រាជធានីភ្នំពេញ ៖ សាលាដំបូងរាជធានីភ្នំពេញ បានបន្តបើកសវនាការជំនុំជម្រះលើសំណុំរឿងអតីតប្រធានគណបក្សសង្គ្រោះជាតិ លោក កឹម សុខា នៅថ្ងៃទី១នៃសប្ដាហ៍ទី៥ ដែលត្រូវនឹងថ្ងៃទី១២ ខែកុម្ភៈ…
រាជធានីភ្នំពេញ ៖ សាលាដំបូងរាជធានីភ្នំពេញ បានបន្តបើកសវនាការជំនុំជម្រះលើសំណុំរឿងអតីតប្រធានគណបក្សសង្គ្រោះជាតិ លោក កឹម សុខា នៅថ្ងៃទី១នៃសប្ដាហ៍ទី៥ ដែលត្រូវនឹងថ្ងៃទី១២ ខែកុម្ភៈ ។ ក្នុងសវនាការនាវេលាព្រឹក ក្រុមមេធាវីការពារក្តីលោក កឹម សុខា បានបន្តធ្វើការជំទាស់នឹងការប្រើប្រាស់ភ័ស្តុតាងដែលបានពីប្រភពអនាមិកឈ្មោះកូនខ្មែរ ប៉ុន្តែខាងតំណាងអយ្យការសាលាដំបូងរាជធានីភ្នំពេញ លោក ប្លង់ សុផល អះអាងថា ភ័ស្តុតាងនេះនៅតែមានតម្លៃមិនអាចមោឃភាពបានទេ ។ ការសួរដេញដោលរឿងភ័ស្តុតាងនេះ បានប្រើពេលវេលាអស់ជាង១ម៉ោង ។
ក្នុងសវនាការនោះដែរ ខាងតំណាងអយ្យការ បានចោទសួរអំពីប្រវត្តិទំនាក់ទំនងរវាងលោក កឹម សុខា និងលោក សម រង្ស៊ី និងមានការចរចាគ្នារបៀបណាខ្លះទម្រាំឈានដល់បង្កើតគណបក្សសង្គ្រោះជាតិ និងហេតុអ្វីបានជានៅតែរក្សាទុកគណបក្សសិទ្ធិមនុស្ស និងគណបក្ស សម រង្ស៊ីទៀត ? លោក កឹម សុខា បានឆ្លើយថា ការមិនរំលាយគណបក្សទាំងពីរ ព្រោះចង់រក្សាអាសនៈដែលបានពីការបោះឆ្នោតមុនការរួបរួមគ្នា ។
តំណាងអយ្យការ ក៏បានចោទសួរអំពីការចេញសេចក្ដីថ្លែងការណ៍រួមពេលបង្កើតគណបក្សសង្គ្រោះជាតិដែរថា ហេតុអ្វីបានជាសេចក្ដីថ្លែងការណ៍នោះប្រកាសថា នឹងសង្គ្រោះប្រទេសកម្ពុជាឲ្យទាន់ពេលវេលា បញ្ចប់អំណាចដែលបានបម្រើបរទេសឈ្លានពាន ។ ក្នុងពេលនោះ ខាងភាគីមេធាវីរាជរដ្ឋាភិបាលក៏បានស្នើ
ឲ្យចាក់ឃ្លីបវីដេអូមួយ ដែលមានរូបលោក សមរង្ស៊ី អំពាវនាវឲ្យប្រជាពលរដ្ឋងើបបះបោរ និងឲ្យកម្លាំងទាហានចូលរួមផ្ដួលរំលំរាជរដ្ឋាភិបាល ជាដើម ។
ក្រោយការចាក់ឃ្លីបវីដេអូនេះ តំណាងអយ្យការបានចោទសួរថា តើលោក កឹម សុខា មានជំហរដូចលោក សម រង្ស៊ី ដែរឬយ៉ាងណា ? ប៉ុន្តែអតីតមេបក្សប្រឆាំងរូបនេះបានបដិសេធថា លោកគ្មានជំហរបែបនោះទេ គឺជំហរចង់ឲ្យមានការផ្លាស់ប្ដូរតាមបែបប្រជាធិបតេយ្យ និងការបោះឆ្នោតដោយសេរីត្រឹមត្រូវ និងយុត្តិធម៌ មិនមែនជាការដឹកនាំធ្វើបដិវត្តន៍ពណ៌ឡើយ ៕
ចែករំលែកព័តមាននេះ