រាជធានីភ្នំពេញ ៖ អភិបាលខេត្តព្រះសីហនុ លោកគួច ចំរើន បានបញ្ជាក់ថា ប្រជាពលរដ្ឋដែលមកលេងឆ្នេរកំពង់សោម អាចក្រាលកន្ទេល ឬតង់តាមឆ្នេរសមុទ្របានដោយសេរី ដោយមិនអស់លុយ ។ លោកបានសរសេរលើបណ្តាញសង្គម នៅថ្ងៃទី១១ កុម្ភៈយ៉ាងដូច្នេះថា៖«ប្រជាពលរដ្ឋដែលមកកម្សាន្ដតាមឆ្នេរសមុទ្រចង់ក្រាលកន្ទេល ក្រាលតង់ អង្គុយលេងបានដោយសេរី មិនគិតសេវាឡើយ តែត្រូវ ទុកដាក់វេចខ្ចប់សំរាមអោយបានស្អាត»។
នៅក្នុងពិធីប្រកាសដាក់ឱ្យដំណើរការរចនាសម្ព័ន្ធថ្មី រដ្ឋបាលក្រុងព្រះសីហនុ នាថ្ងៃទី១១ ខែកុម្ភៈនេះលោក គួច ចំរើន បានបញ្ជាក់ថា ឆ្នេរសមុទ្រ គឺជាឆ្នេរសាធារណៈ ហើយបងប្អូនដែលមកលេកម្សាន្ដ អាចក្រាលកន្ទេល អង្គុយលេង ញាំអាហារបាន ដោយគ្មានបង់សេវាឡើយ ហើយមិនអនុញ្ញាតអោយមានការវាតទី ធ្វើជាកម្មសិទ្ធរបស់បុគ្គលណាមួយឡើយ តែអាចដាក់ជាកន្ទេល ។
សម្រាប់អោយបងប្អូនមកពីឆ្ងាយអាចជួលអង្គុយ ដោយត្រូវគិតសេវាសមរម្យ កន្ទេល១តម្លៃ ២,០០០ ឬ ៣,០០០រៀល ជាដើមក៏ជាការចូលរួមអោយអ្នកមកលេងទុកដាក់សំរាមនៅមួយកន្លែង និងវេចខ្ចប់សម្អាតបានល្អ ៕ កែសម្រួលដោយ ៖ សុឃាក់
ចែករំលែកព័តមាននេះ