ការពន្យាពេលក្នុងការធ្វើកិច្ចការដែលអ្នកត្រូវបំពេញអាចធ្វើឲ្យកិច្ចការតូចតាចមួយក្លាយទៅជាបញ្ហាដ៏សែនធំដែលអ្នកស្ទើរតែមិនអាចឆ្លងផុតរួច ។ ការស្រាវជ្រាវបានបង្ហាញឲ្យដឹងថា ការពន្យាពេលក្នុងការបំពេញកិច្ចការងារអាចប៉ះពាល់ដល់សុខភាព ទ្រព្យសម្បត្តិ និងសុភមង្គលរបស់មនុស្សបាន ។
ដំណោះស្រាយនៃបញ្ហានេះ គឺទឹកចិត្តរបស់មនុស្ស ឬការចង់ធ្វើសកម្មភាព ឬឈានទៅរកគោលដៅរបស់មនុស្សជាដើម ។ ពេលខ្លះទឹកចិត្តមនុស្សកើតចេញពេលដែលមនុស្សចេញសកម្មភាព ហើយខាងក្រោមនេះ គឺជាវិធីសាស្ត្រមួយចំនួនដែលអាចជួយឲ្យអ្នកសម្រេចបានកិច្ចការច្រើនដោយមានប្រសិទ្ធភាពទោះជាអ្នកធ្វើការនៅផ្ទះពិតមែនក្តី ។
១. បញ្ចប់វដ្ដនៃការខ្ជិលច្រអូស ៖
ការចៀសវាងកិច្ចការងារធ្វើឲ្យមនុស្សព្រួយបារម្ភច្រើន ដែលជំរុញឲ្យមនុស្សកាន់តែជៀសវាងកិច្ចការងារកាន់តែខ្លាំងឡើងថែមទៀត ។ ដើម្បីបញ្ចប់វដ្តនេះអ្នកត្រូវដឹងពីមូលហេតុដែលធ្វើឲ្យអ្នកជៀសវាងកិច្ចការនោះ ។ មនុស្សមួយចំនួនជៀសវាងការងារព្រោះពួកគេខ្លាចបាត់បង់អ្វីមួយ ខណៈដែលមនុស្សមួយចំនួនទៀតចៀសវាងការងារព្រោះពួកគេគិតថាពួកគេមិនមានអារម្មណ៍ក្នុងការធ្វើវា ។ ប៉ុន្តែអ្វីដែលអ្នកត្រូវចងចាំ គឺអ្នកមិនចាំបាច់មានអារម្មណ៍ដើម្បីអាចធ្វើអ្វីមួយចេញបានទេ ។
២. កុំឈប់បន្ទាប់ពីសម្រេចបានអ្វីមួយហើយ ៖
ជាទូទៅប្រសិទ្ធភាពការងាររបស់មនុស្សកើនឡើង បន្ទាប់ពីពួកគេបានសម្រេចនូវកិច្ចការអ្វីមួយ ដូច្នេះរាល់ពេលដែលអ្នកបានបញ្ចប់កិច្ចការមួយហើយ អ្នកគួរតែប្រើពេលវេលាបន្ទាប់ដើម្បីបំពេញនូវកិច្ចការដទៃទៀតខណៈដែលអ្នកកំពុងតែមានទឹកចិត្តនិងកម្លាំងក្នុងការធ្វើការ ។
៣. បង្កើតទម្លាប់ល្អៗ និងតាមដានលទ្ធផលរបស់ខ្លួន ៖
មនុស្សចូលចិត្តមើលឃើញលទ្ធផលដែលខ្លួនបានសម្រេចប្រោះវាផ្តល់ជាកម្លាំងលើកទឹកចិត្តដែលជំរុញឲ្យពួកគេកាន់តែខិតខំប្រឹងប្រែងបន្តថែមទៀត ។ ដោយហេតុដូចនេះអ្នកគួរតែបង្កើតទម្លាប់ធ្វើការល្អៗដូចជាការមិនមើលប្រព័ន្ធសង្គមរាល់ពេលអ្នកអង្គុយនៅតុធ្វើការជាដើម រួចតាមដានមើលលទ្ធផលរបស់អ្នកជារៀងរាល់ថ្ងៃ ៕ ដកស្រង់ចេញពីវេបសាយ ៖ entrepreneur (កែសម្រួលដោយ ៖ បុប្ផា)
ចែករំលែកព័តមាននេះ