រាជធានីភ្នំពេញ ៖ ដើម្បីរក្សាស្នាដៃបុព្វបុរសជំនាន់មុន សម្តេចតេជោ ហ៊ុន សែន នាយករដ្ឋមន្ត្រីបានប្រកាសមិនអនុញ្ញាតឲ្យមានករ កែប្រែវប្បធម៌បុរាណនានាដែលមរតក ដូនតាតាំងពីយូរយារមកហើយនៅក្នុងខេត្តបាត់ដំបងនោះទេ ។
មានប្រសាសន៍ក្នុងពិធីបើកបុណ្យទន្លេ នាល្ងាចថ្ងៃទី១៤ ខែមីនា ឆ្នាំ២០២០ នៅទីរួមខេត្តបាត់ដំបង សម្តេចតេជោបានបញ្ជាក់យ៉ាងដូច្នេះថា៖ «ដើម្បីដាក់បញ្ចូលទៅក្នុងអង្គការយូណេស្កូ យើងត្រូវរួមគ្នារក្សានូវសំណង់បុរាណ ផ្ទះបុរាណ ស្ពានបុរាណ នៅក្នុងខេត្តបាត់ដំបង ដោយមិនត្រូវឲ្យមានការកែប្រែខុសពីស្ថានភាពដើម។ ត្រូវបន្តជំរុញ និងកំណត់នូវគោលដៅទេសចរណ៍អាទិភាព រួមមានទេសចរណ៍ផ្ទះបុរាណ តំបន់ទេសចរណ៍សត្វស្លាប តំបន់ប្រាសាទបាណន់ រមណីយដ្ឋានភ្នំពៅ ទស្សនាហ្វូងសត្វត្រចៀវរាប់លានក្បាលចេញពីរូងភ្នំពេលមុនថ្ងៃរៀបលិច រួមទាំងលក្ខណៈពិសេសនៃម្ហូបអាហារប្រចាំខេត្តផងដែរ»។
សម្តេចបន្តថា ត្រូវបន្តការកសាងហេដ្ឋរចនាសម័ន្ធចាំបាច់ដែលបំរើឲ្យវិស័យទេសចរណ៍ រួមមានអាកាសយានដ្ឋាន ផ្លូវរថភ្លើង ផ្លូវថ្នល់ ទឹកស្អាត អគ្គិសនី សណ្ឋាគារ និងរមណីយដ្ឋានផ្សេងៗតាមរយៈការតភ្ជាប់ពីតំបន់មួយទៅតំបន់មួយតាមរយៈផ្លូវគោក ផ្លូវដែក និងផ្លូវអាកាស។ ហើយត្រូវពិនិត្យលទ្ធភាពរៀបចំព្រលានយន្តហោះបាត់ដំបងឡើងវិញ ដោយជំរុញឲ្យសមត្ថកិច្ចជំនាញពិនិត្យឲ្យម៉ត់ចង់លើការងារដ៏មានសារៈសំខាន់នេះ ។
សម្តេចតេជោ ក៏បានលើកឡើងទៀតថា រាជរដ្ឋាភិបាលនឹងខិតខំរៀបចំការតភ្ជាប់ផ្លូវបាត់ដំបងជាមួយខេត្តសៀមរាប ដែលផ្លូវនោះនឹងកាត់បន្ថយការធ្វើដំណើរ ដែលពីមុនធ្វើ ដំណើរពីបាត់ដំបងទៅបន្ទាយមានជ័យ ហើយកាត់ខេត្តសៀមរាប បើប្រៀបធៀបផ្លូវនឹងចំ ណេញការធ្វើដំណើររហូតដល់៦៩គីឡូម៉ែត្រ ។
សម្តេចបញ្ជាក់ថា ចំពោះការធ្វើផ្លូវនេះ ស្ថិតក្នុងគម្រោងនៅក្នុងឆ្នាំ២០២១ បើសិនមានការសិក្សាច្បាស់លាស់ ហើយរាជរដ្ឋាភិបាលនឹងធ្វើការស្វែងរកឥណទានក្នុងការធ្វើផ្លូវមួយខ្សែនេះ ដែលជាតភ្ជាប់មួយយ៉ាងសំខាន់ក្នុងខេត្តបាត់ដំបង បន្ទាប់ពីផ្លូវខេត្តនេះបានតភ្ជាប់មួយ ខេត្តមួយចំនួនរួចហើយ។
សម្តេចតេជោ ក៏បានស្នើដល់អភិបាលខេត្តបាត់ដំបង ក៏ដូចជាសម្តេចក្រឡាហោម ស ខេង ពិនិត្យមើលចៀសវាងការកសាងនូវសំណង់ខ្ពស់ ដែលអាចប៉ះពាល់ដល់ការហោះហើរនៅពេលពង្រីកព្រលានយន្តមួយនេះ។ បើទោះបីជាព្រលានយន្តមួយនេះ មិនអាចក្លាយជាព្រលានយន្តអន្តរជាតិក៏ដោយ ក៏ព្រលានមានសារៈសំខាន់ចំពោះប្រជាពលរដ្ឋក្នុងការហោះហើរក្នុងស្រុកផងដែរ។ ដូច្នេះយើងត្រូវរៀបចំចក្ខុវិស័យមួយ ដើម្បីពិនិត្យការរៀបចំព្រលានយន្តហោះបាត់ដំបងឡើងវិញ ដើម្បីបំរើនូវសេចក្តីត្រូវការវិវត្តរបស់ប្រទេស៕ (កែសម្រួលដោយ ៖ បុប្ផា)
ចែករំលែកព័តមាននេះ