ខេត្តបាត់ដំបង ៖ ក្រសួងទេសចរណ៍នឹងរៀបចំពីធីបុណ្យទន្លេលើកទី៦ នៅខេត្តបាត់ដំបង ចាប់ពីថ្ងៃទី១៣ដល់១៥ ខែមីនា ឆ្នាំ២០២០ ក្រោមប្រធានបទ «ទន្លេនៃសន្ដិភាព ទន្លេនៃវិបុលភាព» ដោយទទួលបានការអនុញ្ញាតពីរាជរដ្ឋាភិបាលកម្ពុជាផងដែរ។ នេះបើយោងតាមផេកក្រសួងទេសចរណ៍ចេញផ្សាយមុននេះ ។
នាឱកាសទៀត ទស្សនាកម្សាន្តពិធីបុណ្យខាងលើនេះ ភ្ញៀវទេសចរ និងប្រជាពលរដ្ឋច្បាស់ជាឆ្ងល់ហើយថា បុណ្យទន្លេឆ្នាំនេះមានអ្វីប្លែកខ្លះ មានរៀបចំពិធីអ្វីខ្លះ ហើយអាចបន្តទៅលេងនៅតាមរមណីយដ្ឋានទេសចរណ៍ណាខ្លះទៀត ?
ចម្ងល់នេះ ត្រូវបានលោក ជួន ជ័យសត្យា ប្រធាននាយកដ្ឋានជំរុញទេសចរណ៍ក្នុងស្រុក និងអប់រំការយល់ដឹងជាសាធារណៈនៃក្រសួងទេសចរណ៍ពន្យល់យ៉ាងដូច្នេះថា ពិធីបុណ្យទន្លេរយៈពេល៣ថ្ងៃខាងមុខនេះ មានសម្មភាពកម្សាន្តជាច្រើនដូចជា កីឡាប្រណាំងកង់ រត់ប្រណាំង Run For Fun កីឡាប្រដាល់ លក្ខណអន្តរជាតិដណ្តើមខ្សែក្រវាត់ និងកីឡាមួយចំនួនទៀត ការសម្តែងទស្សនីយភាពសិល្បៈដែលមានការចូលរួមពីសិល្បករ-សិល្បការីជាតិ និងអន្តរជាតិ និងការតាំងពិព័រណ៍ផលិតផលក្នុងស្រុក និងបរទេស និងមហោស្របម្ហូបអាហារជាដើម ។
លោកបានបន្ថែមទៀតថា ក្រៅពីសកម្មភាពទាំងអស់ក្នុងពិធីបុណ្យទន្លេនេះ គោលដៅទេសចរណ៍ជាច្រើននៅខេត្តបាត់ដំបង បានតៀមខ្លួនរួចរាល់សម្រាប់ទទួលប្រជាពលរដ្ឋ ដែលក្នុងនោះមានដូចជារៀបចំគោលដៅទេសចរណ៍នានាជុំវិញខេត្ត ពិសេសតំបន់អគារបេតិកភណ្ឌក្នុងក្រុងបាត់ដំបង ភ្នំសំពៅ ភ្នំបាណន់ និងជិះឡូរីកម្សាន្ដតាមជើងភ្នំ រូងប្រចៀវ តំបន់ទេសចរណ៍ប្រវត្តិសាស្ត្រ ដូចជា ប្រាសាទឯកភ្នំ សហគមន៍ទេសចរណ៍មួយចំនួនទៀត ។
លោកជួន ជ័យសត្យា បានសំណូមពរឱ្យប្រជាពលរដ្ឋ និងភ្ញៀវទេសចរទាំងអស់ចូលរួមក្នុងពិធីបុណ្យទន្លេឱ្យបានច្រើនកុះករ និងធ្វើដំណើរកម្សាន្តប្រកបដោយសុវត្ថិភាពក៏ដូចជា ចូលរួមថែរក្សាអនាម័យ បរិស្ថានឱ្យមានល្អ ។
សូមជម្រាបថា ពិធីបើកព្រឹត្តិការណ៍បុណ្យទន្លេឆ្នាំនេះនឹងប្រារព្ធឡើងក្រោមអធិបតីភាពសម្តេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ តំណាងសម្តេចតេជោ ហ៊ុន សែន និងសម្តេចកិតិ្តព្រឹទ្ធបណ្ឌិត ៕ កែសម្រួលដោយ ៖ សុឃាក់
ចែករំលែកព័តមាននេះ