រាជធានីភ្នំពេញ ៖ ស្របពេលដែលក្រសួងអប់រំប្រាប់ទៅគ្រឹះស្ថានសិក្សាសាធារណៈ និងឯកជន ឱ្យទប់ស្កាត់សកម្មភាពមិនប្រក្រតីក្នុងទិវានៃក្តីស្រលាញ់ ដោយហេតុថា ទិវានេះមិនមែនជាប្រពៃណីរបស់កម្ពុជានោះទេ ។ ការក្រើនរំលឹក និងដាស់តឿនដល់យុវជនទាំងអស់កុំឲ្យប្រព្រឹត្តទង្វើប្រាស់ចាកពីប្រពៃណីនិងទំនៀមទម្លាប់ដ៏ផូរផង់របស់ជាតិនៅក្នុងថ្ងៃ«ទិវានៃក្តីស្រឡាញ់»…
រាជធានីភ្នំពេញ ៖ ស្របពេលដែលក្រសួងអប់រំប្រាប់ទៅគ្រឹះស្ថានសិក្សាសាធារណៈ និងឯកជន ឱ្យទប់ស្កាត់សកម្មភាពមិនប្រក្រតីក្នុងទិវានៃក្តីស្រលាញ់ ដោយហេតុថា ទិវានេះមិនមែនជាប្រពៃណីរបស់កម្ពុជានោះទេ ។ ការក្រើនរំលឹក និងដាស់តឿនដល់យុវជនទាំងអស់កុំឲ្យប្រព្រឹត្តទង្វើប្រាស់ចាកពីប្រពៃណីនិងទំនៀមទម្លាប់ដ៏ផូរផង់របស់ជាតិនៅក្នុងថ្ងៃ«ទិវានៃក្តីស្រឡាញ់» ១៤ កុម្ភៈ ឆ្នាំ២០២០នេះ ។
គេសង្កេតឃើញថា ទីតាំងលក់ផ្កាជុំវិញសាលារៀនរដ្ឋក៏ដូចជាឯកជនមិនមានដាក់លក់ផ្កាគគ្រឹកគគ្រេងដូចបណ្តាឆ្នាំមុនៗនោះទេ ហើយក្រុមយុវជននិងនារីៗមិនមានការចោមរោមទិញផ្កានោះដែរ រីឯសាលារៀនដំណើរការបង្រៀនជាធម្មតា នេះបើនិយាយតែសាលារៀនរដ្ឋនិងឯកជនទាំង១៥នៅក្នុងខណ្ឌដូនពេញរាជធានីភ្នំពេញ ។
អ្នកស្រីយ៉ា រុំ ជាអ្នកលក់ផ្កាចម្រុះនៅខាងកើតផ្សារធំថ្មីបានឲ្យដឹងថា ៖ ឆ្នាំេនះអ្នកមកទិញផ្កាជាកាដូជូនសាច់ញាតិក៏ដូចជាយុវជន យុវនារីមានការថយចុះប្រហែល៥០ភាគរយ បើនិយាយឲ្យចំទិវានៃក្តីស្រឡាញ់ឆ្នាំនេះគឺមានភាគតិចណាស់ដែលក្រុមយុវ័យមកទិញផ្កា ។ ម្យ៉ាងទៀតកន្លែងគាត់លក់ផ្កានេះគឺវាមានតម្លៃខ្ពស់បន្តិច ។ អ្នកស្រីបានបញ្ជាក់ថា ៖ ភ្ញៀវភាគច្រើនមកទិញផ្កានៅថ្ងៃទី១៤ កុម្ភៈ នេះមានចាប់ពីអាយុជាង៣០ឆ្នាំឡើងទៅ ហើយការថយចុះអ្នកមកទិញផ្កា ដោយសារតែឥឡូវមានហាងលក់ផ្កាច្រើន ទើបបានជាគាត់បាត់អតិថិជនតាមនោះដែរ។
អ្នកគ្រូម្នាក់នៅវិទ្យាល័យវត្តភ្នំក្នុងខណ្ឌដូនពេញនិយាយក្នុងន័យសុំមិនបង្ហាញឈ្មោះបានឲ្យដឹងថា ទិវានៃក្តីស្រលាញ់ ថ្ងៃ១៤ កុម្ភៈ នេះ នៅតែទទួលបានការចាប់អារម្មណ៍ពីសំណាក់យុវវ័យនៅក្នុងប្រទេសកម្ពុជាហើយទិវានៃក្ដីស្រលាញ់នេះ ត្រូវបានយុវវ័យកម្ពុជាបង្ហាញពីការយល់ឃើញខុសៗគ្នា ខណៈអ្នកខ្លះចាត់ទុកថ្ងៃ១៤ កុម្ភៈ គ្រាន់តែថ្ងៃធម្មតា មិនសំខាន់ឡើយ ព្រោះមិនមែនជាបុណ្យប្រពៃណីជាតិខ្មែរទេ ប៉ុន្តែអ្នកខ្លះទៀតចាត់ទុកថា ១៤ កុម្ភៈ គឺជាថ្ងៃសំខាន់សម្រាប់ពួកគេផងដែរ ។ ក៏ប៉ុន្តែទិវានៃក្តីស្រឡាញ់ឆ្នាំនេះ ឃើញថា យុវសិស្សទាំងប្រុសទាំងស្រីមិននាំគ្នាឈប់ការពីសិក្សានោះទេ ហើយការលក់ផ្កានៅជុំវិញសាលាគឺគ្មានតែម្តង ម្យ៉ាងវិញទៀតក្រសួងអប់រំយុវជននិងកីឡាបានចេញសេចក្តីណែនាំដល់គ្រឹះស្ថានសិក្សាមាន៤ចំណុចដែលត្រូវធ្វើការផ្សព្វផ្សាយដល់សិស្សានុសិស្ស ។
ស្ត្រីម្នាក់ជាអ្នកលក់ផ្កានៅជាប់របងវត្តលង្ការ តាមបណ្តោយវិថីព្រះសីហនុ ស្ថិតក្នុងសង្កាត់បឹងកេងកងទី១ ខណ្ឌចំការមន ហាមមិនឲ្យថតទីតាំងលក់ផ្កា បានឲ្យដឹងថា ចាប់តាំងពីម៉ោង៨ព្រឹកនាថ្ងៃទិវាក្តីស្រឡាញ់១៤កុុម្ភៈ អ្នកលក់ផ្កាក៏ដូចជាអ្នកលក់កាដូ មិនសូវដាច់ប៉ុន្មាននោះទេ គឺវាធ្លាក់ចុះជាងឆ្នាំមុនទៅទៀត តែដោយសារមានការស្តាយលក់ផ្កាក្នុងថ្ងៃនេះជារៀងរាល់ឆ្នាំទៅហើយ ចេះតែមកលក់ទៅ ។ យូរៗឃើញមាននារី និងបុរសម្នាក់ជិះម៉ូតូមកទិញផ្កា ឲ្យរៀបចំកាដូមួយពីរដែរ ពួកគេថា យកទៅជូនឪពុកម្តាយនៅពេលយប់ក្នុងពិធីជប់លៀងជួបក្រុមគ្រួសារក្នុងថ្ងៃទិវានៃក្តីស្រឡាញ់នេះ ។
យុវជនម្នាក់ឈ្មោះសុខ ប៊ុនយ៉ន ជាសិស្សរៀននៅវិទ្យាល័យព្រះសុីសុវត្ថិបាននិយាយថា ទិវានៃក្ដីស្រលាញ់នេះមិនមែនជារឿងមិនល្អនោះឡើយ មិនល្អលុះត្រាតែអ្នកមិនបានយល់ច្បាស់ពីអត្ថន័យទិវានេះ។ មែនទែនទៅ ទិវានៃក្ដីស្រលាញ់មិនសំដៅចំពោះគូសង្សារឡើយ តែសំដៅលើអ្នកទាំងអស់គ្នាដែលនៅក្បែរអ្នកដូចជា ក្រុមគ្រួសារឪពុក-ម្ដាយ, បងប្អូន, មិត្តភក្ដិជាដើម។ យុវជននេះបន្ដថា ប៉ុន្ដែទិវានេះអាចប៉ះពាល់ដែរ ប្រសិនបើអ្នកទាំងអស់គ្នា ពិសេសបុរសៗឆ្លៀតយកឱកាសថ្ងៃ១៤កុម្ភៈនេះ ប្រព្រឹត្តអំពើមិនគួរគប្បីណាមួយចំពោះនារីភេទ ។
បច្ចុប្បន្នយុវវ័យកម្ពុជាយល់ដឹងច្រើនពីទិវានៃក្ដីស្រលាញ់នេះ បើចំពោះនារីភេទវិញ ប្រហែលជាមិនអាចចាញ់បោកការលួងលោមរបស់បុរសនោះឡើយ ព្រោះពួកគាត់ដឹងច្បាស់ថា ថ្ងៃនេះគ្រាន់តែជាថ្ងៃចែករំលែកក្ដីស្រលាញ់ចំពោះគ្រប់គ្នា មិនមែនជាការដោះដូរខ្លួនប្រាណ ដើម្បីបញ្ជាក់ក្ដីស្រលាញ់នោះឡើយ ។ សុខាបានបញ្ជាក់ថា «ចំពោះខ្ញុំអត់មានគម្រោងទៅណាទេ ព្រោះថា ថ្ងៃ១៤កុម្ភៈនេះជាថ្ងៃរៀនសូត្រធម្មតា ដូច្នេះខ្ញុំនឹងមកសាលារៀនប៉ុណ្ណោះ» ។
