ខេត្តស្វាយរៀង ៖ រឿងរ៉ាវគួរឱ្យហួសចិត្តបំផុតមួយបានកើតឡើងធ្វើឱ្យមានការភ្ញាក់ផ្អើលអស់អ្នកភូមិ ដោយសារតែគ្រួសារមួយបានជឿយ៉ាងងប់ងល់លើជនម្នាក់ដែលតាំងខ្លួនជាគ្រូចាប់ខ្មោចព្រាយបិសាច ដោយគ្រាន់តែកូនប្រសាស្រវឹងស្រាក៏សង្ស័យថា ខ្មោចចូលដែរ ហើយក៏ទៅពឹងគ្រូខ្មោចជាគ្រូបោកនោះដើម្បីបណ្តេញខ្មោចចេញពីក្នុងខ្លួនកូនប្រសា ។
ខេត្តស្វាយរៀង ៖ រឿងរ៉ាវគួរឱ្យហួសចិត្តបំផុតមួយបានកើតឡើងធ្វើឱ្យមានការភ្ញាក់ផ្អើលអស់អ្នកភូមិ ដោយសារតែគ្រួសារមួយបានជឿយ៉ាងងប់ងល់លើជនម្នាក់ដែលតាំងខ្លួនជាគ្រូចាប់ខ្មោចព្រាយបិសាច ដោយគ្រាន់តែកូនប្រសាស្រវឹងស្រាក៏សង្ស័យថា ខ្មោចចូលដែរ ហើយក៏ទៅពឹងគ្រូខ្មោចជាគ្រូបោកនោះដើម្បីបណ្តេញខ្មោចចេញពីក្នុងខ្លួនកូនប្រសា ។
វិធីព្យាបាលនេះសាហាវណាស់ គឺចាប់បុរសជាឪពុកក្មេកចងស្លាបសេកដាក់ច្រវាក់ជើង និងចាប់កូនប្រសាប្រុស និងកូនស្រីវាយ និងដុតភ្លើងធូបឱ្យរលាករលួយពេញខ្លួន ដៃ ជើង និងពងស្វាសបណ្តាលឱ្យរលួយគួរឱ្យញាក់សាច់ រកថ្លែងពុំបាន ។ ហេតុការណ៍ចាប់ខ្មោចព្រាយមិនគួរកើតមាននេះបានកើតឡើងកាលពីថ្ងៃទី៦ កញ្ញា វេលាម៉ោង៥ល្ងាច និងមានរយៈពេល២ថ្ងៃ នៅភូមិព្រៃផ្តៅ និងភូមិធ្លក សង្កាត់ច្រកម្ទេស ក្រុងបាវិត។ ជនរងគ្រោះមាន ១-ឈ្មោះ សំ វៃ ភេទប្រុស អាយុ៥២ឆ្នាំ ជាសន្តិសុខរោងចក្រក្រុងបាវិត ជាឪពុក ២-ឈ្មោះ សំ វន្នី ភេទស្រី អាយុ១៩ឆ្នាំ ជាកម្មការិនីរោងចក្រក្រុងបាវិត ជាកូនស្រី និង៣-ឈ្មោះ ធន់ តឿង ភេទប្រុស អាយុ៣២ឆ្នាំ ជាសន្តិសុខយាមរោងចក្រ ជាកូនប្រសា ។
បើតាមស្ត្រីឈ្មោះ សំ សាវាន អាយុ៣០ឆ្នាំ ជាប្រពន្ធរបស់ឈ្មោះ ឆន់ តឿង នៅភូមិធ្លក សង្កាត់ច្រកម្ទេស ក្រុងបាវិត បានប្រាប់ឱ្យដឹងថា កាលពីថ្ងៃទី៦ កញ្ញា ប្តីរបស់គាត់ឈ្មោះ ធន់ តឿង បានទៅកំដរប្អូនថ្លៃឈ្មោះ សំ ម៉ាឡៃ ឆ្លងទន្លេដេកអាំងភ្លើងនៅភូមិព្រៃផ្តៅ សង្កាត់ច្រកម្ទេស ក្រុងបាវិត ។ លុះពេលល្ងាចក៏មានការហូបស្រាអស់១លីត្រ មានគ្នា៤នាក់ ក្រោយមកក៏ស្រវឹងទន់ដៃជើង ។ ពេលនោះគាត់ជាប្រពន្ធបានមកសួរដើម្បីនាំទៅផ្ទះវិញ ស្រាប់តែប្តីគាត់និយាយរវើរវាយលែងស្គាល់ប្រពន្ធកូន ។ អ្នកខ្លះគិតទៅលើរឿងអបិយជំនឿដោយខ្សឹបប្រាប់ថា ប្តីខ្មោចចូលហើយ គួរទៅរកគ្រូបណ្តេញខ្មោចទៅ ។
