ខេត្តកំពង់ឆ្នាំង ៖ រដ្ឋលេខាធិការក្រសួងសាធារណការ និងដឹកជញ្ជូន លោក ផែង សុខវិជ្ជានោ បានជំរុញដល់ក្រុមការងារ និងអាជ្ញាធរមូលដ្ឋាន សូមពន្លឿនការស្តារបឹងមួយកន្លែង នៅក្នុងភូមិកំពង់បឹង ឃុំកំពង់ហៅ ស្រុកកំពង់លែង ដើម្បីឱ្យរួចរាល់មុនពេលរដូវធ្លាក់ភ្លៀងបានមកដល់ ។
រដ្ឋលេខាធិការក្រសួងសាធារណការ និងដឹកជញ្ជូន បានមានប្រសាសន៍បែបនេះ នៅក្នុងពេលចុះពិនិត្យការងារស្ដារបឹងមួយចំនួននៅក្នុងស្រុកកំពង់លែង ខេត្តកំពង់ឆ្នាំង កាលពីថ្ងៃទី១៩ ខែកុម្ភៈ ឆ្នាំ២០២០ ។
លោក ផែង សុខវិជ្ជានោ បានបន្តថា បឹងដែលក្រុមការងារកំពុងតែស្តារនេះ មានបណ្តោយប្រវែង៣១៥ម៉ែត្រ និងទទឹង៦៥ម៉ែត្រ ជាជំនួយរបស់ធនាគារអភិវឌ្ឍន៍អាស៊ី (ADB) ។ ពេលស្តារបឹងនេះបានហើយ វានឹងជួយស្តុកទឹកទុកសម្រាប់ប្រើប្រាស់ជាទូទៅ ដូចជាការស្រោចស្រព ការបង្កបង្កើនស្រូវរដូវប្រាំង ព្រោះកន្លងទៅនារដូវប្រាំងតែងតែជួបប្រទះការខ្វះខាតដោយសាររីងស្ងួតអស់ និងក៏ដូចជាសម្រាប់សត្វពាហនៈរបស់ប្រជាពលរដ្ឋ ពេលរដូវរាំងស្ងួតផងដែរ ។ ជាមួយគ្នានេះ រដ្ឋលេខាធិការក្រសួងសាធារណការនិងដឹកជញ្ជូនបានសម្ដែងនូវការកោតសរសើរ និងថ្លែងអំណរគុណដល់ក្រុមការងារ និងអាជ្ញាធរពាក់ព័ន្ធទាំងអស់ដែលបានខិតខំប្រឹងប្រែងក្នុងការពន្លឿនការស្ដារបឹងនេះ។
បើតាមការបញ្ជាក់របស់លោក សំ ចាន់ថន អភិបាលស្រុកកំពង់លែងបានឱ្យដឹងថា កន្លងទៅ នៅតំបន់ជុំវិញបឹងដែលកំពុងស្តារនេះ បានជួបការខ្លះខាតទឹកជារៀងរាល់ឆ្នាំ សម្រាប់ប្រជាពលរដ្ឋ ធ្វើស្រែប្រាំង ធ្វើចំការ និងសម្រាប់សត្វពាហនៈទៀតផង ហើយជារឿយៗ បងប្អូនប្រជាពលរដ្ឋដែលប្រើប្រាស់ទឹកបឹងមួយនេះ តែឈ្លោះគ្នាដណ្តើមទឹកគ្នាជាដើម ហើយសង្ឃឹមថា ក្រោយពេលបឹងនេះស្តាររួចរាល់នៅរដូវប្រាំងឆ្នាំក្រោយ ប្រជាពលរដ្ឋ នឹងមិនខ្វះទឹកប្រើប្រាស់ដូចមុនទៀតឡើយ ៕ (កែសម្រួលដោយ ៖ ធីតា)
ចែករំលែកព័តមាននេះ