អាជីវករប្រហែលជាដឹងច្បាស់ហើយថាដើម្បីជោគជ័យ ពួកគេត្រូវតែឈោងចាប់រាល់ឱកាសក្នុងការបង្កើត ឬរកផលិតផល និងបច្ចេកវិទ្យាថ្មីៗឲ្យបានមុនដៃគូប្រកួតប្រជែង ឬក្រុមហ៊ុនថ្មីៗយកបានមុន ។ ប៉ុន្តែឧបសគ្គធំសំខាន់ គឺការគិតឲ្យឃើញអ្វីដែលថ្មីៗដែលមនុស្សដទៃមិនទាន់គិតឃើញនៅឡើយ ។ ប៉ុន្តែដើម្បីដើរតាមទាន់ការផ្លាស់ប្តូរក្នុងទីផ្សារ និងចៀសវាងការដួលរលំព្រោះតែអាជីវកម្មអ្នកមិនផ្តោតសំខាន់លើការផ្លាស់ប្តូរ អ្នកគួរតែសាកល្បងយុទ្ធសាស្ត្រខាងក្រោមនេះ៖
១. ចៀសវាងរំពឹងលើឧទាហរណ៍ចាស់ៗ
ភាពច្នៃប្រឌិតរបស់មនុស្សភាគច្រើនត្រូវបានរាំងស្ទះដោយឧទាហរណ៍ ឬអ្វីៗដែលយើងបានរៀនសូត្រពីមុនមក ។ ប៉ុន្តែដើម្បីគិតឃើញអ្វីដែលថ្មី ពេលខ្លះអ្នកត្រូវបំភ្លេចថាក្នុងវិស័យរបស់អ្នកមានអ្វីខ្លះ ហើយអាជីវកម្មដទៃបានធ្វើអ្វីខ្លះហើយ ។
២. រក្សាភាពប្រញាប់ក្នុងការធ្វើអ្វីមួយ
អាជីវករភាគច្រើនតែងតែមានភាពស្វាហាប់ពេលដែលចាប់ផ្តើមអាជីវកម្មដំបូង ប៉ុន្តែវាផ្លាស់ប្តូរពេលដែលអាជីវកម្មលូតលាស់បានបន្តិច ។ ប៉ុន្តែដើម្បីបន្តជោគជ័យបន្ថែមទៀត អាជីវករត្រូវតែបន្តស្វាហាប់ និងសកម្មក្នុងការចាប់ផ្តើមគម្រោងការថ្មីៗជានិច្ច ។
៣. កុំអនុញ្ញាតឲ្យខ្លួនឯងគិតខ្លី
ក្នុងអាជីវកម្ម ពេលខ្លះអ្នកត្រូវបានបង្ខំឲ្យធ្វើការសម្រេចចិត្តដោយគិតពីលទ្ធផលរយៈពេលខ្លី ដោយមិនដឹងខ្លួនថាការសម្រេចចិត្តរបស់អ្នកអាចមានឥទ្ធិពលរយៈពេលវែងដែលប៉ះពាល់ដល់ឱកាសក្នុងការរកលុយនៅថ្ងៃមុខជាដើម ។ ដោយហេតុដូចនេះ អាជីវករត្រូវតែជំរុញឲ្យខ្លួនចាប់ផ្តើមគិតឲ្យបានវែងឆ្ងាយ និងធ្វើការសម្រេចចិត្តឲ្យបានប្រុងប្រយ័ត្ន ។
៤. តាមដានការផ្លាស់ប្តូរក្នុងទីផ្សារ និងសម្របខ្លួនឲ្យបានលឿនជានិច្ច
ពិភពលោកផ្លាស់ប្តូរស្ទើរតែជារៀងរាល់ថ្ងៃ ហើយអាជីវករត្រូវតែមានសមត្ថភាពក្នុងការសម្របខ្លួនទៅនឹងការផ្លាស់ប្តូរក្នុងវិស័យរបស់ខ្លួនដែរ ។ ដើម្បីធ្វើដូច្នេះបាន អាជីវករគួរតែមានទម្លាប់តាមដាន និងព្យាករណ៍ទុកនូវអ្វីដែលអាចនឹងកើតមានឡើងក្នុងទីផ្សារនៅថ្ងៃមុខ ៕ កែសម្រួលដោយ ៖ សុឃាក់
ចែករំលែកព័តមាននេះ