រាជធានីភ្នំពេញ ៖ មន្ត្រីជាន់ខ្ពស់ក្រសួងការងារ និងបណ្តុះបណ្តាលវិជ្ជាជីវៈបានបង្ហើបឱ្យដឹងនៅដើមខែមីនាខាងមុខនេះអាច និងមានរោងចក្រសហគ្រាសប្រមាណជិត២០០ប្រឈមកង្វះខាតនូវត្ថុធាតុដើមនៅក្នុងសង្វាក់ផលិតកម្មដែលប៉ះពាល់ដល់កម្មរប្រមាណ១៦ម៉ឺននាក់ ។ ការបង្ហាញតួលេខនេះធ្វើឱ្យសហជីពយល់ថា វាជាបញ្ហាធ្ងន់ធ្ងរមួយដែលមិនធ្លាប់គិតទៅដល់ ។
លោក ហេង សួរ រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈសន្និសីទសារព័ត៌មាន ស្ដីពី «វឌ្ឍនភាព និងទិសដៅបន្ដការងារបន្ដរបស់ក្រសួងការងារ» នាថ្ងៃទី២៧ ខែកុម្ភៈ ឆ្នាំ២០២០នេះថា « នៅដើមខែមីនាខាងមុខនេះ តាមការព្យការណ៍ និងវាយតម្លៃជាក់ស្តែង នៅក្នុងឥទ្ធិពលវីរុសកូរ៉ូណានេះ គឺយើងបានដឹងថា អាចនៅដើមខែ៣ (មីនា)ខាងមុខនេះ គឺអាចមានរោងចក្រសហគ្រាសជិត២០០ដែលប្រឈមកង្វះនូវវត្ថុធាតុដើម ហើយវាអាចប៉ះពាល់ទៅដល់កម្មករ និយោជិកក្នុងករណីអាក្រក់ខ្ទង់១៦ម៉ឺននាក់» ។
លោកលើកឡើងថា «យើងក៏បានដឹងដែរថា សង្វាក់ផលិតកម្មនៅប្រទេសចិនក៏ចាប់ផ្តើមដំណើរការហើយរាជរដ្ឋាភិបាលក៏បានខិតខំប្រើប្រាស់នូវគ្រប់មធ្យោបាយទាំងទំនាក់ទំនងជាមួយអ្នកបញ្ជាទិញ, រោងចក្រក៏ដូចកម្រិតរដ្ឋាភិបាលនិងរដ្ឋាភិបាល ធ្វើយ៉ាងម៉េចឱ្យរដ្ឋាភិបាលចិនផ្តល់អាទិភាពក្នុងផ្គត់ផ្គង់វត្ថុធាតុដើមនេះជូនមកប្រទេសកម្ពុជា ធ្វើម៉េចឱ្យរយៈពេលនៅកង្វះវត្ថុធាតុដើមនេះគឺមានរយៈពេលខ្លី»។
បើតាមលោករដ្ឋលេខាធិការ ការរំខាននៃសង្វាក់ផលិតកម្មនៅប្រទេសចិននេះ ពិតជាបានធ្វើឱ្យប៉ះពាល់ទៅដល់សង្វាក់ផលិតកម្មនៅក្នុងពិភពលោកទាំងមូល ជាពិសេសនៅក្នុងតំបន់អាស៊ីរបស់យើង សូម្បីតែនៅក្នុងប្រទេសជប៉ុន,កូរ៉េក៏គាត់បានផ្អាកសង្វាក់ផលិតកម្មមួយចំនួនដោយសារកង្វះនូវត្ថុធាតុដើមឬមួយផលិតផលពាក់កណ្តាលសម្រេចដែលទទួលយកពីប្រទេសចិន ។ ដោយឡែកនៅកម្ពុជាក៏ដូចជានៅតាមបណ្តាប្រទេសផលិតនូវសម្លៀកបំពាក់នេះក៏ប្រឈមនៅបញ្ហាកង្វះវត្ថុធាតុដើមនេះដូចគ្នា ។
