រាជធានីភ្នំពេញ ៖ ស្របពេលដែលទំនោរនៃការទប់ស្កាត់សកម្មភាពមិនប្រក្រតីក្នុងទិវានៃក្តីស្រឡាញ់ ដោយហេតុថាទិវានេះមិនមែនជាប្រពៃណីរបស់កម្ពុជានោះ បានក្លាយជាការរំឭក និងដាស់តឿនដល់យុវជនទាំងអស់ កុំឲ្យប្រព្រឹត្តទង្វើប្រាសចាកពីប្រពៃណីនិងទំនៀមទម្លាប់ផូរផង់របស់ជាតិនៅក្នុង«ទិវានៃក្តីស្រឡាញ់» ១៤ កុម្ភៈ ។…
រាជធានីភ្នំពេញ ៖ ស្របពេលដែលទំនោរនៃការទប់ស្កាត់សកម្មភាពមិនប្រក្រតីក្នុងទិវានៃក្តីស្រឡាញ់ ដោយហេតុថាទិវានេះមិនមែនជាប្រពៃណីរបស់កម្ពុជានោះ បានក្លាយជាការរំឭក និងដាស់តឿនដល់យុវជនទាំងអស់ កុំឲ្យប្រព្រឹត្តទង្វើប្រាសចាកពីប្រពៃណីនិងទំនៀមទម្លាប់ផូរផង់របស់ជាតិនៅក្នុង«ទិវានៃក្តីស្រឡាញ់» ១៤ កុម្ភៈ ។ គេសង្កេតឃើញថា ទីតាំងលក់ផ្កាជុំវិញសាលារៀនសាធារណៈក៏ដូចជាឯកជន មិនមានដាក់លក់ផ្កាគគ្រឹកគគ្រេងដូចបណ្តាឆ្នាំមុនៗទេ ហើយក្រុមយុវជនយុវនារីក៏មិនមានការចោមរោមទិញផ្កានោះដែរ ។ រីឯសាលារៀនដំណើរការបង្រៀនជាធម្មតា នេះបើនិយាយតែសាលារៀនរដ្ឋ និងឯកជនទាំង១៥នៅក្នុងខណ្ឌដូនពេញ រាជធានីភ្នំពេញ ។
អ្នកស្រី យ៉ា រុំ អ្នកលក់ផ្កាចម្រុះនៅខាងកើតផ្សារធំថ្មី និយាយថា ឆ្នាំេនះអ្នកមកទិញផ្កាជាកាដូជូនសាច់ញាតិក៏ដូចជាយុវជនយុវនារី មានការថយចុះប្រហែល៥០ភាគរយ ។ បើនិយាយឲ្យចំ ក្នុងទិវានៃក្តីស្រឡាញ់ឆ្នាំនេះ គឺមានភាគតិចណាស់ដែលក្រុមយុវវ័យមកទិញផ្កា ម្យ៉ាងកន្លែងគាត់លក់ផ្កានេះគឺមានតម្លៃខ្ពស់បន្តិច ។ អ្នកស្រីបញ្ជាក់ថា ភ្ញៀវភាគច្រើនមកទិញផ្កានៅថ្ងៃទី១៤ ខែកុម្ភៈ មានវ័យចាប់ជាង៣០ឆ្នាំឡើងទៅ ហើយការថយចុះអ្នកមកទិញផ្កាដោយសារតែឥឡូវមានហាងលក់ផ្កាច្រើន ទើបបានជាគាត់បាត់អតិថិជនតាមនោះដែរ ។
អ្នកគ្រូម្នាក់នៅវិទ្យាល័យវត្តភ្នំ ក្នុងខណ្ឌដូនពេញ និយាយក្នុងន័យសុំមិនបង្ហាញឈ្មោះថា ទិវានៃក្តីស្រឡាញ់ថ្ងៃ១៤ កុម្ភៈ ឆ្នាំ២០២០នេះ នៅតែទទួលបានការចាប់អារម្មណ៍ពីសំណាក់យុវវ័យនៅក្នុងប្រទេសកម្ពុជា ។ ទិវានៃក្ដីស្រឡាញ់នេះ ត្រូវបានយុវវ័យកម្ពុជាបង្ហាញពីការយល់ឃើញខុសៗគ្នា ខណៈអ្នកខ្លះចាត់ទុកថ្ងៃ១៤ កុម្ភៈ គ្រាន់តែថ្ងៃធម្មតាមិនសំខាន់ឡើយ ព្រោះមិនមែនជាបុណ្យប្រពៃណីជាតិខ្មែរយើងទេ ប៉ុន្តែអ្នកខ្លះទៀតចាត់ទុកថា ១៤ កុម្ភៈ គឺជាថ្ងៃសំខាន់សម្រាប់ពួកគេផងដែរ ។ ប៉ុន្តែទិវានៃក្តីស្រឡាញ់ឆ្នាំនេះឃើញថា យុវសិស្សទាំងប្រុសទាំងស្រីមិនបានឈប់ការពីសិក្សានោះទេ ហើយការលក់ផ្កានៅជុំវិញសាលាគឺគ្មានតែម្តង ។ ម្យ៉ាងវិញទៀត ក្រសួងអប់រំ យុវជន និងកីឡា បានចេញសេចក្តីណែនាំដល់គ្រឹះស្ថានសិក្សាមាន៤ចំណុច ដែលត្រូវធ្វើការផ្សព្វផ្សាយដល់ប្អូនសិស្សានុសិស្ស ។