តាមប្រភពដដែលឱ្យដឹងថា មានគ្រូពូកែម្នាក់នៅផ្ទះអ្នកភូមិអង្គសាលា សង្កាត់ព្រៃអង្គុញ ក្រុងបាវិត ល្បីពូកែអាចមើលមនុស្សគឱ្យនិយាយបានវិញ ។ ស្ត្រីជាប្រពន្ធបន្តថា ដោយសារភ័យពេក គាត់ក៏ទៅអញ្ជើញគ្រូនោះឱ្យមកដេញខ្មោចដែលចូលប្តីគាត់ ។ ពេលគ្រូនោះមកដល់ផ្ទះ ក៏ចូលរូបឱ្យមនុស្សម្នាហៅខ្លួនថា «ព្រះអង្គ» ព្រោះបារមីព្រះគោសណ្ឋិត ។ ពេលចូលរូប ស្រាប់តែស្រែកម៉ៗ បន្ទាប់មកក៏ទស្សន៍ទាយ ហើយប្រាប់ថា ប្តីគាត់ (ធន់ តឿង) ត្រូវអំពើព្រាយក្បាល៨ បើចង់រួចពីគ្រោះនេះ ត្រូវរុះរើផ្ទះចោល ព្រោះផ្ទះមានភាពមិនល្អអាចបណ្តាលឱ្យប្តីស្លាប់ ។ ដោយសារតែមានជំនឿ ស្ត្រីជាប្រពន្ធប្រាប់ថា ផ្ទះខ្ញុំរុះចោលមិនស្តាយទេ ឯជីវិតប្តីមិនអាចទិញបានទេ សុខចិត្តរស់នៅក្នុងខ្ទមក៏បាន ។ បន្ទាប់មកគ្រូនេះនិយាយទៀតថា មានព្រាយក្បាល៨ នៅក្នុងដើមស្វាយ និងដើមជ្រៃ ត្រូវកាប់ចោលទាំងអស់ ។ ដោយធ្វើតាមសម្តីគ្រូចាប់ខ្មោច ក៏នាំគ្នាទៅកាប់ដើមជ្រៃនៅមុខផ្ទះអស់៤ដើម និងដើមស្វាយ១ដើម។
គ្រូនោះនិយាយទៀតថា ស្វាយក្រោយផ្ទះ និងខ្ទមតូចក្រោមដើមស្វាយ ក៏ត្រូវកាប់ចោល និងរុះចេញដែរ ។ ពេលនោះបុរសជាឪពុកឈ្មោះ សំ វៃ មកដល់ឃើញកូនកាប់ដើមជ្រៃ ដើមស្វាយអស់ និងរុះខ្ទមគ្រូបារអាចារ្យរបស់គាត់ចោល ក៏ស្រែកឡូឡារករឿងវាយប្រពន្ធកូន ។ ពេលនោះគ្រូខ្មោចប្រាប់ថា នោះហើយជាព្រាយក្បាល៨ ចូលសណ្ឋិត ត្រូវចាប់ចងឱ្យជាប់ ហើយទុកឱ្យព្រះអង្គដេញចេញ ។ ភ្លាមៗនោះប្រពន្ធ និងកូនៗបង្កើត កូនប្រសា ក៏នាំគ្នាចាប់ប្តី ចាប់ឪពុកចងស្លាបសេកទៅក្រោយ ដោយប្រើខ្សែក្របី ។ បុរសជាឪពុកប្រឹងរើបម្រះយ៉ាងខ្លាំង ហើយស្រែកជេរគ្រូខ្មោចដោយខឹងសម្បា ។ គ្រូខ្មោចក៏បញ្ជាឱ្យកូនៗយកច្រវាក់មកចាក់សោជើងជាប់គល់ឈើទៀត ។ ដោយសារប្រពន្ធជឿស្លុងថា បុរសជាឪពុកជាអ្នកចិញ្ចឹមព្រាយដាក់ស្នេហ៍ ទើបចាប់ចងឱ្យគ្រូខ្មោចចាត់ការ។