លោក ហេង សួរ មានប្រសាសន៍ថា «តាមរយៈការខិតខំរបស់រាជរដ្ឋាភិបាលកម្ពុជានេះ គឺយើងសង្ឃឹមថា កម្ពុជានឹងមានអាទិភាពទទួលបាននូវវត្ថុធាតុដើមនេះមុនគេ ហើយក្នុងការព្យួរការងារដែលអាចកើតមានខ្លះ គឺមកដល់ពេលនេះ គឺក្រសួងបានដាក់នៅវិធានការយ៉ាងម៉ើងមាត់ចំពោះគ្រប់មន្ទីររាជធានី ខេត្តក៏ដូចជា នាយកដ្ឋានអធិការកិច្ច ធ្វើការប្រាស្រ័យទាក់ទងយ៉ាងកៀកជាមួយខាងសមាគមរោងចក្រកាត់ដេរនៅកម្ពុជាក៏ដូចជា ម្ចាស់រោងចក្រកាត់ដេរ ហើយនឹងស្បែកជើងទាំងអស់អំពីស្ថានភាពស្តុករបស់រោងចក្រនីមួយៗ» ។
លោកសង្កត់ធ្ងន់ថា«តាមភាពជាក់ស្តែង គឺគិតត្រឹមព្រឹកមិញនេះ គឺមានរោងចក្រចំនួន១០បានចាប់ផ្តើមស្នើព្យួរការងារផ្នែកខ្លះនៃសង្វាក់ផលិតកម្ម បើគិតជា កម្មករតាមផ្នែកមានប្រហែលជា៣ពាន់នាក់ទេ ។តាមរយៈតួលេខដែលយើងមាននេះយើងកំពុងសម្របសម្រួល ដើម្បីធ្វើម៉េចឱ្យរោងចក្រទាំងនោះធ្វើការដោះស្រាយប្រាក់បៀរវត្ស និងអត្ថប្រយោជន៍ផ្សេងៗជូនដល់កម្មករនិយោជិកដែលបានព្យួរនោះឱ្យស្របទៅតាមអនុសាសន៍របស់សម្តេច ហើយក្រសួងក៏បានរៀបចំចាត់ចែងមនុស្សធ្វើការទំនាក់ទំនង ដើម្បីចុះឈ្មោះអ្នកដែលត្រូវព្យួរការងារនោះចូលរៀនវគ្គមុខជំនាញទន់ ដើម្បីទទួលបានប្រាក់ឧបត្ថម្ភបន្ថែមពីរាជរដ្ឋាភិបាល» ។
លោក អាត ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជាមានប្រសាសន៍ថា «ខ្ញុំគិតថា តាមតួលេខដែលក្រសួងបានបង្ហាញដែលមានរោងចក្ររហូតដល់ជិត២០០ ហើយអាចប៉ះពាល់កម្មរ១៦ម៉ឺននាក់នេះ វាជាបញ្ហាធ្ងន់ធ្ងរ ដែលយើងមិនគិតស្មានដល់ថា ជាបញ្ហាធំបែបនេះទេ ។ ពួកគេទាំងនេះសុទ្ធតែជាអ្នកមានបញ្ហាហើយបើសិនគេជួបវិបត្តិការងារហ្មឹង គេនឹងមានការលំបាកក្នុងការរកប្រាក់ចំណូលមកផ្គត់ផ្គង់គ្រួសារពួកគេ» ។
លោក ហ៊ឹម ជីវន កម្មករធ្វើការនៅរោងចក្រសៅលែនផលិតមួកនិង ខោអាវនៅក្រុងភ្នំពេញបានឱ្យដឹងថា នៅពេលទទួលបានព័ត៌មានភ្លាមៗបែបនេះ ខ្ញុំយល់ឃើញថា វាមានហានិភ័យចំពោះកម្មករផ្សេងទៀតក៏ដូចជា រូបខ្ញុំ ។ កម្មករយើងតាមការព្យាករណ៍មើលទៅប្រហែល៨០ទៅ៩០%ជំពាក់បំណុលធនាគារ កាលណាត្រូវបានផ្អាកឬព្យួរការងារវានឹងប៉ះពាល់ខ្លាំងមែនទែនសម្រាប់ការផ្តត់ផ្គង់ថ្លៃផ្ទះ បង់ប្រាក់ឱ្យធនាគាររួមនិងការហូបចុករបស់ពួកគាត់ ហើយគាត់មិនដឹងថាទៅបានការងារមកពីណាបានធ្វើដើម្បីយកលុយយកមកបង់ធនាគារ» ៕
ចែករំលែកព័តមាននេះ