រាជធានីភ្នំពេញ ៖ ប្រជាពលរដ្ឋប្រមាណជាង២០នាក់តំណាងអោយប្រមាណជាង១០០គ្រួសាររស់នៅក្នុងភូមិចំនួន២ គឺភូមិត្រពាំងសំព័រ និងភូមិស្រែជម្រៅ សង្កាត់គោករកា បានលើកគ្នាទៅសាលាខណ្ឌព្រែកព្នៅដើម្បីទទូចសុំអោយលោកអភិបាលខណ្ឌ និងអភិបាលរាជធានីភ្នំពេញមេត្តាជួយអន្តរាគមន៍តបណ្តាញទឹករដ្ឋបានប្រើប្រាស់។
ការលើកគ្នាទៅសុំឱ្យជួយអន្តរាគមន៍តបណ្តាញទឹកស្អាតសម្រាប់ប្រើប្រាស់ខាងលើនេះ បានកើតឡើងកាលពីវេលាម៉ោងប្រមាណ៩និង៣០នាទីព្រឹកថ្ងៃទី១៩ ខែកុម្ភៈ ឆ្នាំ២០២០ នៅសាលាខណ្ឌព្រែកព្នៅ បន្ទាប់ពីអ្នកភូមិបានផ្តិតមេដៃស្នើសុំជាច្រើនលើកមកហើយ ប៉ុន្តែមិនបាន ខណៈពេលដីឡូតិ៍ឯកជននៅជុំវិញមិនទាន់មានមនុស្សមករស់នៅច្រើនផង គេមានទឹកស្អាតប្រើប្រាស់ទៅហើយនោះ។
តាមប្រភពពីប្រជាពលរដ្ឋបានអោយដឹងថា ពួកគាត់ជាប្រជាជនថ្មីដែលបានមករស់នៅក្នុងភូមិទាំង២ខាងលើនេះ ដោយអ្នកខ្លះរស់នៅ១ឆ្នាំរហូតដល់៣ទៅ៤ឆ្នាំ ពុំមានទឹករដ្ឋប្រើនោះទេ គឺរស់នៅវេទនាបំផុត ត្រូវទិញទឹកដឹកតាមរថយន្តប្រើប្រាស់ក្នុងមួយរថយន្ត៣ម៉ឺនរៀល ឬក៏សុំតទឹកពីអ្នកភូមិនៅក្បែរនោះ ដោយតបណ្តាក់គ្នាដើម្បីអោយតែបានប្រើប្រាស់ ហើយពេលខ្លះទឹកខ្សោយមិនចេញទៀត ។ នៅក្នុងការតទឹកនេះត្រូវបង់ទឹកតែ១០០ទៅ១៣០ដុល្លារ និងបង់ថ្លៃទឹកក្នុង១ម៉ែត្រគូបតម្លៃ៣ពាន់រៀល ហើយទិញទុយោ.តដាក់ដោយខ្លួនឯងទៀត។
ប្រជាពលរដ្ឋក៏បានអោយដឹងទៀតថា ដោយសារលំបាកក្នុងការទិញទឹកប្រើប្រាស់បែបនេះ ទើបពួកគាត់នាំគ្នាផ្តិតមេដៃស្នើសុំទៅរដ្ឋាករទឹកជាបន្តបន្ទាប់តាំងពីឆ្នាំ២០១៥ ដោយមានការដឹងឮពីចៅសង្កាត់ និងអភិបាលខណ្ឌព្រែកព្នៅផងដែរ ។ នៅពេលស្នើសុំមុនដំបូង ប្រជាពលរដ្ឋមានចំនួនតិច ទើបខាងរដ្ឋាករទឹក ថា មិនទាន់មានគម្រោងមកដល់ តែរហូតមកដល់ពេលនេះប្រជាពលរដ្ឋរហូតដល់១២៦គ្រួសារដែលបានផ្តិតមេដៃទៅហើយ នៅតែមិនតបណ្តាញទឹករដ្ឋទៀត។
ក្នុងជំនួបជាមួយប្រជាពលរដ្ឋទាំងអស់ខាងលើ លោក នាយករដ្ឋបាលខណ្ឌព្រែកព្នៅបានអោយដឹងថា កន្លងមក បន្ទាប់ពីប្រជាពលរដ្ឋស្នើសុំតបណ្តាញទឹក អាជ្ញាធរសង្កាត់ ខណ្ឌ បានគិតគូរពីប្រជាពលរដ្ឋ ហើយក៏បានស្នើទៅខាងរដ្ឋាករទឹកស្វយ័តភ្នំពេញចុះទៅសិក្សាដែរ តែត្រូវបានខាងរដ្ឋាករទឹកធ្វើលិខិតចូលទៅសង្កាត់គោករការវិញ ដោយបញ្ជាក់ថា មិនទាន់ដាក់បំពង់ផ្គត់ផ្គង់ទឹកស្អាតបានទេ ព្រោះទីតាំងស្នើសុំខាងលើ ត្រូវបំពាក់បំពង់ចែកចាយទឹកប្រវែង៦០០ម៉ែត្រ ហើយផ្លូវត្រូវដាក់បំពង់ទឹកស្អាតចូលពុំទាន់រៀបរយនិងភាគច្រើនជាដីវាលនៅឡើយ ។ ទន្ទឹមនឹងនោះដែរ ប្រជាពលរដ្ឋក៏បានប្រតិកម្ម ដោយអះអាងថា ការស្នើសុំលើកមុន ប្រជាពលរដ្ឋដែលបានផ្តិតមេដៃមានតែ២៨គ្រួសារទេ ប៉ុន្តែលើកនេះ មានប្រជាពលរដ្ឋរហូតដល់១២៦គ្រួសារទៅហើយ និងបន្តមករស់ជាបន្តបន្ទាប់ទៀត ។
លោកនាយករដ្ឋបាលក៏បានទទួលយកសំណើ ហើយក៏បានសន្យាថារាយការណ៍ទៅខាងរដ្ឋាករទឹកដើម្បីដោះស្រាយជូនប្រជាពលរដ្ឋ ។
ប្រជាពលរដ្ឋក៏បានទទូចសុំដល់លោកអភិបាលរាជធានីភ្នំពេញមេត្តាជួយអន្តរាគមន៍ ក៏ដូចជាលោកអគ្គនាយករដ្ឋាករទឹកស្វយ័តភ្នំពេញជួយសម្រួល និងតបណ្តាញទឹករដ្ឋអោយពួកគាត់បានប្រើប្រាស់ ព្រោះរដូវប្រាំងនេះនឹងប្រឈមមុខអត់ទឹកប្រើប្រាស់។
សូមបញ្ជាក់ថា ប្រជាពលរដ្ឋបានជួបជុំផ្តិតមេដៃសុំតបណ្តាញទឹករដ្ឋជាលើកទី៤មកហើយ និងលើកគ្នាទៅសង្កាត់ ខណ្ឌជាច្រើនលើកមកហើយ ព្រោះតែចង់បានទឹករដ្ឋប្រើប្រាស់ ព្រមទាំងដង្ហើយហៅនិងទទូចសុំអោយអាជ្ញាធរជួយអន្តរាគមន៍៕ (កែសម្រួលដោយ ៖ ធីតា)
👍
ចែករំលែកព័តមាននេះ