អ្នកឃើញហេតុការណ៍អះអាងផ្សេងគ្នា ខណៈបុរសម្នាក់សន្លប់តាមផ្លូវ

ថ្ងៃទី ២១ ខែ កុម្ភៈ ឆ្នាំ ២០២០

ម៉ោង ១០:០០

រាជធានីភ្នំពេញ ៖ បុរសមិនស្គាល់អត្តសញ្ញាណម្នាក់ ត្រូវបានគេប្រទះឃើញសន្លប់ស្តូកស្តឹងតាមផ្លូវ ខណៈអ្នកខ្លះថា ជនរងគ្រោះកំពុងបើកម៉ូតូមួយគ្រឿង និងរវល់និយាយទូរស័ព្ទ មិនបានប្រុងប្រយ័ត្នចាប់ហ្វ្រាំងមិនទាន់ បណ្តាលឱ្យដួលសន្លប់ ។ ចំណែកអ្នកខ្លះទៀតថា ជនរងគ្រោះជិះម៉ូតូបុករ៉ឺម៉កគេពីក្រោយ ទើបបណ្តាលឱ្យដួលសន្លប់ ។

ហេតុការណ៍ខាងលើនេះបានកើតឡើងកាលពីវេលាម៉ោង១០និង៣០នាទីយប់ថ្ងៃទី២០ ខែកុម្ភៈ ឆ្នាំ២០២០ នៅចំណុចមុខនឹងសាលាបឋមសិក្សាកុលាប តាមបណ្តោយផ្លូវព្រះស៊ីសុវត្ថិ ស្ថិតក្នុងសង្កាត់ស្រះចក ខណ្ឌដូនពេញ ។

បុរសរងគ្រោះម្នាក់ខាងលើមិនស្គាល់អត្តសញ្ញាណនោះទេ ជាអ្នកបើកបរម៉ូតូមួយគ្រឿងម៉ាកស៊ុយហ្ស៊ុយគីនិច ពណ៌ស ពាក់ស្លាកលេខ បាត់ដំបង ១AB-៨៧៥២ ។

តាមប្រភពព័ត៌មានពីជុំវិញកន្លែងកើតហេតុបានអោយដឹងថា មុនពេលកើតហេតុ គេឃើញបុរសរងគ្រោះបើកបរម៉ូតូមួយគ្រឿង ធ្វើដំណើរតាមបណ្តោយផ្លូវព្រះស៊ីសុវត្ថិក្នុងទិសដៅពីជើងទៅត្បូង លុះមកដល់ចំណុចកើតហេតុខាងលើ ដោយសារតែជនរងគ្រោះរវល់តែនិយាយទូរស័ព្ទ ហើយមិនបានប្រយ័ត្ន ទើបជ្រុលចាប់ហ្វ្រាំងមិនទាន់ បណ្តាលឱ្យដួលបោកបែកចង្ការរងរបួសចេញឈាមហើយសន្លប់ស្តូកស្តឹងនៅនឹងកន្លែងកើតហេតុ រីឯម៉ូតូបានរងការខូចខាតតិចតួចតែប៉ុណ្ណោះ ។

ចំណែកប្រភពខ្លះទៀតបាននិយាយថា ជនរងគ្រោះជិះម៉ូតូបុករ៉ឺម៉កគេពីក្រោយ ទើបបណ្តាលអោយដួលសន្លប់បាត់តែម្តង ។ ភ្លាមៗនោះក៏មានរថយន្តរបស់គ្លីនិកឯកជនបានមកដល់ និងដឹកយកជនរងគ្រោះយកទៅព្យាបាលផងដែរ ។

ក្រោយពេលកើតហេតុ ម៉ូតូរបស់ជនរងគ្រោះត្រូវបានសមត្ថកិច្ចយកទៅរក្សាទុកនៅប៉ុស្តិ៍រដ្ឋស្រះចកដើម្បីរង់ចាំបងប្អូនមកទទួលយកត្រឡប់ទៅផ្ទះវិញ ៕ (កែសម្រួលដោយ ៖ ធីតា)

អត្រាប្តូរប្រាក់

អត្រាប្តូរប្រាក់ផ្សេងទៀត