រាជធានីភ្នំពេញ ៖ រោងចក្រផលិតបារីមួយកន្លែងនៅជិតវត្តព្រៃស្ពឺ ត្រូវបានអគ្គិភ័យលេបត្របាក់អស់ទាំងស្រុង បង្កឲ្យមានការភ្ញាក់ផ្អើលដល់ប្រជាពលរដ្ឋដែលមានលំនៅដ្ឋានក្បែរកន្លែងកើតហេតុរត់ចែកជើងគ្នាកាលពីវេលាម៉ោង១រំលងអធ្រាត្រឈានចូលថ្ងៃទី២៧ ខែកុម្ភៈ ឆ្នាំ២០២០ នៅចំណុចរោងចក្រផលិតបារី ស្ថិតក្នុងភូមិស្រែជម្រៅ សង្កាត់ចោមចៅទី២ ខណ្ឌពោធិ៍សែនជ័យ ។
តាមប្រភពព័ត៌មានពីសន្តិសុខយាមនៅរោងចក្រខាងលើបាននិយាយប្រាប់ថា រោងចក្រផលិតបារីនេះបានផ្អាកដំណើរការរយៈពេលជាង១ខែមកហើយ តែមានកម្មករនៅសំរាក ក្នុងរោងចក្រខាងលើនេះជាង២០នាក់ ។
តាមប្រភពដដែលបានបន្តថា មុនពេលកើតហេតុ កម្មករកំពុងតែដេក ស្រាប់តែមានអណ្តាតភ្លើងឆេះយ៉ាងសន្ធោសន្ធៅ ភ្លាមនោះក្រុមកម្មករនៅសំរាកក្នុងរោងចក្របាននាំគ្នាយកបំពង់ពន្លត់អគ្គិភ័យមកបាញ់ពន្លត់អស់ជាង១០បំពង់ហើយ តែអណ្តាតភ្លើងមិនបានថម ថយនោះទេ នៅតែបន្តឆេះទៀត ទើបប្រជាពលរដ្ឋរាយការណ៍ទៅសមត្ថកិច្ចហៅរថយន្តពន្លត់អគ្គីភ័យមកជួយបាញ់ទឹកពន្លត់ភ្លាមៗ ប៉ុន្តែអណ្តាតភ្លើងឆាបឆេះខ្លាំងពេក រថយន្តពន្លត់អគ្គីភ័យបាញ់ពន្លត់មិនរលត់នោះទេ គ្រាន់តែទប់ស្កាត់កុំអោយឆាបឆេះរាលដាលដល់ផ្ទះប្រជាពលរដ្ឋរស់នៅជិតកន្លែងកើតហេតុ ធ្វើឲ្យប្រជាពលរដ្ឋរស់នៅជិតកន្លែងកើតហេតុ មានការភិតភ័យបាននាំគ្នាប្រមូលអីវ៉ាន់ចេញពីផ្ទះជួលខ្លាចអណ្តាតភ្លើងឆាបឆេះមកដល់ ។
ក្នុងហេតុការណ៍អគ្គីភ័យនេះដែរមានវត្តមានរបស់អភិបាលរាជធានីភ្នំពេញ អភិបាលខណ្ឌ ពោធិ៍សែនជ័យ បានចុះមកជួយសម្របសម្រួលនៅកន្លែងកើតហេតុផងដែរ ។
អគ្គិភ័យឆេះឆាបរោងចក្រផលិតបារីខាងលើនេះបណ្តាលឱ្យបាក់អគារមួយទាំងស្រុង នៅសល់តែជញ្ជាំងបន្តិចបន្តួចប៉ុណ្ណោះ ចំពោះមូលហេតុ សមត្ថកិច្ចមិនទាន់ដឹងនៅឡើយទេ ហើយមានអ្នករងរបួស ឬក៏អត់នោះ ក៏មិនទាន់ដឹងដែរ។
ក្នុងហេតុការណ៍ខាងលើនេះ សមត្ថកិច្ចបានប្រើប្រាស់រថយន្តពន្លត់អគ្គីភ័យជាច្រើនគ្រឿងនៅមិនទាន់ដឹងថាអស់ប៉ុន្មានគ្រឿងនោះទេ ដោយហេតុថាអគ្គីភ័យឆេះតាំងពីម៉ោង១រំលងអធ្រាត្រ រហូតមកដល់ព្រឹកថ្ងៃទី២៧ កុម្ភៈ នេះ អណ្តាតភ្លើងនៅមិនទាន់រលត់នៅឡើយទេ ហើយរថយន្តពន្លត់អគ្គីភ័យនៅតែបន្តបាញ់ទឹកនៅឡើយទេ ៕ (កែសម្រួលដោយ ៖ ធីតា)
ចែករំលែកព័តមាននេះ