គ្រូនោះបានយកធូបអុជ១ដៃធំ ភ្លើងធូបឆេះរងើកភ្លើងក្រហមច្រាល ហើយយកមកអុជលើឈ្មោះ ធន់ តឿង ជាកូនប្រសាដើម្បីដេញខ្មោច ដោយចាប់ឱ្យដេកផ្កាប់មុខរួចអុជខ្នង ដងខ្លួន ឆេះរលាករលួយអស់ និងស្រែកលាន់ឮកងរំពងឱ្យគេជួយ។ គ្រូខ្មោចប្រកាសថា ខ្មោចមិនចេញ ក៏ឱ្យទាញផ្ងារយកធូបទាំងបាច់អុជដុតរលួយអស់ដើមទ្រូង ដៃជើង ហើយស្រែកថា ចេញមិនចេញ ? ជនរងគ្រោះបានស្រែកថា ខ្ញុំចេញទៅណា ខ្ញុំមិនមែនព្រាយទេ គឺអាតឿងៗប្ដីនាងសាវាន ខ្ញុំមិនមែនខ្មោចព្រាយទេ ។ ពេលនោះគ្រូខ្មោចនិយាយថា ព្រាយក្បាល៨ នេះរឹងក្បាលណាស់មិនព្រមចេញទេ ស្រាប់តែគ្រូខ្មោចចាប់សម្រាតខោចេញហើយយកភ្លើងធូបអុជពងស្វាស ស្រែកឡើងញ័រផ្ទះ ហើយថាខ្មោចក្បាលរឹង ក៏យកភ្លើងធូប១ដៃដុតអុជលិង្គ និងអុជកំប៉េះគូទរហូតឈឺខ្លាំងពេកទ្រាំលែងបាន ក៏សន្លប់ឈឹងលែងស្រែកគ្រូប្រាប់ថា ខ្មោចចេញបាត់ហើយ ពេលដឹងខ្លួនយកទៅព្យាបាលដំបៅទៅ ។
រីឯបុរសជាឪពុកដែលជាប់ច្រវាក់ជើងហួសចិត្តសើច គ្រូខ្មោចថា យើសអើ ! ព្រាយនេះខ្លាំងណាស់ ។ លុះថ្ងៃទី៧ កញ្ញា វេលាម៉ោង៧ព្រឹក ក៏ឱ្យកូនស្រីឈ្មោះសំ វន្នី អាយុ១៩ឆ្នាំ ដែលធ្វើការរោងចក្រឱ្យគ្រូស្រោចទឹកឱ្យ ។ ពេលគ្រូខ្មោចស្រោចទឹកសូត្រផ្លុំ ស្រាប់តែកូនស្រី «សំ វន្នី» ញ័រខ្លួនតត្រាក់ដួលសន្លប់ស្តូក។ គ្រូនេះថា ខ្មោចចូលទៀតហើយ រួចនិយាយថា ត្រូវយកមួយ បើមិនចង់ឱ្យរូបស្លាប់ ត្រូវរកឆ្កែខ្មៅមកអារ.កយកឈាមប្តូរគ្នា ។ ពេលនោះកូនប្រុសម្នាក់ ក៏ដើររកឆ្កែខ្មៅឱ្យគ្រូខ្មោចអារ.កសម្រក់ឈាម ។ រីឯគ្រូខ្មោចចាប់ផ្តើមឱ្យនារីរងគ្រោះដោះអាវចេញយកសារុងមកស្លៀកចោមពុង រួចចាប់អុជភ្លើងធូប ឆេះពងបែករលួយខ្នង ហើយសួរចម្លើយ ។ ពេលនោះនារីរងគ្រោះជាកូននិយាយថា ឪម៉េចក៏ឱ្យគេធ្វើបាបកូន ម៉េចឪឯងឱ្យព្រាយក្បាល៨ ធ្វើបាបកូនឯងអញ្ចឹង ។