មន្ត្រីការិយាល័យអប់រំយុវជននិងកីឡាខណ្ឌដូនពេញមួយរូបទាក់ទិននិងទិវាថ្ងៃក្តីស្រឡាញ់១៤ កុម្ភៈបានថ្លែងថា ក្នុងខណ្ឌដូនពេញមានសាលារៀនរដ្ឋនិងឯកជនចំនួន១៥ មន្ត្រីសាលាខណ្ឌដូនពេញបានចុះផ្សព្វផ្សាយសេចក្តីណែនាំរបស់ក្រសួងអប់រំយុវជននិងកីឡា ក្រសួងវប្បធម៌ ក្រសួងកិច្ចការនារី ទៅដល់ស្រទាប់សិស្សានុសិស្សឲ្យយល់ដឹងពីអត្ថន័យទិវានៃក្តីស្រលាញ់១៤កុម្ភៈ ក៏ប៉ុន្តែតាមការសង្កេតឃើញថាតាមដងវិថីនានានិងតាមសាលារៀនរដ្ឋនិងឯកជនមិនដាក់តាំងលក់ផ្កាគគ្រឹកគគ្រេងនោះទេ គឺមានការថយចុះយ៉ាងខ្លាំង នេះដោយសារតែការខិតខំពីប្រមុខរាជរដ្ឋាភិបាលក៏ដូចជាក្រសួងពាក់ព័ន្ធព្យាយាមធ្វើការផ្សព្វផ្សាយដល់ស្រទាប់យុវជនមុនពេញថ្ងៃនេះមកដល់ ។
គេសង្កេតឃើញថា នៅតាមបណ្តោយវិថីព្រះសីហនុមានកន្លែងលក់ផ្កាជាច្រើនកន្លែងដែរ តែហាក់ដូចមិនសូវឃើញក្រុមយុវ័យនាំគ្នាមកទិញផ្កានោះទេ វាខុសពីបណ្តាឆ្នាំមុនៗ ដែលក្រុមយុវ័យសម្រុកទិញផ្កាជូនមិត្តនារីតាមសាលាយ៉ាងពពាក់ពពូន ។
ថ្ងៃទី១៤ កុម្ភៈ នេះដែរ គឺជាថ្ងៃនែក្តីស្រឡាញ់ ឬ Valentine’ Day ដែលពិភពលោកបានប្រារព្ធធ្វើឡើង។ ជាក់ស្តែងនៅថ្ងៃទី១៤ ខែកុម្ភៈ ឆ្នាំ ២០២០នេះដែរ នៅក្នុងប្រទេសកម្ពុជារបស់យើង ក៏ដូចជាបណ្តាប្រទេសនៅលើសកលលោកក៏បានប្រារព្ធទិវាថ្ងៃនៃក្តីស្រឡាញ់នេះផងដែរ។
គួបញ្ជាក់ថា ៖ ក្នុងសេចក្តីណែនាំរបស់ក្រសួងអប់រំ យុវជន និងកីឡា នាថ្ងៃទី១៤ ខែកុម្ភៈ ឆ្នាំ២០២០
នេះ ក្រសួងសង្កេតឃើញថា សិស្សានុសិស្សមួយចំនួនតូចយល់ច្រឡំថា ថ្ងៃ១៤ ខែកុម្ភៈ ជាថ្ងៃបុណ្យសង្សារ ឬជាថ្ងៃណាត់ជួបគ្នារវាងគូស្នេហ៍ ភ្លើតភ្លើន ភ្លេចការសិក្សា បាត់បង់សេចក្តីថ្លៃថ្នូរបុគ្គល និងក្រុមគ្រួសារ ប្រាសចាកពីវប្បធម៌ និងប្រពៃណីជាតិរបស់ខ្មែរជាដើម។
ករណីនេះ ក្រសួងអប់រំអំពាវនាវទៅថ្នាក់គ្រប់គ្រងសាលាសិក្សាសាធារណៈ និងឯកជន ត្រូវពង្រឹងការអនុវត្តបទបញ្ជាផ្ទៃក្នុង និងធ្វើការណែនាំពីវិធានការទប់ស្កាត់សកម្មភាពមិនប្រក្រតីក្នុងថ្ងៃ១៤ ខែកុម្ភៈ តាមរយៈការផ្សព្វផ្សាយដល់សិស្សគ្រប់មធ្យោបាយ ប្រាប់ទៅសិស្សនៅកន្លែងប្រជុំ នៅដងទង់ជាតិ ដើម្បីកុំឱ្យយល់ខុសពីអត្ថន័យនៃទិវានៃក្តីស្រលាញ់ ពង្រឹងផ្នែកសីលធម៌សិស្សដោយតាមដានវត្តមានរបស់សិស្សជាប្រចាំ ជំរុញទៅក្រុមប្រឹក្សាដំណើរការ ក្រុមប្រឹក្សាយុវជន ក្រុមប្រឹក្សាកុមារ ដោយអនុវត្តសកម្មភាព «មិត្តអប់រំមិត្ត» និងទំនាក់ទំនងទៅអាណាព្យាបាលសិស្ស ដើម្បីកែលំអសិស្សានុសិស្សឱ្យបានទាន់ពេលវេលា
«សូមកុំប្រព្រឹត្តអ្វីដែលអាចធ្វើឲ្យយើងសោកស្តាយមួយជីវិត» ៕ (កែសម្រួលដោយ ៖ ធីតា)
ចែករំលែកព័តមាននេះ