រាជធានីភ្នំពេញ ៖ លោក ហេង សួរ អ្នកនាំពាក្យការងារ និងបណ្ដុះបណ្ដាលវិជ្ជាជីវៈបានមានប្រសាសន៍តាមប្រព័ន្ធតេឡេក្រាមអោយដឹងថា នៅខែមីនា ឬខែមេសាខាងមុខនេះអាចនឹងមានរោងចក្រជាបន្តបន្ទាប់បិទ ឬផ្អាកដំណើរការដែលធ្វើអោយបុគ្គលិក កម្មករ កម្មការិនីមួយអត់ការងារ តែកត្តានេះសូមកុំយល់ច្រលំថាវា បណ្ដាលមកពី EBA នោះទេ ។
លោកបន្តថា បើសិនជាមានការបិទ ឬផ្អាកដំណើរការរោងចក្រដែលធ្វើអោយកម្មករ កម្មការិនីរោងចក្រអត់ការងារនោះទេ គឺបណ្ដាលពីវីរុសកូរ៉ូណាទៅវិញ ។ លោកនិយាយថា៖ « នៅពេលវីរុសកូរ៉ូណាបានរាតត្បាតនៅប្រទេសចិន បណ្ដារោងកច្រផលិតក្រណាត់មួយចំនួននៅចិនត្រូវបានផ្អាក ឬបិទ ដោយមិនមានបុគ្គលិកធ្វើការ ហើយវត្ថុធាតុដើមដែលបម្រើក្នុងវិស័យឧស្សាហកម្មកាត់ដេរនៅកម្ពុជា គឺយកពីប្រទេសចិន ដូច្នេះបើសិនជាវីរុសនេះកាន់តែរីកដាលកាន់តែធំ នោះដំណើរការផលិតវត្ថុធាតុដើម សម្រាប់បម្រើក្នុងវិស័យឧស្សាហកម្មកាត់ដេរ ដូច្នេះរោងចក្រនៅកម្ពុជានឹងអត់មានវត្ថុធាតុដើម ដើម្បីផលិតទៀត អញ្ចឹងវាត្រូវតែផ្អាកមួយរយៈ» ។
លោកបន្ថែមថា នៅចំពោះមុខមិនថា រោងចក្រនៅកម្ពុជា ឬរោងចក្រនៅប្រទេសផ្សេងទៀតនោះទេ ដែលពឹងវត្ថុធាតុដើមពីប្រទេសចិននេះ គឺត្រូវការពេល៤០ថ្ងៃ សម្រាប់ការទទួលបានវត្ថុដើមពីប្រទេសចិន ដើម្បីយកមកធ្វើជាធាតុចូលចង្វាក់ផលិតកម្មរបស់ខ្លួន ។ ដោយឡែកសម្រាប់រោងចក្រកាត់ដេរនៅកម្ពុជាភាគច្រើនយកក្រណាត់ពីប្រទេសចិន ។ តែក្រោយពេលចូលឆ្នាំចិនរោងចក្រផលិតក្រណាត់នៅប្រទេសចិនបានបិទទាំងស្រុក បន្ទាប់ពីមានការផ្ទុះវីរុសកូរ៉ណា ។
បើតាមលោកអាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា (ស៊ីខៅឌូ) បានអោយដឹងថា វិបត្តិនៃឧស្សាហកម្មរោងចក្រកាត់ដេរអាចនឹងកើតឡើង ហើយធ្ងន់ធ្ងរដោយសារតែទី១ ភាពមិនច្បាស់លាស់នៃប្រព័ន្ធអនុគ្រោះពន្ធពីអឺរ៉ុប និងទី២ វិបត្តិនៃការឆ្លងរាលដាលនៃវីរុសកូរ៉ូណា ។ ជាការពិតណាស់ រាល់វត្ថុធាតុដើមសម្រាប់បម្រើក្នុងវិស័យឧស្សាហកម្មកាត់ដេរកម្ពុជា ភាគច្រើនត្រូវនាំចូលពីប្រទេសចិន ក្នុងនោះមានប្រមាណ៨០ភាគរយទៅហើយ ដោយឡែកប្រទេសផ្សេងទៀតដូចជា ឥណ្ឌូនេស៊ី និងវៀតណាមជាដើម ក៏ប៉ុន្តែប្រទេសទាំងនោះក៏យកវត្ថុធាតុដើមពីប្រទេសចិនមកផ្គត់ផ្គង់ដូចគ្នា ដូច្នេះបើសិនជាមានការបិទរោងចក្រនៅប្រទេសចិនដោយសារតែបញ្ហាវីរុសកូរ៉ូណា នោះការផ្គត់ផ្គង់ទៅប្រទេសវៀតណាម និងឥណ្ឌូនេស៊ីនឹងខ្វះខាតដូចគ្នាផងដែរ ។
លោកបន្ត បើសិនជារោងចក្របានបិទ និងផ្អាកមែននោះ វិបត្តិនៃការអត់ការងារពីសំណាក់កម្មករ កម្មការិនីក្នុងប្រទេសកម្ពុជានឹងកាន់តែកើនឡើង ហើយវាកាន់តែធ្ងន់ធ្ងរ ពេលនោះជំលោះរវាងថៅកែ និងកម្មករនឹងកាន់តែឡើងក្ដៅដោយសារតែកម្មករនឹងទាមទារយកប្រាក់អតីតភាពរបស់ខ្លួន អំឡុងពេលខ្លួនធ្វើការនៅក្នុងរោងចក្រនោះ ៕
ចែករំលែកព័តមាននេះ