បុរសជាឪពុកហួសចិត្តក៏តបថា អញជាប់ច្រវាក់ អញឱ្យព្រាយធ្វើឯងយ៉ាងម៉េច ? គ្រូខ្មោចក៏អុចភ្លើងធូបពីមុខឆេះដើមទ្រូង ពោះ ហើយស្រែកថា ចេញឬមិនចេញ ។ នារីរងគ្រោះតបថា ទៅណា ខ្ញុំជាមនុស្ស ។ បុរសជាឪពុកអាណិតកូនដែលគេដុតទាំងរស់នៅពីមុខ ខ្លួនត្រូវគេចងស្លាបសេកទៅក្រោយ និងជើងជាប់ច្រវាក់ ក៏ប្រាប់កូនថា ឱ្យចេញតាមក្រោមទៅ ។ គ្រូខ្មោចក៏យកធូបអុជពីលើស្មាចុះមកក្រោម អុជខ្នងចង្កេះ អុជគូទធ្វើឱ្យនាងទ្រាំលែងបាន ឈឺចុកចាប់លេចនោមសន្លប់ឈឹងលែងស្រែក ហើយគ្រូខ្មោចប្រាប់ថា ខ្មោចចេញហើយ ។ នៅថ្ងៃទី៨ កញ្ញា វេលាម៉ោង៨ព្រឹក ឈ្មោះ តឿង ពេលដឹងខ្លួនវិញ គ្រូខ្មោចនិយាយទៀតថា បើមិនព្រមរុះផ្ទះចោល គេត្រូវយកជំរិតស្ត្រីជាប្រពន្ធ ។ ដោយជឿ ក៏ឱ្យអ្នកស្រុកជួយរុះរើផ្ទះចោល រួចនាំប្តីនិងប្អូនស្រីទៅព្យាបាលនៅមន្ទីរពេទ្យរហូតបានធូរស្រាល ។ រីឯបុរសជាឪពុកបានរើបម្រាស់ តែរើមិនរួច ក្រោយមកគ្រូខ្មោចត្បាញអាយឱ្យកូនៗបុកផ្លែស្ពឺ និងដើមត្រាវព្រៃលាយជាមួយទឹកដែលបោកខោលីអូចំនួន៧ សារុងចំនួន៧ រួចដាក់ក្នុងដប ហើយចាប់បញ្ច្រកឱ្យផឹកអស់មួយដប ដោយ១ម៉ោងចាប់ច្រក១ដបអស់ប្រមាណ៣ដប ។ រួចហើយយកខោលីអូទាំង៧ នោះឱ្យទួលពីលើក្បាល និងយកសារុងប្រពន្ធមកគ្របពីលើក្បាលដើម្បីឱ្យព្រាយចេញ ។
ពេលនោះដោយការឈឺចាប់នឹងការធ្វើបាបធ្ងន់ធ្ងរពេក បុរសនោះខំរើបម្រះរហូតរួចពីចំណងដៃ និងស្រាយច្រវាក់រត់ចេញ ។ នៅថ្ងៃទី៩ កញ្ញា វេលាម៉ោង៨ព្រឹក គ្រូខ្មោចក៏បានទារប្រាក់ទំនឹបចំនួន៥ជីមាស បុ៉ន្តែដោយសារក្រុមគ្រួសារជនរងគ្រោះគ្មាន ក៏សុំដាក់ទំនឹបគ្រូត្រឹម៣ជីមាស ទឹកសុទ្ធ៥ដប ធូប១ដុំ ប្រាក់៥ពាន់រៀល ។ ក្រោយទទួលបានមាសជាគ្រឿងទំនឹបហើយ គ្រូខ្មោចនោះទំនងឮថា ជនរងគ្រោះជាឪពុកទៅប្តឹងប៉ូលិស ក៏ដាក់មេប្រូចបាត់ ដោយគេមិនស្គាល់អត្តសញ្ញាណរស់នៅទីណាទេ។ ពេលប៉ូលិសសួរនាំ ទើបដឹងថាមិនដឹងមកពីណា ហើយបោកប្រជាពលរដ្ឋក្នុងសង្កាត់ព្រៃអង្គុញ និងសង្កាត់ច្រកម្ទេស យកប្រាក់ និងមាសអស់មិនតិចទេ គឺរាប់តម្លឹងឯណោះ ។
