រាជធានីភ្នំពេញ ៖ លោក សេង ឡូត អ្នកនាំពាក្យក្រសួងរៀបចំដែនដីនគររូបនីយកម្ម និងសំណង់បានអះអាងថា រហូតមកដល់ពេលនេះ ក្រសួងបានចុះបញ្ជីក្បាលដីជូនប្រជាពលរដ្ឋបានជាង៥លានក្បាលដី ក្នុងចំណោមក្បាលដីនៅទូទាំងប្រទេសមានជាង៧លានក្បាលដី ហើយនឹងជំរុញបញ្ចប់នៅឆ្នាំ២០២១ ។ ថ្លែងក្នុងសន្និសីទសារព័ត៌មាន នាព្រឹកថ្ងៃទី១៦ ខែមីនានេះ ។
លោក សេង ឡូត បានឲ្យដឹងថា រហូតមកដល់ពេលនេះក្រសួងរៀបចំដែនដីនគរូបនីយកម្ម និងសំណង់បាន ចុះបញ្ជីដីធ្លីជូនប្រជាពលរដ្ឋជាង៥លាន៦សែនក្បាលដី ស្មើ៨១ភាគរយធៀបនឹងចំនួនក្បាលដី ដែលត្រូវចុះបញ្ជីនៅទូទាំងប្រទេសមានប្រមាណជាង៧លានក្បាលដី ។
អ្នកនាំពាក្យបានឲ្យដឹងថា ការចុះបញ្ជីក្បាលដីមានលក្ខណៈជាប្រព័ន្ធ ( ការចុះទាំងភូមិ ឃុំ សង្កាត់ តែម្តង) នឹងការចុះបញ្ជីដីដាច់ដោយឡែក ។ ជាងនេះក៏មានការចុះបញ្ជីដីសហគមន៍ដល់ជនជាតិភាគតិចផងដែរ ។ លោកបញ្ជាក់ថា ៖«រាជរដ្ឋាភិបាលបានចេញអនុក្រឹត្យឲ្យមានការចុះបញ្ជីដីដល់សហគមន៍ជនជាតិដើមភាគីតិច ដើម្បីផ្តល់កម្មសិទ្ធិដល់ជនជាតិដើមភាគតិច ក្នុងការគ្រប់គ្រងថែរក្សាដីក៏ដូចជា ការថែរក្សាប្រពៃណីជនជាតិដើមភាគតិច» ។ ក្នុងសន្និទសារព័ត៌មាននោះដែរ អ្នកនាំពាក្យបានអះអាងទៀតថា ការចុះបញ្ជីដីធ្លីនេះមិនមានការកៀបសង្កត់ ឬបង្ខិតបង្ខំប្រជាពលរដ្ឋណាមួយនោះទេ ។ ការចុះបញ្ជីដីនេះដែរ មាននីតិវិធីជាដំណាក់កាលៗ ដែលបានធ្វើការផ្សព្វផ្សាយច្រើន ។
អ្នកនាំពាក្យបានគូសបញ្ជាក់ទៀតថា ៖«មកដល់ពេលនេះយើងបានចុះបញ្ជីដីធ្លីជូនជនជាតិ ដើម្បីភាគីតិចបាន៣០សហគមន៍ ហើយបើនិយាយនៅទ្វីបអាស៊ីកម្ពុជាបានចុះបញ្ជីដីធ្លីជនជាតិដើមភាគីតិចឈានមុខគេ »។ ថ្លែងចំពោះមុខអ្នកសារព័ត៌មានជាច្រើនស្ថាប័ននោះដែរលោក សេង ឡូតបានះអាង ថាក្រសួងក៏បានចុះបញ្ជីដីធ្លីរបស់រដ្ឋផងដែរក្នុងគោលបំណងការពារដីរដ្ឋ ដោយមានទាំង ការចុះបញ្ជី ដើម្បីមានឯកសារ និយាមការច្បាស់លាស់ ចៀសវាងការរំលោភយកដីរដ្ឋពីជនខិតខូចមួយចំនួន ។
លោកបន្ថែមថាការចុះបញ្ជីដីរដ្ឋនេះ ដើម្បីទុកជាប្រយោជន៍សាធារណៈសម្រាប់បម្រើការអភិវឌ្ឍជាតិក៏ដូចជាតម្រូវការក្នុងក្របខណ្ឌសាធារណៈ ។ តាំងពីរាជរដ្ឋាភិបាលចេញបទបញ្ជា០១ ឆ្នាំ២០១២ មកក្រសួងបានធ្វើនិយ័តកម្ម (ធ្វើលិខិតស្របច្បាប់ស្របច្បាប់) ជូនប្រជាពលរដ្ឋស្របច្បាប់ចំពោះការកាន់កាប់ដីរដ្ឋរួចហើយ ហើយផុតពីថ្ងៃនោះមកភារៈកិច្ច គឺត្រូវការពារដីរដ្ឋទាំអស់ គ្នាដើម្បីតម្រូវការរបស់ជាតិ ដោយមិនអាចឲ្យមានការទន្ទ្រានរំលោភយកបានទៀតទេ ។ លោកក៏បានឲ្យដឹងថា ចំពោះដីរដ្ឋដែលធ្វើសិទ្ធិកាន់កាប់ជូនប្រជាជនមានចំនួន៤០ម៉ឺនគ្រួសារ ដែលមានផ្ទៃដី១លាន២សែនហិកតា ។
អ្នកនាំពាក្យដដែលក៏បានឲ្យដឹងថាបើតាមការកំណត់របស់ក្រសួងរៀបចំដែនដី នគរនីយកម្ម និងសំណង់ដែលមានលោក ជា សុផារ៉ា ឧបនាយករដ្ឋមន្ត្រី ដឹកនាំនោះ មានគោលដៅឆ្នាំ២០២៣ ដើម្បីបញ្ចប់ការចុះបញ្ជីដីធ្លីជូនប្រជាណលរដ្ឋ ប៉ុន្តែដោយសារមានការមមាញឹកពីមន្ត្រីចង់ឲ្យចប់ការចុះបញ្ជីដីធ្លីជូនប្រជាជននៅទូទាំងប្រទេសនៅឆ្នាំ២០២១វិញ ដោយថាការចុះបញ្ជីដីនេះនឹងធានាក្នុងការជំរុញការកាន់កាប់ដី និងរួមចំណែកការកាត់បន្ថយវិវាទ ៕
ចែករំលែកព័តមាននេះ