ខេត្តស្វាយរៀង ៖ បើតាមសេចក្តីរាយការណ៍បឋមបានឱ្យដឹងថា អណ្តាតភ្លើងបានឆាបឆេះជញ្ជ្រាំងនៅក្នុងវាលស្រែយ៉ាងសន្ធោសន្ធៅអស់រាប់សិបហិកតា ហើយកំពុងតែឆេះរាលទៅរកព្រៃ និងផ្ទះអ្នកស្រុកគួរឲ្យព្រួយបារម្ភ ។ ហើយត្រូវបានសមត្ថកិច្ច និងប្រជាពលរដ្ឋនាំគ្នាទៅពន្លត់ភ្លើងដែរ ក៏ប៉ុន្តែមិនអាចពន្លត់បាន ក៏ទូរស័ព្ទហៅរថយន្តពន្លត់អគ្គិភ័យមកជួយអន្តរាគមន៍តែម្តង។
សេចក្តីរាយការណ៍បន្តថា ហេតុការណ៍ខាងលើនេះបានកើតឡើងកាលពីម៉ោង១និង៥៩នាទីរសៀល ថ្ងៃទី២៣ ខែកុម្ភៈ ឆ្នាំ២០២០ ស្ថិតនៅភូមិព្រៃផ្អាវ ឃុំសំឡី ស្រុកកំពង់រោទ៍ខេត្តស្វាយរៀង ។
សេចក្តីរាយការណ៍បន្តទៀតថា ពាក់ព័ន្ធនឹងករណីភ្លើងឆាបឆេះជញ្ជ្រាំងក្នុងវាលស្រែខាងលើនេះ សមត្ថកិច្ចដាក់ការសង្ស័យថា ប្រហែលជាមានក្មេងដុតភ្លើងលេង ទើបបង្កឲ្យភ្លើងឆាបឆេះរាលដាលតែម្តង។ ។
ប្រភពដដែលបន្តថា ហើយដោយសារតែអាកាសធាតុកំដៅក្តៅខ្លាំង ធ្វើឲ្យស្មៅងាប់ និងជញ្ជ្រាំងស្ងួតខ្លាំង ទើបខណៈពេលដែលមានភ្លើងឆេះ ហើយមានខ្យល់ផងនោះ បង្កឲ្យភ្លើងឆាបឆេះលឿន ពិបាកក្នុងការគ្រប់គ្រង និងពន្លត់។
ពាក់ព័ន្ធនឹងករណីមានភ្លើងឆេះអស់រាប់សិបហិកតាគួរឲ្យព្រួយបារម្ភនេះ សូមឲ្យបងប្អូនប្រជាពលរដ្ឋចូលរួមប្រុងប្រយ័ត្នទាំងអស់គ្នា៕ (កែសម្រួលដោយ ៖ បុប្ផា)
ចែករំលែកព័តមាននេះ