ខេត្តមណ្ឌលគិរី ៖ បង្គោលខណ្ឌសីមាព្រំដែនចំនួន២២៩ និងផ្លូវក្រវាត់ព្រំដែនក្រាលក្រួសក្រហមប្រវែង៦៣គីឡូម៉ែត្រ ឆ្លងកាត់ស្រុកអូររាំង ស្រុកពេជ្រាដា និងស្រុកកែវសីមា ខេត្តមណ្ឌលគិរី ត្រូវបានប្រគល់ឲ្យអាជ្ញាធរខេត្ត និងស្ថាប័នពាក់ព័ន្ធថែរក្សាការពារ។
អនុប្រធានគណៈកម្មការព្រំដែនកម្ពុជា លោកស្រី កុយ ពិសី ឱ្យដឹងថា នៅថ្ងៃទី១៦ ខែកុម្ភៈ កន្លងទៅនេះ លោក វ៉ា គឹមហុង ទេសរដ្ឋមន្ត្រីទទួលបន្ទុកកិច្ចការព្រំដែន និងជាប្រធានគណៈកម្មាធិការចម្រុះកិច្ចការព្រំដែនបានដឹកនាំគណៈប្រតិភូចុះត្រួតពិនិត្យបង្គោលព្រំដែន និងផ្លូវក្រវ៉ាត់ព្រំដែនប្រវែង៦៣គីឡូម៉ែត្រ នៅខេត្តមណ្ឌលគិរី រួមដំណើរដោយលោក ស្វាយ សំអ៊ាង អភិបាលខេត្តមណ្ឌលគិរី និងជាប្រធានអនុគណៈកម្មាធិការព្រំដែនខេត្ត និងនាយឧត្តមសេនីយ៍ ខ្វាន់ ស៊ាម អគ្គមេបញ្ជាការ បញ្ជាការដ្ឋានកងវិស្វកម្មក្រសួងការពារជាតិ ដែលជាអ្នកទទួលបន្ទុកសាងសង់បង្គោលព្រំដែន និងផ្លូវក្រវាត់ព្រំដែនកម្ពុជា-វៀតណាម។
ក្នុងឱកាសនោះ លោកទេសរដ្ឋមន្ត្រី បានជម្រាបជូនអាជ្ញាធរមានសមត្ថកិច្ចឲ្យរួមគ្នាថែរក្សាការពារសមិទ្ធិផល ដែលកើតចេញក្រោមការដឹកនាំដ៏មោះមុតរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ឲ្យបានស្ថិតស្ថេរគង់វង្ស៕ (កែសម្រួលដោយ ៖ ធីតា)
ចែករំលែកព័តមាននេះ