ប្រទេសចិន ៖ នាយករដ្ឋមន្ត្រីចិនលោកLI KEQIANGកាលពីថ្ងៃទី៩ ខែកុម្ភៈ បានសង្កត់ធ្ងន់លើការស្រាវជ្រាវខាងវិទ្យាសាស្ត្រ ដើម្បីដណ្ដើមយកជោគជ័យលើការតស៊ូប្រឆាំងការឆ្លងរាលដាលនៃវីរុសកូរ៉ូណាថ្មី។ លោកLIថ្លែងបែបនេះក្នុងឱកាសចុះទៅពិនិត្យវិទ្យាស្ថានជីវសាស្ត្រនៃទីភ្នាក់ងារប្រឆាំងជំងឺឆ្លង នៃបណ្ឌិតសភាវិទ្យាសាស្ត្រវេជ្ជសាស្ត្រចិន។ បន្ទាប់ពីស្ដាប់របាយការណ៍នានា…
ប្រទេសចិន ៖ នាយករដ្ឋមន្ត្រីចិនលោកLI KEQIANGកាលពីថ្ងៃទី៩ ខែកុម្ភៈ បានសង្កត់ធ្ងន់លើការស្រាវជ្រាវខាងវិទ្យាសាស្ត្រ ដើម្បីដណ្ដើមយកជោគជ័យលើការតស៊ូប្រឆាំងការឆ្លងរាលដាលនៃវីរុសកូរ៉ូណាថ្មី។
លោកLIថ្លែងបែបនេះក្នុងឱកាសចុះទៅពិនិត្យវិទ្យាស្ថានជីវសាស្ត្រនៃទីភ្នាក់ងារប្រឆាំងជំងឺឆ្លង នៃបណ្ឌិតសភាវិទ្យាសាស្ត្រវេជ្ជសាស្ត្រចិន។ បន្ទាប់ពីស្ដាប់របាយការណ៍នានា ទាក់ទិននឹងភាពជឿនលឿនទៅមុខ ក្នុងការស្រាវជ្រាវលើការបង្ការនិងការត្រួតពិនិត្យការឆ្លង លោកLIបានសម្ដែងការដឹងគុណ ចំពោះបណ្ដាអ្នកស្រាវជ្រាវដោយសារការតាំងចិត្តនិងការងារដ៏សកម្មរបស់ពួកគេ។
លោកថាគេត្រូវឲ្យមានសកម្មភាពជាតិនិងការជួយទ្រទ្រង់ខាងវិទ្យាសាស្ត្រ ដើម្បីតស៊ូប្រឆាំងវីរុស។ លោកអំពាវនាវឲ្យមានការខិតខំប្រឹងប្រេង ដើម្បីប្រមូលបណ្ដាធនធានប្រសើរៗ ខាងការស្រាវជ្រាវវិទ្យាសាស្ត្រដើម្បីឆ្លើយតប ចំពោះការប្រឈមបន្ទាន់នានា ក្នុងការបង្ការនិងត្រួតពិនិត្យការឆ្លង។
នាយករដ្ឋមន្ត្រីចិនសង្កត់ធ្ងន់លើតួនាទីសំខាន់នៃឱសថដែលមានប្រសិទ្ធភាពទាំងឡាយក្នុងការព្យាបាល អ្នកជំងឹនិងកាត់បន្ថយការស្លាប់។
អ្នកជំងឺ៣.២៨១នាក់ចាកចេញពីមន្ទីរពេទ្យ
អាជ្ញាធរសុខាភិបាលចិនរាយការណ៍នាថ្ងៃទី១០កុម្ភៈថា មកដល់ចុងថ្ងៃទី៩កុម្ភៈអ្នកជំងឺសរុប៣.២៨១នាក់ ដែលឆ្លងវីរុសកូរ៉ូណាថ្មីអាចចាកចេញពីមន្ទីរពេទ្យក្រោយពីព្យាបាលជាសះស្បើយ។
ក្នុងរបាយការណ៍ប្រចាំថ្ងៃរបស់ខ្លួន គណៈកម្មាធិការសុខាភិបាលជាតិចិនធ្វើការកត់សម្គាល់ថា មនុស្សប្រមាណជា៦៣២នាក់បានចាកចេញពីមន្ទីរពេទ្យនាថ្ងៃទី៩កុម្ភៈ ក្នុងនោះ៣៥៦នាក់នៅហ៊ូប៉ី។
ពុំមានភស្ដុតាងនៃការឆ្លងវីរុសតាមខ្យល់
អ្នកជំនាញការចិនម្នាក់ថ្លែងកាលពីថ្ងៃទី៩កុម្ភៈថា វីរុសកូរ៉ូណាថ្មីជាទូទៅមិនអាចរស់នៅបានយូរក្នុងខ្យល់ឡើយ រួចពុំមានភស្ដុតាងណាមួយសម្រាប់ពេលនេះបង្ហាញថា វីរុសកូរ៉ូណាថ្មី អាចឆ្លងតាមខ្យល់នៅឡើយ។
លោកFENG LUZHAOអ្នកស្រាវជ្រាវនៅមជ្ឈមណ្ឌលត្រួតពិនិត្យនិងបង្ការជំងឺចិនអះអាងបែបនេះ ក្នុងឱកាសនៃសន្និសីទសារព័ត៌មានមួយ។ លោកថាបច្ចុប្បន្នវីរុសឆ្លងជាពិសេសតាមរយៈដំណក់តូចៗ ដែលបញ្ចេញពីប្រព័ន្ធដកដង្ហើមនិងការប៉ះពាល់អ្នកជំងឺដោយផ្ទាល់។ លោកបន្តថា វីរុសជាទូទៅឆ្លងក្នុងរង្វង់រវាងពី១ទៅ២ម៉ែត្រពីអ្នកជំងឺ ។
លោកបានណែនាំដល់មនុស្សម្នាឲ្យប្រើប្រាស់កូនកន្សែងឬដៃខ្តប់មាត់និងច្រមុះ ពេលក្អកឬកណ្ដាសចៀសវាងការបញ្ចេញដំណាក់តូចៗពីប្រព័ន្ធដកដង្ហើមជាប្រភពនៃការចម្លង៕ ដកស្រង់ចេញពីវេបសាយ ៖ xinhuanet (កែសម្រួលដោយ ៖ បុប្ផា)
ចែករំលែកព័តមាននេះ