និស្សិតជាច្រើនរូបចូលចិត្តរអ៊ូរទាំពីការដែលសាកលវិទ្យាល័យមិនផ្តល់នូវចំណេះដឹង និងជំនាញជាក់ស្តែងដែលមានពិតដែលពួកគេអាចប្រើប្រាស់បានពេលដែលចូលក្នុងស្ថាប័នការងារ ប៉ុន្តែបញ្ហា គឺមិនត្រឹមតែធ្លាក់លើសាកលវិទ្យាល័យទេ តែក៏មកពីនិស្សិតមិនដឹងពីអ្វីដែលខ្លួនគួរយកចិត្តទុកដាក់លើជាងគេដែរ ។
ក្រៅពីសកម្មភាពក្រៅម៉ោងផ្សេងៗដូចជាការងារស្ម័គ្រចិត្តហើយ បរិស្ថាននៅសាកលវិទ្យាល័យអាចជំរុញនូវការអភិវឌ្ឍន៍បានជាគុណសម្បត្តិជាច្រើនដែលមានអត្ថប្រយោជន៍សម្រាប់និស្សិតពេលដែលពួកគេចូលក្នុងស្ថាប័នការងារ ។ គុណសម្បត្តិទាំងនោះមានដូចជា៖
១. ការប្រាស្រ័យទាក់ទងគ្នា
សាកលវិទ្យាល័យជាកន្លែងដែលនិស្សិតអាចប្រាស្រ័យទាក់ទងជាមួយមនុស្សដែលមកពីវណ្ណៈ និងស្ថានការខុសៗគ្នាដែលជួយដល់ពួកគេក្នុងការរៀនសម្របខ្លួនទៅនឹងបរិស្ថានការងារដែលមានភាពចម្រុះទៅៗនៅថ្ងៃអនាគត ។
លើសពីនេះទៅទៀត មធ្យោបាយបង្រៀននៅកម្រិតនេះជំរុញឲ្យនិស្សិតរៀនចេះឯករាជ្យភាពដែលជួយឲ្យពួកគេចេះគ្រប់គ្រងជីវិតដោយខ្លួនឯងនិងដោះស្រាយបញ្ហាដោយខ្លួនឯងផងដែរ ។
២. ភាពចាស់ទុំ
សាកលវិទ្យាល័យអាចពង្រឹងភាពចាស់ទុំរបស់និស្សិតដែលចាំបាច់ក្នុងស្ថាប័នការងារគ្រប់វិស័យ ។ ក្រៅពីភាពជឿជាក់ហើយ និស្សិតត្រូវតែមានភាពចាស់ទុំ និងមានទំនួលខុសត្រូវដើម្បីបន្តសម្រេចកិច្ចការ ទំនាក់ទំនងជាមួយអ្នកដទៃ និងដោះស្រាយបញ្ហាដែលចាំបាច់ផងដែរ ។កិច្ចការដែលនិស្សិតត្រូវសម្រេចក្នុងកម្រិតសិក្សានេះមានច្រើននិងពិបាកជាងនៅវិទ្យាល័យ ដែលតម្រូវឲ្យពួកគេរៀនចេះជំនាញគ្រប់គ្រង ការធ្វើការជាក្រុម ការទំនាក់ទំនង និងភាពជាអ្នកដឹកនាំជាដើម ។
៣. សមត្ថភាពក្នុងការចែករំលែកគំនិត
តាមរយៈការចូលរួមក្នុងកិច្ចការក្នុងថ្នាក់ ការពិភាក្សា និងសកម្មភាពក្រៅថ្នាក់ដទៃ និស្សិតមានឱកាសជាច្រើនក្នុងការចែករំលែកគំនិតជាមួយនឹងមិត្តរួមថ្នាក់ដទៃ និងសាស្ត្រាចារ្យដែលមានវត្តមានក្នុងថ្នាក់ផងដែរ ។ ជាលទ្ធផល ពួកគេរៀនចេះការធ្វើបទបង្ហាញនិងចែករំលែកគំនិតក្នុងស្ថាប័នការងារដែរ ៕ កែសម្រួលដោយ ៖ សុឃាក់
ចែករំលែកព័តមាននេះ