ខេត្តបាត់ដំបង ៖ ក្រសួងវប្បធម៌ និងវិចិត្រសិល្បៈបានទម្លាក់ថវិកាចុះជួយជួសជុលព្រះវិហារវត្តខ្សាច់ពោយ ស្ថិតភូមិខ្សាច់ពោយ សង្កាត់វត្តគរ ក្រុង-ខេត្តបាត់ដំបងជាព្រះវិហារ ដែលបានបន្សល់ទុកមកមានអាយុកាល១៣០ឆ្នាំ ស្ថិតនៅតាមដងផ្លូវលេខ១៥៥ ពីក្រុងបាត់ដំបងឆ្ពោះទៅប្រាសាទបាណន់ ប្របតាមមាត់ស្ទឹងសង្កែប៉ែកខាងលើ ដែលជាបេតកភ័ណ្ឌចំណាស់មួយ ដែលគេមិនសូវចាប់អារម្មណ៍ ។
លោកគឹម សោភ័ណ ប្រធានមន្ទីរវប្បធម៌ និងវិចិត្រសិល្បៈខេត្តបាត់ដំបងបានបញ្ជាក់ប្រាប់ពុទ្ធបរិស័ទនៅពេញព្រឹកថ្ងៃទី២៩ ខែកុម្ភៈនេះ នៅក្នុងវត្តខ្សាច់ពោយថា ជារៀងរាល់ឆ្នាំថវិការបស់ក្រសួងដែលមានលោកជំទាវ ភឿក សកុណា ជារដ្ឋមន្ត្រី បានទម្លាក់ជួយជួសជុលវត្តអារាមប្រវត្តិសាស្ត្រ ដែលទ្រុឌទ្រោមបន្ទាប់ពីបានជួសជុលឡើងវិញនូវប្រាសាទបាសែត និងប្រាសាទឯកភ្នំពីការបែកបាក់បន្សល់ពីសង្គ្រាមកំពុងបន្តរួចមកពេលនេះដល់ពេលពិនិត្យមើលព្រះវិហារដែលមានពាក់ព័ន្ធប្រវត្តិសាស្ត្រចាស់ទ្រុឌទ្រោមពីព្រោះខេត្តបាត់ដំបងបានបន្សល់ប្រវត្តិសាស្ត្រយ៉ាងច្រើន ដែលភ្ញៀវទេសចរជាតិ និងអន្តរជាតិកំពុងស្វែងយល់មិនចេះអស់ តាមបែបធម្មជាតិឡើយនៅតំបន់នេះ ហើយជាការជួយលើកស្ទួយផ្នែកជីវភាពប្រជាពលរដ្ឋ ជំរុញ អូសទាញលើវិស័យទេសចរណ៍ និងរួមគ្នាថែររក្សាជំនឿរូបិយ និងអរូបីយដែលកំពុងមាននៅក្នុងប្រទេសកម្ពុជាយើងកុំឲ្យសាបរលាបបាត់បង់ទៅវិញ ។
ក្នុងនោះគណកម្មការ និងពុទ្ធបរិស័ទចំណុះវត្តខ្សាច់ពោយមានសេចក្តីត្រេកអរជាខ្លាំង ហើយបានលើកជាសំនួរអំពីតួនាទីប្រជាពលរដ្ឋនៅទីនេះ តើត្រូវជួយជាអ្វីខ្លះក្នុងការជួសជុលព្រះវិហារនេះ ?
លោកគឹម សោភ័ណបានឆ្លើយថា ថវិកាត្រូវចំណាយក្នុងការជួសជុលព្រះវិហារនេះ គឺជាថវិការដ្ឋដែលត្រូវចំណាយទាំងស្រុង បើពុទ្ធបរិស័ទ ឬសប្បុរសជនចង់រួមចំណែកជួយនោះ គឺគណកម្មការវត្តជាអ្នកទទួលដោយគ្មានបដិភាគ គឺចូលតាមសទ្ធាជ្រះថ្លា ដែលគណកម្មការត្រូវការបែងចែកទៅលើចំណុចខ្វះខាតផ្សេងៗដ៏ទៃៗទៀតដែលកំពុងមានដូច្នោះការរួមចំណែក គឺជាផលបុណ្យតាមកម្លាំងសទ្ធាជ្រះថ្លានៃបងប្អូនមានទាំងអស់គ្នា ៕
ចែករំលែកព័តមាននេះ