រាជធានីភ្នំពេញ ៖ ដើម្បីអភិវឌ្ឍន៍វិស័យទេសចរណ៍នៅកម្ពុជាសំដៅលើកកម្ពស់គុណភាពសេវាកម្ម ទេសចរណ៍ឱ្យកាន់តែល្អប្រសើរ មន្ទីរទេសចរណ៍សហការជាមួយរដ្ឋបាលខណ្ឌមានជ័យរៀបចំវគ្គបណ្តុះបណ្តាល និងផ្សព្វផ្សាយច្បាប់ស្តីពីទេសចរណ៍ និងបដិសណ្ឋារកិច្ចដល់ម្ចាស់ឬតំណាង អាជីវកម្ម សេវាកម្ម ទាំងអស់ក្នុងវិស័យទេសចរណ៍ ។
លោក គឹម ចាន់ណាវុធ អនុប្រធានមន្ទីរទេសចរណ៍រាជធានីភ្នំពេញបានលើកឡើងថា គោលបំណងនៃការបណ្តុះបណ្តាល និងផ្សព្វផ្សាយនេះ ដើម្បីពង្រីកការយកចិត្តទុកដាក់ខ្ពស់លើការងារ បដិសណ្ឋារកិច្ចស្វាគមន៍ភ្ញៀវទេសចរភាពរួសរាយរាក់ទាក់ព្រមទាំងពង្រឹងការអនុវត្តច្បាប់ស្តីពីទេសចរណ៍ និងបដិសណ្ឋារកិច្ចឱ្យកាន់តែប្រសើរឡើង និងប្រសិទ្ធភាពការចូលរួមសហការពីអាជ្ញាធរដែនដីសមត្ថកិច្ចគ្រប់លំដាប់ថ្នាក់ក្នុងការចូលរួមបំរើសេវាអនុវត្តនូវលិខិតបទដ្ឋាននានាដែលពាក់ព័ន្ធក្នុងការគ្រប់គ្រងអាជីវកម្មទេសចរណ៍ក្នុងរាជធានីភ្នំពេញ ។
លោកបញ្ជាក់ថា ភ្ញៀវចូលមកទស្សនារាជធានីភ្នំពេញ និងតំបន់ជុំវិញនាឆ្នាំ២០១៩ មានចំនួនជាង៤លាននាក់ កើនឡើង២២ភាគរយ បើធៀបនឹងឆ្នាំ២០១៨ ដូច្នេះដើម្បីត្រៀមទទួលភ្ញៀវជាតិ និងអន្តរជាតិនៅឆ្នាំនេះ និងឆ្នាំបន្តបន្ទាប់ គឺត្រូវធ្វើឱ្យរាជធានីភ្នំពេញក្លាយទៅជាគោលដៅទេសចរណ៍ប្រកបដោយភាពទាក់ទាញ និងផ្តល់ភាពកក់ក្តៅតាមរយៈការបង្កើតឱ្យមានផលិតផលទេចរណ៍ថ្មីៗភាពវ័យឆ្លាត ស្អាត បៃតង និងរក្សាសុខសុវត្ថិភាព គុណភាព ទេសចរណ៍ឱ្យល្អប្រសើរ ។
អ្វីដែលមិនអាចខ្វះបាន គឺការចូលរួមក្នុងការធ្វើបដិសណ្ឋារកិច្ច និងការអនុវត្តច្បាប់ស្តីពី ទេសចរណ៍របស់អ្នកពាក់ព័ន្ធក្នុងវិស័យនេះដូចជា សណ្ឋាគារ ផ្ទះសំណាក់ ភោជនីដ្ឋាន អាហាររដ្ឋាន បៀហ្គាឌិន ខារាអូឃេ និងកន្លែងកំសានានាជាដើម ។
លោក ឌី រ័ត្នខេមរុណ អភិបាលរងខណ្ឌមានជ័យបានលើកឡើងថា បច្ចុប្បន្នខណ្ឌមានជ័យ មានអាជីវកម្ម សេវាកម្មប្រមាណជា១០០ទីតាំងក្នុងនោះមានច្បាប់ប្រមាណ៩០ភាគរយ ហើយចំពោះមុខនេះមន្ត្រីជំនាញរបស់ខណ្ឌបាន និងកំពុងធ្វើបច្ចុប្បន្នភាព ដើម្បីពិនិត្យទៅលើទីតាំងមួយចំនួនដែលមិនមានច្បាប់ អនុញ្ញាតិ សម្រាប់អ្នកមានច្បាប់ហើយក៏ត្រូវពិនិត្យទៅលើសេវាកម្មថា តើមានអនាម័យ មានបរិស្ថានល្អដែរឬទេ ជាពិសេសសុវត្ថិភាពចំណីអាហារ មានគុណភាពស្តង់ដាដែរទេ និងការធ្វើបដិសណ្ឋារកិច្ចបានកម្រិតហើយ ។
លោកបានអំពាវនាវឱ្យម្ចាស់អាជីវកម្មសេវាកម្មទាំងអស់ត្រូវអនុវត្តតាមការណែនាំរបស់ក្រសួងទេសចរណ៍និង ក្រសួងស្ថាប័នពាក់ព័ន្ធក៏ដូចជា អាជ្ញាមានសមត្ថកិច្ច ដើម្បីធានាថា អាជីវកម្មលោកអ្នក បានផ្តល់នូវសុខសុវត្ថិភាព ជូន ភ្ញៀវ ទេសចរជាតិ និងអន្តរជាតិមួយវិញទៀតនឹងយកចំណេះដឹងដែលទទួលបាននៅពេលនេះទៅអនុវត្តឱ្យបានល្អ ដើម្បីនិរន្តរភាពអាជីវកម្ម ៕
ចែករំលែកព័តមាននេះ