រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា ប្រជាពលរដ្ឋប្រមាណ៤០នាក់ ដែលជាក្រុមគ្រួសារប្រជាពលរដ្ឋប្រមាណ៨នាក់ ដែលមានទំនាស់ដីធ្លីនៅតំបន់អភិវឌ្ឍន៍ខណ្ឌឬស្សីកែវ បានលើកគ្នាទៅសាលាខណ្ឌឬស្សីកែវ ដើម្បីទាមឱ្យដោះលែ លោកព្រំ បូរ ដែលជាមន្ត្រីយោធា ដែលត្រូវបានកម្លាំងគណៈបញ្ជាការឯកភាពខណ្ឌឬស្សីកែវ ឃាត់ខ្លួន ខណៈពេលដែលលោកទាមទារសុំដឹកសម្ភារគ្រឿងចក្រដែលត្រូវបានអាជ្ញាធររុះរើ។
សេចក្តីរាយការណ៍បន្តថា ការលើកគ្នាទៅសាលាខណ្ឌឬស្សីកែវនេះ កាលពីល្ងាចថ្ងៃទី១៦ ខែកុម្ភៈ ឆ្នាំ ២០២០ បន្ទាប់ពីលោកព្រំ បូរ ត្រូវបានឃាត់ខ្លួនកាលពីម៉ោងប្រមាណ១១ព្រឹក។
តាមព័ត៌មានបានឱ្យដឹងថា នៅម៉ោងប្រមាណ១១ព្រឹក ថ្ងៃទី១៦ ខែកុម្ភៈនេះ អាជ្ញាធរខណ្ឌឬស្សីកែវ បន្តប្រើវិធានការរដ្ឋបាល ដោយរុះរើសំណង់លោកព្រំ បូរ ក្នុងចំណោម៨គ្រួសារដែលមានទំនាស់ដីធ្លី នៅតំបន់អភវឌ្ឍន៍ឬស្សីកែវ ក្នុងភូមិទួលពពែ សង្កាត់ទួលសង្កែទី២ ខណ្ឌឬស្សីកែវ ។ ខណៈពេលដែលរុះរើនោះ លោកព្រំ បូរ ដែលជាមន្ត្រីយោធា ថ្នាក់វរះសេនីយ៍ ក៏បានទាមទារដឹកគ្រឿងចក្ររបស់ខ្លួន តែពុំត្រូវអាជ្ញាធរអនុញ្ញាតិ ក៏មានការប្រទាញប្រទង់គ្នា ហើយសមត្ថកិច្ច ក៏បានចាប់ខ្លួនលោកព្រំ បូរ សែងដាក់រថយន្តបញ្ជូនទៅកាន់សាលាខណ្ឌឬស្សីកែវ ។
ប្រភពដដែលបន្តថា បន្ទាប់ពីឃាត់ខ្លួន ប្រជាពលរដ្ឋដែលជាបងប្អូនក្រុមគ្រួសារ សាច់ញាតិ ប្រជាពលរដ្ឋ៨គ្រួសារ ដែលកំពុងតែមានទំនាស់ដីធ្លីពុំទាន់ដោះស្រាយចប់ ក៏បានលើកគ្នា ទៅសាលាខណ្ឌនៅល្ងាច ដើម្បីទាមទារឱ្យមានការដោះលែងវិញ។
តាមប្រជាពលរដ្ឋបានឱ្យដឹងថា តើលោកព្រំ បូរ ខុសអីបានជាចាប់ខ្លួន? គ្រាន់តែទាមទារដឹកគ្រឿងចក្ររបស់ខ្លួនគេចេញសោះ។
ព័ត៌មានបន្ថែមនឹងមានផ្សាយនៅលើកាសែតកោះសន្តិភាព ។ (កែសម្រួលដោយ ៖ បុប្ផា)
ចែករំលែកព័តមាននេះ