ឈ្មោះ សំ វៃ រៀបរាប់ថា ការពិតគាត់បានចិញ្ចឹមព្រាយក្បាល៨ ឱ្យមកចូលសណ្ឋិតជាង២ឆ្នាំមកហើយ គឺព្រាយក្បាល៨នោះមកសុំគាត់នៅជាមួយដោយសន្យាថា មិនធ្វើបាបប្រពន្ធកូន និងអ្នកភូមិទេ ហើយសន្យាឱ្យកម្លាំងធាតុគាត់ដោយផឹកស្រាមិនងាយស្រវឹង ហើយពេលមានរឿងអី ចាំគេប្រាប់ឱ្យដឹងមុន ។ ពិសេសនោះចេះដាក់ស្នេហ៍ឱ្យស្រីស្រឡាញ់ ទើបយល់ព្រមចិញ្ចឹមព្រាយក្បាល៨នោះ ហើយបានធ្វើខ្ទមតូចមួយនៅក្រោមដើមស្វាយក្រោយផ្ទះដើម្បីឱ្យព្រាយក្បាល៨នៅ ដោយព្រាយក្បាល៨ អាចទាក់ទងនិយាយគ្នាបាន បើមិនឱ្យធ្វើអ្វីព្រាយនេះមិនធ្វើដែរ ។ ពេលណាគាត់ (សំ វៃ) ត្រូវការមានប្តីប្រពន្ធគេមិនសូវចុះសម្រុងគ្នា បានហៅព្រាយក្បាល៨ ធ្វើស្នេហ៍ឱ្យត្រូវគ្នាវិញ ឬកម្លោះណាស្រទ្បាញ់នារីម្នាក់ ហើយនាងមិនស្រទ្បាញ់ ក៏អាចដាក់ស្នេហ៍ឱ្យស្រទ្បាញ់គ្នាជាប្តីប្រពន្ធបានដែរ ។ ក្រោយពេលប្រពន្ធកូនកាប់ដើមស្វាយ និងរុះតូបចោលឈ្មោះ សំ វៃ ប្រាប់ថា គាត់បាននាំព្រាយក្បាល៨ ទៅនៅឯរោងចក្រហើយ ។
រីឯប្រពន្ធឈ្មោះ ថោង សុផល អាយុ៥៦ឆ្នាំ ប្រាប់ថា តាំងពីប្តីចិញ្ចឹមព្រាយក្បាល៨ នៅផ្ទះមក រូបគាត់មានជំងឺទៅដេកពេទ្យរហូត គឺព្រាយប្រច័ណ្ឌធ្វើឱ្យឈឺ រីឯប្តីគាត់ (សំ វៃ) ទៅធ្វើការសន្តិសុខយាមពេលយប់មានស្រីថ្មីដល់ទៅ២នាក់ ដើរមិនដែលរវីរវល់ប្រពន្ធកូនទេ រស់នៅម្នាក់ឯងជាង២ឆ្នាំមកហើយ ទើបពេលមានគ្រូថា ចេះចាប់ខ្មោច ទើបហៅមកចាប់ខ្មោច មិននឹកស្មានថា ការពិតចាញ់បោកគ្រូខ្មោចអស់ទាំងប្រាក់ អស់ទាំងផ្ទះសម្បែង ។ ចំណែកកូនប្រសាប្រុស និងកូនស្រី វិះនឹងស្លាប់បាត់បង់ជីវិតដោយសារគ្រូបោករូបនេះ ។
គ្មាននរណាស្គាល់បុគ្គលដែលតាំងខ្លួនជាគ្រូចាប់ខ្មោចព្រាយបិសាចនោះទេ តែជននេះបានប្រើល្បិចមួយថា ខ្លួនចេះព្យាបាលមនុស្សគ ឱ្យនិយាយនៅភូមិព្រៃអង្គាញ់ និងដេកស៊ីព្យាបាល៣ថ្ងៃ ហើយក៏ត្រូវគេពឹងឱ្យមកចាប់ខ្មោច ។ ទោះបីជាបែបណា រឿងរ៉ាវទាំងអស់នេះ ដោយសារតែភាពល្ងង់ខ្លៅ ខ្វះការយល់ដឹង ងាយរងគ្រោះដោយជឿ និងងាយជនកំហូចបោកប្រាស់បាន ៕
ចែករំលែកព័តមាននេះ