ខេត្តកំពង់ឆ្នាំង ៖ ប្រជាពលរដ្ឋជាម្ចាស់ដីបានផ្ទុះការតវ៉ា ខណៈដែលរដ្ឋបាលសាលាខេត្តកំពង់ឆ្នាំងបានប្រើគ្រឿងចក្រទៅឈូសព័ទ្ធយកដីរបស់ពួកគាត់នៅចំណុចរង្វង់មូលទូកថ្មី ក្នុងភូមិទី៧ សង្កាត់ខ្សាម ក្រុងកំពង់ឆ្នាំង ។ ជាការកត់សម្គាល់ការដាក់គ្រឿងចក្រទៅឈូសព័ទ្ធយកដីប្រជាពលរដ្ឋ នៅព្រឹកថ្ងៃទី០៥…
ខេត្តកំពង់ឆ្នាំង ៖ ប្រជាពលរដ្ឋជាម្ចាស់ដីបានផ្ទុះការតវ៉ា ខណៈដែលរដ្ឋបាលសាលាខេត្តកំពង់ឆ្នាំងបានប្រើគ្រឿងចក្រទៅឈូសព័ទ្ធយកដីរបស់ពួកគាត់នៅចំណុចរង្វង់មូលទូកថ្មី ក្នុងភូមិទី៧ សង្កាត់ខ្សាម ក្រុងកំពង់ឆ្នាំង ។ ជាការកត់សម្គាល់ការដាក់គ្រឿងចក្រទៅឈូសព័ទ្ធយកដីប្រជាពលរដ្ឋ នៅព្រឹកថ្ងៃទី០៥ ខែកុម្ភៈនេះ រដ្ឋបាលសាលាខេត្តក៏បានដាក់កម្លាំងនគរបាល កងរាជអាវុធហត្ថ ដើម្បីត្រៀមទប់ទល់ជាមួយប្រជាពលរដ្ឋផងដែរ ។
លោក ងួន ប៊ុនឈួន ដែលជាម្ចាស់ដីបានឲ្យដឹងថា ៖ រដ្ឋបាលសាលាខេត្តកំពង់ឆ្នាំងបានយកគ្រឿងចក្រ និងដាក់កងកម្លាំងមានសមត្ថកិច្ចមកឈូសបំពានយកដីរបស់គាត់ មានទំហំ៤០០ម៉ែត្រការ៉េ និងដីរបស់បងគាត់ជាងកន្លះហិកតា ដោយមិនបានជូនដំណឹងអ្វីទាំងអស់ដែលនេះជាការរំលោភសិទ្ធិប្រជាពលរដ្ឋតែម្ដង ។ ដីគាត់បានទិញតពីប្រជាពលរដ្ឋនេះ គឺបានធ្វើប្លង់កម្មសិទ្ធិត្រឹមត្រូវចេញដោយសាលាក្រុងកំពង់ឆ្នាំង ។
លោកបានបញ្ជាក់ថា កន្លងទៅមានការសម្របសម្រួលគ្នា លោកព្រមបរិច្ចាគខ្លះហើយ ប៉ុន្តែពេលនេះមករំលោភយកទាំងស្រុងតែម្តង ដោយគ្មានដំណោះស្រាយអ្វីឡើយ ។ លោកមិនមែនមិនចូលរួមក្នុងការអភិវឌ្ឍរបស់អាជ្ញាធរខេត្តនោះទេ ប្រសិនបើយកទៅធ្វើការអភិវឌ្ឍជាសារធាណៈ ។ ប៉ុន្តែចាំបាច់ត្រូវតែមានសំណងមិនមែនមកយកទទេៗបែបនេះឡើយ ។
ក្នុងនាមលោកជាប្រជាពលរដ្ឋ ជាម្ចាស់ដីសំណូមពរដល់អាជ្ញាធរខេត្តមេត្តាចេញប្លង់ ការអភិវឌ្ឍឱ្យបានច្បាស់លាស់ និងសូមសំណូមពរដល់ប្រមុខរាជរដ្ឋាភិបាលជួយពិនិត្យមើលការអភិវឌ្ឍនៅតំបន់ចុងកោះនេះផង ។ ជាមួយគ្នានោះលោក យ៉ិន វ៉ាន់ ដែលជាម្ចាស់ដីដែលបានបញ្ជាក់ថា គាត់បានត្រូវបានមន្ត្រីសាលាខេត្តព័ទ្ធពាន់យកអស់ដីទំហំ ៣០គុណ និង៥០ ម៉ែត្រទៅហើយ គាត់មិនប្រឆាំងនឹងការអភិវឌ្ឍទេប៉ុន្តែសូមដោះស្រាយឲ្យបានច្បាស់លាស់ និងសមរម្យ ។
