ខេត្តកំពង់ឆ្នាំង ៖ បើតាមសេចក្តីរាយការណ៍បឋមបានឱ្យដឹងថា ជនសង្ស័យម្នាក់ត្រូវកម្លាំងសមត្ថកិច្ចនគរបាលក្រុងកំពង់ឆ្នាំង ធ្វើការចាប់ឃាត់ខ្លួន នៅរសៀលថ្ងៃទី១៨ ខែកុម្ភៈ ឆ្នាំ២០២០ នៅចំណុចភូមិទី៣ សង្កាត់ខ្សាម…
ខេត្តកំពង់ឆ្នាំង ៖ បើតាមសេចក្តីរាយការណ៍បឋមបានឱ្យដឹងថា ជនសង្ស័យម្នាក់ត្រូវកម្លាំងសមត្ថកិច្ចនគរបាលក្រុងកំពង់ឆ្នាំង ធ្វើការចាប់ឃាត់ខ្លួន នៅរសៀលថ្ងៃទី១៨ ខែកុម្ភៈ ឆ្នាំ២០២០ នៅចំណុចភូមិទី៣ សង្កាត់ខ្សាម ក្រុងកំពង់ឆ្នាំង បន្ទាប់ពីខឹងជនរងគ្រោះចាក់ធុងបាស់ឮៗពេក ហាមមិនស្តាប់ បែរជាផ្គើនទៀត ក៏វាយជនរងគ្រោះនឹងចបជីក បណ្តាលឱ្យរងរបួស រួចគេចខ្លួនបាន២ថ្ងៃ ។
បើតាមសមត្ថកិច្ចនគរបាលក្រុងកំពង់ឆ្នាំង បានឱ្យថា ជនសង្ស័យខាងលើឈ្មោះ លី ចាន់ផល្លា អាយុ៣២ឆ្នាំ រស់នៅក្នុងភូមិទី៣ សង្កាត់ខ្សាម ចំណែកជនរងគ្រោះមានឈ្មោះ ឌី អាយុ៦៤ឆ្នាំ មានទីលំនៅភូមិ សង្កាត់ជាមួយគ្នា ។
សមត្ថកិច្ចបានឱ្យដឹងបន្តថា នៅថ្ងៃកើតហេតុ គឺម៉ោងជាង១២ថ្ងៃត្រង់ នៅផ្ទះជនរងគ្រោះមានការផឹកស៊ី និងបានចាក់ធុងបាស់ឮខ្លាំងៗ ពេលនោះ ជនសង្ស័យបានដើរទៅហាម មិនឱ្យចាស់ធុងបាស់ពេកនោះទេ ព្រោះថ្លង់ដេកពួនមិនបាន ។ បន្ទាប់មក ជនសង្ស័យបានត្រឡប់មកផ្ទះវិញ ប៉ុន្តែអ្នកចាក់ធុងបាស់នៅតែបន្តចាក់ឮ ដដែល ហើយថែមទាំងបន្ថែមសម្លេងកាន់តែឮថែមទៀត ហាក់ផ្គើននឹងការហាមរបស់ជនសង្ស័យ ពេលនោះជនសង្ស័យខឹងក៏កាន់ចបជីកទៅវាយក្បាលជនរងគ្រោះ បណ្តាលឱ្យបែកក្បាល និងរបួសដៃតែម្តង ។
ក្រោយពេលធ្វើសកម្មភាពហើយ ជនសង្ស័យក៏បានគេចខ្លួនបាត់ ចំណែកជនរងគ្រោះត្រូវបានដឹកយកទៅសង្គ្រោះនៅមន្ទីរពេទ្យខេត្តកំពង់ឆ្នាំង ។ ប៉ុន្តែការគេចខ្លួនរបស់ជនសង្ស័យបានតែ២ថ្ងៃប៉ុណ្ណោះ ហើយក៏ត្រឡប់មកផ្ទះវិញ ក៏ត្រូវសមត្ថកិច្ចនគរបាលធ្វើការចាប់ឃាត់ខ្លួនតែម្តង រួមនាំមកកសាងសំណុំរឿង ដើម្បីចាត់ការតាមនីតិវិធីច្បាប់៕ (កែសម្រួលដោយ ៖ បុប្ផា)
ចែករំលែកព័តមាននេះ