ស្ត្រីម្នាក់លក់ផ្កានៅជាប់របងវត្តលង្កា តាមមហាវិថីព្រះសីហនុ ក្នុងសង្កាត់បឹងកេងកងទី១ខណ្ឌចំការមន ដែលហាមមិនឲ្យថតទីតាំងលក់ផ្កា និយាយថា ចាប់តាំងពីម៉ោង៨ព្រឹកនៃទិវាក្តីស្រឡាញ់១៤ កុម្ភៈ អ្នកលក់ផ្កាក៏ដូចជាកាដូមិនសូវដាច់ប៉ុន្មានទេ គឺធ្លាក់ចុះជាងឆ្នាំមុនទៀត តែដោយសារស្តាយក្នុងការលក់ផ្កាក្នុងថ្ងៃនេះ ជារៀងរាល់ឆ្នាំក៏ចេះតែមកលក់ទៅ ។ យូរៗឃើញនារីនិងបុរសម្នាក់ពីរជិះម៉ូតូមកទិញផ្កា ឲ្យរៀបចំជាកាដូដោយប្រាប់ថា យកទៅជូនឪពុកម្តាយនៅពេលយប់ ក្នុងពិធីជប់លៀងជួបជុំក្រុមគ្រួសារក្នុងទិវានៃក្តីស្រឡាញ់នេះ ។
យុវជន សុខ ប៊ុនយ៉ន ជាសិស្សរៀននៅវិទ្យាល័យព្រះសុីសុវត្ថិ និយាយថា ទិវានៃក្ដីស្រឡាញ់នេះមិនមែនជារឿងមិនល្អនោះឡើយ មិនល្អលុះត្រាតែអ្នកមិនបានយល់ច្បាស់ពីអត្ថន័យនៃទិវានេះ ។ មែនទែនទៅ ទិវានៃក្ដីស្រឡាញ់មិនសំដៅចំពោះគូសង្សារឡើយ តែសំដៅលើអ្នកទាំងអស់គ្នាដែលនៅក្បែរអ្នកដូចជា ក្រុមគ្រួសារឪពុកម្ដាយ បងប្អូន មិត្តភក្ដិជាដើម ។ ប៉ុន្ដែទិវានេះអាចប៉ះពាល់ដែរ ប្រសិនបើអ្នកទាំងអស់គ្នា ពិសេសបុរសៗឆ្លៀតយកឱកាសថ្ងៃ១៤ កុម្ភៈនេះ ប្រព្រឹត្តអំពើមិនគួរគប្បីណាមួយចំពោះនារីភេទ ។
បច្ចុប្បន្ន យុវវ័យកម្ពុជាយល់ដឹងច្រើនពីទិវានៃក្ដីស្រឡាញ់នេះ បើចំពោះនារីវិញប្រហែលជាមិនអាចចាញ់បោកការលួងលោមរបស់បុរសនោះឡើយ ព្រោះពួកគេដឹងច្បាស់ថា ថ្ងៃនេះគ្រាន់តែជាថ្ងៃចែករំលែកក្ដីស្រឡាញ់ចំពោះគ្រប់គ្នា មិនមែនជាការដោះដូរខ្លួនប្រាណដើម្បីបញ្ជាក់ក្ដីស្រឡាញ់នោះឡើយ ។ សុខ បុ៊នយ៉ន បញ្ជាក់ថា «ចំពោះខ្ញុំអត់មានគម្រោងទៅណាទេព្រោះថា ថ្ងៃ១៤ កុម្ភៈនេះជាថ្ងៃរៀនសូត្រធម្មតា ដូច្នេះខ្ញុំនឹងមកសាលារៀនតែប៉ុណ្ណោះ» ។
