទី​៥ និង​ថ្ងៃ​ទី​១០ ខែមីនា ឆ្នាំ​២០២០ កន្លង​ទៅ ដែល​ធ្វើ​ឱ្យ​ប៉ះពាល់​ដល់​សន្តិសុខ សណ្តាប់ធ្នាប់​សង្គម ដើម្បី​នាំ​មក​សាកសួរ​។

សូម​បញ្ជាក់​ថា បុរស​ម្នាក់​នេះ ពូកែ​ខាង​ដាក់​ទំនាយ​គេ​ឱ្យ​ងាប់​នឹង​វីរុស​កូ​វី​ដ​19, ជូន​បង​ជិះឡាន​សា​រ៉ែ​ន និង​ញ៉ាំ​បាយ​ក្រហម​លេង ហើយ​ម្ចាស់​គណនី​ហ្វេ​ស​ប៊ុ​ក «​ឡ​ន លី គ្រួសារ​រីករាយ​» ឈ្មោះ ភុ​ត ថុ​នា នេះ ទីលំនៅ​បច្ចុប្បន្ន​ភូមិ​បឹង​ដូន​ប៉ា ស​ង្តា​ត់​ស្ល​ក្រាម ដែល​ជាប់​ពាក់ព័ន្ធ​នឹង​ការ​បង្ហោះ​ព័ត៌មាន​មិន​ពិត និង​បំពុលសង្គម កាលពី​ថ្ងៃ​ទី​៥ និង​ថ្ងៃ​ទី​១០ ខែមីនា ឆ្នាំ​២០២០ កន្លង​មកនេះ ទើប​នៅ​ថ្ងៃ​ទី​១២ ខែមីនា ជន​ត្រូវ​ចោទ​រូប​នេះ​ត្រូវ​បាន​លោក មុ​យ សុ​ភ័ក្ត្រ ចៅក្រម​ស៊ើប​សួរ​សាលាដំបូង​ខេត្តសៀមរាប និង​សម្រេច​ឃុំខ្លួន​បណ្តោះអាសន្ន​នៅ​ពន្ធនាគារ​ខេត្តសៀម​រាប​ហើយ​។

បើ​តាម​ការ​អះអាង​ឱ្យ​ដឹង​ពី​លោក​ឧត្តមសេនីយ៍ត្រី ហួត សុធី ស្នងការ​រង​ទទួល​ការងារ​សន្តិសុខ នៃ​ស្នងការដ្ឋាន​នគរបាល​ខេត្ត នៅ​រសៀល​ថ្ងៃ​ទី​១៦ ខែមីនា​នេះ​ថា បុរស​រូប​នេះ​មាន​ទីលំនៅ​បច្ចុប្បន្ន​ភូមិ​បឹង​ដូន​ប៉ា សង្កាត់​ស្ល​ក្រាម បាន​បង្ហោះ​ព័ត៌មាន​មិន​ពិត និង​ប្រមាថ​ថ្នាក់ ដឹកនាំ​រាជរដ្ឋាភិបាល​កម្ពុជា កាលពី​ថ្ងៃ​ទី​១០ ខែមីនា ឆ្នាំ​២០២០ កន្លង​ទៅ​ថ្មី​នេះ​។

ហើយ​តាម​រយៈ​ការ​សាកសួរ​របស់​សមត្ថកិច្ច ជនសង្ស័យ​ខាងលើ​បាន​សារភាព​ថា ខ្លួន​ពិតជា​បាន​ប្រព្រឹត្ត​នូវ​បទល្មើស​នេះ​ពិតប្រាកដ​មែន ។

បច្ចុប្បន្ន​ជនសង្ស័យ ត្រូវ​បាន​សមត្ថកិច្ច​ធ្វើការ​ឃាត់ខ្លួន និង​កំពុង​កសាង​សំណុំរឿង​បញ្ជូន​ទៅ​សាលាដំបូង​ខេត្តសៀមរាប ដើម្បី​អនុវត្ត​នីតិវិធី​បន្ត​តាម​ផ្លូវច្បាប់​៕ (​កែសម្រួល​ដោយ ៖ បុប្ផា​)

ព័ត៌មាន​ជាតិ

Sponsored News

ការស្ទង់មតិគេហទំព័រថ្មី




សូម​អរគុណ