ខេត្តបាត់ដំបង ៖ បើតាមសេចក្តីរាយការណ៍បឋមបានឱ្យដឹងថា ជនសង្ស័យម្នាក់បានរត់គេចខ្លួនបាត់ភ្លាមៗ ក្រោយពីធ្វើសកម្មភាពដោយជិះកង់ចូលទៅចាក់ស្ត្រីម្នាក់ដែលកំពុងដេកក្នុងផ្ទះបណ្ដាលឱ្យរងរបួសធ្ងន់ រួចប្លន់យកកាបូបលុយមួយ បង្កឱ្យមានការភ្ញាក់ផ្អើលកាលពីម៉ោង៦និង១៥នាទីព្រឹក ថ្ងៃទី២៣ ខែកុម្ភ: ឆ្នាំ២០២០ នៅចំណុចភូមិអូរតាគាំ១ សង្កាត់ទូលតាឯក ។
សេចក្តីរាយការណ៍បន្តថា ភ្លាមៗនោះ គេមិនទាន់ស្គាល់អត្តសញ្ញាណជនសង្ស័យនោះទេ តែជននេះ បានជិះកង់កញ្ចាស់១គ្រឿងទៅឈប់ក្បែរផ្ទះស្ត្រីរងគ្រោះ រួចលូនចូលតាមទ្វារមុខសម្រុកចូលទៅចាក់ស្ត្រីរងគ្រោះដែលកំពុងដេកម្នាក់ឯងនៅក្នុងបន្ទប់ បណ្ដាលឱ្យរងរបួសជាច្រើនកន្លែងយ៉ាងធ្ងន់ធ្ងរ។
បើតាមលោកឆាង វណ្ណឆៃ អធិការក្រុងបាត់ដំបង ប្រាប់ថា ស្ត្រីរងគ្រោះខាងលើឈ្មោះ យ៉ាន់ គឹមយៀត អាយុ៥៦ឆ្នាំ។ ហើយជនរងគ្រោះទំនងអាចរបួសធ្ងន់ នេះបើតាមការបំភ្លឺពីក្រុមគ្រួសារ។ លោកអធិការបញ្ជាក់ថា ជនដៃដល់បានលូនចូលតាមទ្វារមុខសម្រុកចូលក្នុងផ្ទះ រួចធ្វើសកម្មភាពតែម្ដង។
បើតាមការបំភ្លឺនានាបានឱ្យដឹងថា ជនដៃដល់បានប្រើប្រាស់កូនកាំបិតចាក់ទៅលើជនរងគ្រោះ រួចដណ្ដើមកាបូបចំនួន២ តែកាបូបមួយត្រូវបានទម្លាក់ចោលវិញ។ ដែលគេសង្ស័យថា ជនសង្ស័យអាចជាមនុស្សញៀនថ្នាំផង ព្រោះជននេះហាក់ព្រហើនណាស់ ដោយជិះកង់មកប្លន់ទាំងព្រឹក ហើយជនដៃដល់មានជាប់រូបភាពក្នុងកាមេរ៉ាសុវត្ថិភាពដែលនៅក្បែរនោះទៀតផង។
បើតាមក្រុមគ្រួសារស្ត្រីរងគ្រោះនិយាយថា មុនកើតហេតុ ជនរងគ្រោះនៅក្នុងផ្ទះជាន់ខាងក្រោម រីឯកូនៗនៅដេកជាន់ខាងលើ ហើយជនដៃដល់ជិះកញ្ចាស់មួយទៅឈប់ក្បែរនោះ តែគេមិនបានដឹងថា ជននោះជាចោរទេ លុះបន្តិចក្រោយមកទើបមានការភ្ញាក់ផ្អើល ដោយសារតែជននោះបានរត់ចេញក្រៅផ្ទះវិញ ហើយមានបុរសម្នាក់ស្ទុះទៅដេញវាយ។
សាក្សីដដែលបានប្រាប់ថា ជននោះប្លន់យកកាបូប២ តែទម្លាក់ចោលមួយវិញ ដែលប្រឡាក់ទៅដោយឈាម តែគេមិនដឹងថា ក្នុងកាបូបនោះមានអ្វីខ្លះទេ។ ពេលប្លន់បានកាបូប ជននោះបានព្យាយាមរត់គេច តែត្រូវបុរសម្នាក់ស្ទុះទៅវាយ តែមិនអាចរារាំងជនដៃដល់នោះឡើយ។ ស្ថិតក្នុងស្ថានភាពបែបនេះ ជនដៃដល់បានរត់ចោលកង់ កូនកាំបិត មួក និង ទូរស័ព្ទកញ្ចាស់១។
លោកឧត្តមសេនីយ៍ត្រី ជេត វណ្ណនី ស្នងការរងខេត្ត បានឱ្យដឹងថា បើយោងលើភស្ដុតាងដែលបន្សល់ទុក និងការពិនិត្យជាក់ស្ដែងលើសកម្មភាពដែលជនសង្ស័យបានប្រព្រឹត្ត គេសង្ស័យថា ជនដៃដល់អាចជាមនុស្សញៀនថ្នាំ ព្រោះជននេះហាក់ប្រថុយប្រថានពេក ដែលជិះកង់ទៅធ្វើសកម្មភាពប្លន់ទាំងព្រឹកនៅក្នុងភូមិ។ លោកស្នងការរងបញ្ជាក់ថា ពេលនេះយើងមិនទាន់ដឹងអំពីទ្រព្យសម្បត្តិដែលបាត់បង់នៅឡើយទេ ព្រោះជនរងគ្រោះកំពុងសង្គ្រោះបន្ទាន់នៅគ្លីនិកឯងជននៅឡើយ។
ព័ត៌មានពិស្តារនឹងមានផ្សាយជូននៅលើកាសែតកោះសន្តិភាព ។ (កែសម្រួលដោយ ៖ បុប្ផា)
ចែករំលែកព័តមាននេះ