រាជធានីភ្នំពេញ ៖ សម្តេចតេជោ ហ៊ុនសែន នាយករដ្ឋមន្ត្រីបានបញ្ជាក់ឲ្យម្ចាស់សណ្ឋាគារ និងផ្ទះសំណាក់ នៅខេត្តសៀមរាប ដែលបានចុះបញ្ជីមិនបាច់បង់ប្រាក់ប្រចាំខែ ក្នុងរយៈពេល៤ខែ ។ សម្តេចតេជោ បានថ្លែងក្នុងសន្និសីទសារព័ត៌មាន ព្រឹកថ្ងៃទី២៤ ខែកុម្ភៈនេះ នៅវិមាន។
ជាក់ស្តែងនៅក្នុងខែកុម្ភៈ ឆ្នាំ២០២០ ភ្ញៀវទេសចរបរទេសបានចូលមកកម្ពុជាបានធ្លាក់ចុះប្រមាណជាង៦០ភាគរយ ពិសេសនោះភ្ញៀវទេចរជនជាតិចិន បានធ្លាក់ចុះក្នុងរង្វង់ជាង៩០ភាគរយ ។ សម្តេចបានបន្ថែមថា បញ្ហាជំងឺនេះបានធ្វើឲ្យអាជីវកម្មនៅក្នុងខេត្តសៀមរាបទទួលនូវផលប៉ះពាល់យ៉ាងខ្លាំង ។ សកម្មភាពទេសចរណ៍នៅតំបន់ដទៃទៀត ស្ថិតក្នុងកម្រិត សមរម្យ ។ វិធានការដែលរាជរដ្ឋាភិបាលដាក់ចេញនោះ ស្ថិតក្នុងគោលបំណងធ្វើយ៉ាងជួយដល់អាជីវកម្មទេសចរណ៍នៅក្នុងខេត្តសៀមរាប ក្នុងនោះ គឺសណ្ឋាគារ និងផ្ទះសំណាក់អាចបន្តអាជីវកម្មរបស់ខ្លួនបានក្នុងការបន្តការងារជួនដល់កម្មករ ពិសេសនោះមានភាពខ្លាំងជាងមុននៅពេលជំងឺកូវីដបញ្ចប់ ។
សម្តេចលើកឡើកទៀតថា ការជំរុញវិស័យទេសចរណ៍នៅខេត្តសៀបរាមនេះក៏សំដៅធ្វើយ៉ាងឲ្យមានការបណ្តុះបណ្តាល ដើម្បីឲ្យកម្មករមានឱកាសចាប់យកជំនាញថ្មី ឬមានលទ្ធភាពទទួបលបានការល្អជាមុន ។ សម្តេចបន្ថែមទៀតថា លើសពីនេះរាជរដ្ឋាភិបាលបានវិធានការ និងសម្រេចលើកលែងបង់ពន្ធប្រចាំខែ គ្រប់ប្រភេទរបស់ម្ចាស់សណ្ឋាគារ និងផ្ទះសំណាក់ដែលបានចុះបញ្ជីនៅអគ្គនាយកដ្ឋានពន្ធដា និងមានសកម្មភាពធ្វើអាជីវកម្មសម្រាប់រយៈពេល៤ខែ ចាប់ពីខែកុម្ភៈ ដល់ខែឧសភា ឆ្នាំ២០២០ ។
អាជីវកម្មសណ្ឋាគារ និងផ្ទះសំណាក់នៅតែមានសិទ្ធិដាក់លិខិត ប្រកាសពន្ធអាកររបស់ខ្លួន និងប្រើប្រាស់ប្រព័ន្ធអនឡាញសម្រាប់គ្រប់អាជីវកលើតម្លៃបន្ថែមជារៀងរាល់ខែ ក្នុងរយៈពេលលើកលែងពន្ធ ។ សម្តេចតេជោក៏បានគូសបញ្ជាក់ថា ការលើកលែងយកពន្ធនេះ គឺរដ្ឋជាអ្នកបង់ពន្ធជំនួសវិញ ។ សម្តេចថា ៖«យើងធ្លាប់បង់ពន្ធហើយ យើងមិនអាចហៅថា លើកលែងនោះទេ តែដើម្បីងាយស្តាប់ប្រើពាក្យលើកលែងបង់ពន្ធ តែរដ្ឋបង់ពន្ធជំនួស ។ យើងធ្វើមិនទូទៅនោះទេ គឺធ្វើតែនៅខេត្តសៀបរាមតែប៉ុណ្ណោះ ព្រោះជាខេត្តមួយដែលធ្លាប់មានភ្ញៀវទេសចរទៅលេងទៅនោះច្រើន តែពេលនេះធ្លាក់ចុះ» ។
ជាមួយគ្នានោះដែរ សម្តេចតេជោបានអះអាងថា មិនធ្វើសវនកម្មពេញលេញសម្រាប់ការបរិច្ឆេទឆ្នាំ២០២០ ចំពោះសហគ្រាសក្នុងវិស័យសណ្ឋាគារ និងផ្ទះសំណាក់ដែលបានចុះបញ្ជីនៅពន្ធដា និងសកម្មភាពអាជីវកម្មនៅក្នុងខេត្តសៀបរាមនោះទេ ៕
ចែករំលែកព័តមាននេះ