ខេត្តកំពត ៖ ប្រជាពលរដ្ឋរស់នៅភូមិទ្វីខាងជើង សង្កាត់អណ្តូងខ្មែរ ក្រុងកំពត បានស្គាល់ប្រវត្តិដីកប់ខ្មោចចោរយ៉ាងច្បាស់ ព្រោះផ្លូវទៅកាន់ផ្នូរខ្មោចចោរនេះតែងមានភ្ញៀវជាតិ និងអន្តរជាតិនាំគ្នាធ្វើដំណើរតាមនោះដើម្បីទៅកាន់ជ្រោះទឹកធ្លាក់ដែលមានទឹកដ៏ត្រជាក់ហូរធ្លាក់បន្តមកពីភ្នំបូកគោ ។ លោកសូ ឆុំ មេភូមិទ្វី ខាងជើងបានមានប្រសាសន៍ប្រាប់ឱ្យដឹងពីផ្លូវប្រវត្តិសាស្ត្រទៅកាន់ផ្នូរខ្មោចចោរថា កាលពីសម័យអាណានិគមនិយមបារាំង អ្នកជាប់ពន្ធនាគារនៅខេត្តកំពតជាច្រើននាក់ដែលបានស្លាប់នៅក្នុងពន្ធនាគារ គេតែងតែឃើញឆ្មាំគុកដឹកខ្មោចយកទៅកប់ចោលនៅដីព្រៃក្រាសដែលសំបូរទៅដោយគុម្ពឫស្សីព្រៃដុះទ្រុបទ្រុល ។ ការកប់ខ្មោចជាញឹកញាប់នៅលើដីព្រៃនោះធ្វើឱ្យអ្នកស្រុកចាប់អារម្មណ៍ ហើយនាំគ្នាសួរទៅឆ្មាំពន្ធនាគាររឿងដឹកខ្មោចមកកប់ចោល ដោយមិនមានក្រុមសាច់ញាតិចូលរួម និងបានប្រាប់ថា កប់ខ្មោចចោរដែលស្លាប់នៅក្នុងពន្ធនាគារ ។
នៅជាប់នឹងកន្លែងកប់ខ្មោចចោរនោះ ក៏មានផ្លូវរទេះអ្នកស្រុកចេញចូលទៅជើងភ្នំបូកគោដែរ ទើបគេស្គាល់ថា ជាផ្លូវផ្នូរខ្មោចចោរៗរហូតមកទល់សព្វថ្ងៃនេះ ។ មន្ត្រីមួយរូបនៅមន្ទីរទេសចរណ៍ខេត្តបានប្រាប់ឱ្យដឹងថា ពេលនេះភ្នំបូកគោមិនត្រូវបានអនុញ្ញាតឱ្យភ្ញៀវជាតិ និងអន្តរជាតិឡើងទៅទេ ព្រោះខ្លាចមានបញ្ហាផ្សេងៗ ខណៈពេលដែលផ្លូវឡើងទៅលើភ្នំកំពុងស្ថាបនា ប៉ុន្តែជនបរទេសតែងតែលួចដើរឆ្លងកាត់ផ្លូវផ្នូរខ្មោចចោរទៅកាន់កំពូលភ្នំបូកគោ ។ ជនបរទេសភាគច្រើនគឺជាជនជាតិបារាំង ពេលគេមកដល់ខេត្តកំពត បើមានដំណឹងថា មានការហាមមិនឱ្យឡើងទៅកាន់ភ្នំបូកគោ គឺពួកគេមិនសប្បាយចិត្តឡើយ ព្រោះបំណងរបស់គេ គឺទៅលេងភ្នំបូកគោ ។ ទោះបីជាបែបណា ការអភិវឌ្ឍដែលកំពុងតែដំណើរការនាពេលបច្ចុប្បន្ន នឹងផ្តល់តំលៃដ៏មហាសាលផ្នែកទេសចរណ៍នៅពេលអនាគតដ៏ខ្លីខាងមុខ ៕
ចែករំលែកព័តមាននេះ