មន្ត្រីការិយាល័យអប់រំ យុវជន និងកីឡាខណ្ឌដូនពេញ មួយរូប ទាក់ទិននឹងទិវាថ្ងៃក្តីស្រឡាញ់១៤ កុម្ភៈនេះ បានថ្លែងថា ក្នុងខណ្ឌដូនពេញមានសាលារៀនរដ្ឋ និងឯកជនចំនួន១៥។ មន្ត្រីសាលាខណ្ឌដូនពេញ បានចុះផ្សព្វផ្សាយសេចក្តីណែនាំរបស់ក្រសួងអប់រំ យុវជន និងកីឡា ក្រសួងវប្បធម៌និងវិចិត្រសិល្បៈ និងក្រសួងកិច្ចការនារី ទៅដល់សិស្សានុសិស្សឲ្យយល់ដឹងពីអត្ថន័យទិវានៃក្តីស្រឡាញ់១៤ កុម្ភៈ ។ តាមការសង្កេតឃើញថា តាមដងវិថីនានា និងតាមសាលារៀនរដ្ឋ និងឯកជន មិនមានការដាក់តាំងលក់ផ្កាគគ្រឹកគគ្រេងនោះទេ គឺមានការថយចុះយ៉ាងខ្លាំង ។
នេះដោយសារតែការខិតខំរបស់ប្រមុខរាជរដ្ឋាភិបាល ក៏ដូចជាក្រសួងពាក់ព័ន្ធដែលព្យាយាមធ្វើការផ្សព្វផ្សាយដល់ស្រទាប់យុវជនមុនថ្ងៃនេះមកដល់ ។ គេសង្កេតឃើញថា នៅតាមមហាវិថីព្រះសីហនុ មានកន្លែងលក់ផ្កាជាច្រើនកន្លែង តែហាក់ដូចជាមិនសូវឃើញក្រុមយុវវ័យនាំគ្នាមកទិញផ្កានោះទេ ខុសពីបណ្តាឆ្នាំមុនៗ ដែលក្រុមយុវវ័យសម្រុកទិញផ្កាជូនមិត្តនារីតាមសាលាយ៉ាងពាក់ពូន ។ ថ្ងៃទី១៤ ខែកុម្ភៈ គឺជាទិវានៃក្តីស្រឡាញ់ (Valentine’s Day) ដែលពិភពលោកបានប្រារព្ធធ្វើឡើង ។ ជាក់ស្តែងនៅថ្ងៃទី១៤ ខែកុម្ភៈ ឆ្នាំ២០២០ នេះដែរ នៅប្រទេសកម្ពុជាយើង ក៏ដូចជាបណ្តាប្រទេសនៅលើសកលលោក ក៏បានប្រារព្ធទិវានៃក្តីស្រឡាញ់នេះដែរ ។
គួរបញ្ជាក់ថា ក្នុងសេចក្តីណែនាំរបស់ក្រសួង អប់រំ យុវជន និងកីឡា នាថ្ងៃទី១៤ ខែកុម្ភៈ ឆ្នាំ២០២០ ក្រសួងសង្កេតឃើញថា សិស្សានុសិស្សមួយចំនួនតូចយល់ច្រឡំថា ថ្ងៃ១៤ ខែកុម្ភៈ ជាថ្ងៃបុណ្យសង្សារ ឬជាថ្ងៃណាត់ជួបគ្នារវាងគូស្នេហ៍ ភ្លើតភ្លើនភ្លេចការសិក្សា បាត់បង់សេចក្តីថ្លៃថ្នូរបុគ្គល និងក្រុមគ្រួសារ ប្រាសចាកពីវប្បធម៌ និងប្រពៃណីជាតិរបស់ខ្មែរជាដើម ។
ករណីនេះ ក្រសួងអប់រំ បានអំពាវនាវទៅថ្នាក់គ្រប់គ្រងសាលាសិក្សាសាធារណៈ និងឯកជន ត្រូវពង្រឹងការអនុវត្តបទបញ្ជាផ្ទៃក្នុង និងធ្វើការណែនាំពីវិធានការទប់ស្កាត់សកម្មភាពមិនប្រក្រតីក្នុងថ្ងៃ១៤ ខែកុម្ភៈ តាមរយៈការផ្សព្វផ្សាយដល់សិស្សគ្រប់មធ្យោបាយ ប្រាប់ទៅសិស្សនៅកន្លែងប្រជុំ នៅដងទង់ជាតិ ដើម្បីកុំឱ្យយល់ខុសពីអត្ថន័យនៃទិវានៃក្តីស្រឡាញ់ ពង្រឹងផ្នែកសីលធម៌សិស្ស ដោយតាមដានវត្តមានរបស់សិស្សជាប្រចាំ ជំរុញទៅក្រុមប្រឹក្សាដំណើរការ ក្រុមប្រឹក្សាយុវជន ក្រុមប្រឹក្សាកុមារ ដោយអនុវត្តសកម្មភាព «មិត្តអប់រំមិត្ត» និងទាក់ទងទៅអាណាព្យាបាលសិស្ស ដើម្បីកែលំអសិស្សានុសិស្សឱ្យបានទាន់ពេលវេលា «សូមកុំប្រព្រឹត្តអ្វីដែលអាចធ្វើឲ្យយើងសោកស្តាយមួយជីវិត» ៕
ចែករំលែកព័តមាននេះ