ប្រទេសកូរ៉េខាងត្បូង ៖ យោងតាមYONHAPថា អាជ្ញាធរសុខាភិបាលកូរ៉េខាងត្បូងអះអាងនាថ្ងៃទី២៧កុម្ភៈ ពីអ្នកឆ្លងវីរុសCOVID-19ថ្មី ក្នុងប្រទេស៣៣៤នាក់ទៀតនាំឲ្យចំនួនអ្នកឆ្លងសរុប ក្នុងប្រទេសនេះឡើងដល់១.៥៩៥នាក់ ទល់នឹងតែ៥១នាក់ប៉ុណ្ណោះកាលពី១សប្ដាហ៍មុន។ រហូតមកទល់ពេលនេះមនុស្ស១៣នាក់ហើយបាត់បង់ជីវិតដោយសារវីរុសនេះក្នុងប្រទេស។
ចំនួនអ្នកឆ្លងថ្មីនឹងមានការកើនឡើងនាប៉ុន្មានថ្ងៃខាងមុខទៀត ខណៈអាជ្ញាធរសុខាភិបាលចាប់ផ្ដើមធ្វើតេស្ត សមាជិកក្រុមសាសនាមួយប្រមាណជា១.៣០០នាក់ ក្នុងចំណោមសមាជិកប្រមាណជា៩.០០០នាក់របស់ក្រុមសាសនានោះនៅក្រុង DAEGU។ នៅព្រះវិហារគ្រឹស្តMYUNGSUNG ក្រុងសេអ៊ូលដែលមានសាសនិក៨០.០០០នាក់ មានការបាញ់ថ្នាំសម្លាប់មេរោគ ក្រោយពីគ្រូប្រដៅសាសនាម្នាក់ធ្វើតេស្តឃើញវីរុស។
ដោយសារការឆ្លងរាលដាលកាន់តែខ្លាំងនៃវីរុសCOVID-19នោះ នាំឲ្យសហរដ្ឋអាមេរិកនិងកូរ៉េខាងត្បូងពន្យារពេលសមយុទ្ធយោធារួមប្រចាំឆ្នាំ ដែលគ្រោងធ្វើក្នុងខែមីនាខាងមុខនេះ។ ទាហានអាមេរិកម្នាក់នៅកូរ៉េខាងត្បូង ត្រូវបានរកឃើញឆ្លងវីរុស ក៏ដូចជាទាហានកូរ៉េខាងត្បូងជាច្រើននាក់។
ប្រមាណជា៨០%នៃអ្នកឆ្លងវីរុសCOVID-19នៅកូរ៉េខាងត្បូង មកពីប្រភពឆ្លង២គឺប្រភពមួយចេញពីសាខានៃអង្គការសាសនាគ្រឹស្តមូយ ស្ថិតនៅក្រុងDAEGUចម្ងាយ៣០០គីឡូម៉ែត្រភាគអាគ្នេយ៍ក្រុងសេអ៊ូល ហើយប្រភពមួយទៀតចេញពីមន្ទីរពេទ្យមួយនៃទីក្រុងCHEONGDO។ អ្នកឆ្លងថ្មីភាគច្រើនបំផុតគឹក្នុងទីក្រុងDAEGUនិងខេត្តGYEONGSANGខាងជើង។ ជាមួយការលេចចេញការឆ្លងក្នុងទីក្រុងធំៗដទៃទៀតរបស់ប្រទេស ក្នុងនោះមានក្រុងប៊ូសាននិងក្រុងសេអ៊ូល ការព្រួយបារម្ភមានកាន់តែខ្លាំង ចំពោះកន្លែងជាប្រភពចម្លងថ្មីៗទៀត។
យោងតាមលោកJUN BYUNG-YOOL សាស្ត្រាចារ្យខាងវេជ្ជសាស្ត្របង្ការនៃសាលាវេជ្ជសាស្ត្រជាន់ខ្ពស់ របស់សាកលវិទ្យាល័យCHA UNIVERSITYថា វីរុសCOVID-19ឆ្លងរាលដានដ៏រហ័សជាងវីរុសគ្រុនផ្ដាសាយជ្រូកH1N1កាលពីឆ្នាំ២០០៩ទៅទៀត។ វីរុសនោះឆ្លងក្នុងស្រុករយៈពេលប្រមាណតែ៧០ថ្ងៃក្រោយការឆ្លងដំបូង។
រហូតមកដល់ថ្ងៃទី២៦កុម្ភៈកូរ៉េខាងត្បូងមានអ្នកជំងឺ២៤នាក់បានជាសះស្បើយចាកចេញពីមន្ទីរពេទ្យ៕ ដកស្រង់ចេញពីវេបសាយ ៖ yna (កែសម្រួលដោយ ៖ បុប្ផា)
ចែករំលែកព័តមាននេះ