រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា បន្ទប់ថ្មប្រក់ស័ង្កសីចំនួន៤បន្ទប់នៅជាន់ទី៣ ក្នុងផ្ទះសំណាក់ «ឃីហេង» ត្រូវបានអណ្តាតភ្លើងឆេះរាលដាល បណ្តាលមកពីឆ្លងចរន្តអគ្គិសនី បង្កឲ្យមានការភ្ញាក់ផ្អើលយ៉ាងខ្លាំងកាលពីម៉ោង៩និង១៥នាទីយប់ ថ្ងៃទី១០…
រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា បន្ទប់ថ្មប្រក់ស័ង្កសីចំនួន៤បន្ទប់នៅជាន់ទី៣ ក្នុងផ្ទះសំណាក់ «ឃីហេង» ត្រូវបានអណ្តាតភ្លើងឆេះរាលដាល បណ្តាលមកពីឆ្លងចរន្តអគ្គិសនី បង្កឲ្យមានការភ្ញាក់ផ្អើលយ៉ាងខ្លាំងកាលពីម៉ោង៩និង១៥នាទីយប់ ថ្ងៃទី១០ ខែកុម្ភៈ ឆ្នាំ២០២០ ត្រង់ចំណុចផ្ទះលេខ98E0 ជាន់ទី៣ ផ្លូវលេខ៨១ ក្រុមទី៤០ ភូមិ១០ សង្កាត់បឹងរាំង ខណ្ឌដូនពេញ។
សេចក្តីរាយការណ៍បន្តថា ម្ចាស់ផ្ទះសំណាក់ «ឃី ហេង» ខាងលើនេះមានឈ្មោះ ពៅ ហុង ភេទប្រុស អាយុ៤៩ឆ្នាំ។
តាមប្រភពពីសមត្ថកិច្ចមូលដ្ឋានបានរៀបរាប់ឲ្យដឹងថា នៅមុនកើតហេតុ ខណៈពេលដែលបន្ទប់កើតហេតុខាងលើ គ្មានភ្លៀវចូលមកសំរាក គេបានឃើញមានផ្សែងហុយខ្មួលខ្មាញ់ចេញមកពីក្នុងបន្ទប់នៅជាន់ទី៣។ មួយសន្ទុះក្រោយមក ក៏លេចចេញជាអណ្ដាតភ្លើងឆេះឆាបក្នុងបន្ទប់កើតហេតុនោះយ៉ាងសន្ធោសន្ធៅតែម្តង បង្កឲ្យមានការភ្ញាក់ផ្អើលដល់ប្រជាពលរដ្ឋនាំគ្នារាយការណ៍ជូនសមត្ថកិច្ចមូលដ្ឋាន និងរថយន្តពន្លត់អគ្គិភ័យឲ្យចុះមកធ្វើការអន្តរាគមន៍បាញ់ទឹកពន្លត់។
ប្រភពដដែលបន្តថា បន្ទាប់មកអណ្ដាតភ្លើងក៏បានឆាបឆេះរាលដាលពីបន្ទប់មួយទៅបន្ទប់មួយទៀត ស្របពេលជាមួយគ្នានោះដែរ ក៏មានសមត្ថកិច្ចមូលដ្ឋាន រួមជាមួយនឹងរថយន្តពន្លត់អគ្គិភ័យជាច្រើនគ្រឿងបានចុះមកធ្វើការអន្តរាគមន៍បាញ់ទឹកពន្លត់ផងដែរ។ លុះរហូតដល់ម៉ោង៩និង៤៥នាទីយប់ថ្ងៃដដែល ទើបអណ្តាតភ្លើងនោះបានរលត់ទៅវិញជាស្ថាពរតែម្ដង។
ប្រភពដដែលបន្តទៀតថា ក្នុងហេតុការណ៍អគ្គិភ័យខាងលើនេះ សមត្ថកិច្ចបានប្រើប្រាស់រថយន្តពន្លត់អគ្គិភ័យចំនួន១០រថយន្ត និងប្រើប្រាស់ទឹកបាញ់អស់ចំនួន៨គ្រឿង។ ហើយចំពោះមូលហេតុ គឺបណ្តាលមកពីឆ្លងចរន្តអគ្គិសនី ទើបបង្កឲ្យកើតមានជាអណ្ដាតភ្លើងឆាបឆេះតែម្តង ធ្វើឱ្យឆាបឆេះបន្ទប់ទំហំ២ម៉ែត្រគុណ២ម៉ែត្រចំនួន៤បន្ទប់ ខូចខាតអស់ទាំងស្រុង តែមិនបង្កឲ្យមាននរណាម្នាក់រងរបួសនោះទេ៕ (កែសម្រួលដោយ ៖ បុប្ផា)
ចែករំលែកព័តមាននេះ