ដោយឡែកមន្ត្រីរបស់សាលាខេត្ត និងប្រធានមន្ទីរពាក់ព័ន្ធមួយចំនួនបានគេចខ្លួនមិនព្រមផ្ដល់ការសម្ភាសន៍ជាមួយប្រជាពលរដ្ឋ និងអ្នកកាសែតឡើយនៅសល់តែលោក គង់ សុវណ្ណអស្ចារ្យ ជាមន្ត្រីសាលាខេត្តម្នាក់បានព្រមចេញមុខជួបជាមួយអ្នកកាសែតដោយបានបញ្ជាក់ថា ៖ តំបន់នេះមានការអភិវឌ្ឍពង្រីកបរិវេណជុំវិញរង្វង់មូលទូកឲ្យបានធំទូលាយជាងមុនមានអង្កត់ផ្ចិត៧៥ម៉ែត្រ ស្មើសងខាងរង្វង់មូលទូកទំហំ១៥០ម៉ែត្រ គឺក្នុងគោលបំណងធ្វើជាចំណតរថយន្ត ដើម្បីឱ្យបានធំទូលាយសម្រាប់២០ទៅ៣០ឆ្នាំទៀត មានកំណើនមនុស្សច្រើន ។ លោកធ្វើនេះគឺតាមថ្នាក់លើបញ្ជាទេ មិនមែនធ្វើដោយចិត្តឯង និងដើម្បីប្រយោជន៍ខ្លួនទេ គឺដើម្បីប្រយោជន៍រួម តើ………..។
យ៉ាងនេះក្តីលោក គង់ សុវណ្ណអស្ចារ្យ មិនហ៊ានប្រាប់ថា នរណាជាអ្នកបញ្ជាពីលើឡើយដោយលាក់លៀម ដោយគ្រាន់តែនិយាយថា ថ្នាក់លើតែប៉ុណ្ណោះធ្វើឱ្យប្រជាពលរដ្ឋក៏ដូចជា អ្នកសារព័ត៌មានមានចម្ងល់ថា តើថ្នាក់លើជាអ្នកណាបានយកគ្រឿងចក្រប្រដាប់ដោយកម្លាំងសមត្ថកិច្ចមកឈូសឆាយដីប្រជាពលរដ្ឋបែបនេះ ។
គួរបញ្ជាក់ថា នេះជាលើកទី២ហើយ បន្ទាប់ពីកាលពី៣ថ្ងៃមុន គឺកាលពីថ្ងៃទី០២ ខែកុម្ភៈ មន្ត្រីសាលាខេត្តបានដាក់គ្រឿងចក្រមកឈូសព័ទ្ធយកដីប្រជាពលរដ្ឋមួយសារហើយ តែប្រជាពលរដ្ឋ តវ៉ា ដកថយទៅវិញ ប៉ុន្តែលើកនេះបានដាក់គ្រឿងចក្រមកដោយបន្ថែមកងកម្លាំង នគរបាល និងកងរាជអាវុធហត្ថមកជាមួយផង ក្នុងគោលបំណងយ៉ាងណានោះ គឺមានអាចដឹងបានឡើយ ។ តែយ៉ាងនេះក្តីនៅព្រឹកនោះ បន្ទាប់មានការតវ៉ា និងសួររកអ្នកបញ្ជាសួររកប្លង់អភិវឌ្ឍន៍រង្វង់មូល រួចមក កម្លាំងសមត្ថកិច្ច និងមន្ត្រីសាលាខេត្ត ប្រធានមន្ទីរពាក់ព័ន្ធបានដកថយទៅវិញអស់ ។ ព័ត៌មានបន្ថែមមានផ្សាយជូនកាសែតកោះសន្តិភាព ៕
ចែករំលែកព័តមាននេះ