ខេត្តព្រះសីហនុ ៖ នេះជាផ្លូវបេតុងបែកពីផ្លូវជាតិលេខ៤ចុះទៅកោះខ្យង មានចម្ងាយប្រមាណជាង៧គីឡូម៉ែត្រ ឆ្លងកាត់ឃុំចំនួន៣ គឺឃុំអូរឧកញ៉ាហេង ឃុំបឹងតាព្រហ្ម និងឃុំអូរជ្រៅ ស្ថិតក្នុងស្រុកព្រៃនប់ ខេត្តព្រះសីហនុ ដែលអាជ្ញាធរស្រុកតម្រូវអោយប្រជាពលរដ្ឋថយសំណង់ផ្សេងៗពីអ័ក្សទ្រូងផ្លូវ១៥ម៉ែត្រទាំងសងខាង ប្រយោជន៍រក្សាទំហំផ្លូវអោយធំទូលាយ និងហាមមិនអោយមានការសាងសង់សំណង់ថ្មីប៉ះលើចិញ្ចើមផ្លូវតាមការកំណត់ដូចខាងលើនេះទេ ។
ក្រោយពីអាជ្ញាធរចុះបាញ់គំនូសកំណត់ទីតម្រូវអោយរុះរើសំណង់ ក៏មានប្រជាពលរដ្ឋមួយចំនួនដែលមានលំនៅដ្ឋានប៉ះពាល់នឹងគម្រោងនេះបានប្រតិកម្មក្រោមហេតុផលថា ផ្ទះខ្លះសង់យូរមកឆ្នាំហើយ និងខ្លះទៀតថាគម្រោងនេះប៉ះផ្ទះខ្លះទាំងស្រុងក៏មាន រួចលើកជាសំណូមពរសុំអោយអាជ្ញាធរពិនិត្យសម្រួលឡើងវិញដូចជាបង្រួមអ័ក្សផ្លូវអោយខ្លីតិចជាង១៥ម៉ែត្រជាដើម។
លោកសរ កក្កដា អភិបាលស្រុកព្រៃនប់ថ្លែងថា បច្ចុប្បន្ននៅតាមផ្លូវនេះមានសំណង់ខ្លះបានសង់មកដល់ចិញ្ចើមផ្លូវបេតុងទៅហើយ ក្នុងនោះត្រង់ចំណុចប្រជុំជនដូចជានៅផ្សារបឹងតាព្រហ្មជាដើម ដោយសារតែការសាងសង់ផ្ទះលក់ដូរជាប់នឹងផ្លូវផង រួមនឹងការឈប់ចតម៉ូតូ រថយន្តលើផ្លូវផង ធ្វើអោយផ្លូវតូចចង្អៀត ។
លោកអភិបាលស្រុកបញ្ជាក់ថា គម្រោងរៀបចំរក្សាចិញ្ចើមផ្លូវរហូតដល់១៥ម៉ែត្រពីអ័ក្សទ្រូងផ្លូវនេះ គឺធ្វើឡើងតាមគំរូប្លង់គោលនៃផ្លូវនេះ និងធ្វើការទប់ស្កាត់ជាមុនក្នុងការសាងសង់សំណង់ថ្មីៗនាពេលបច្ចុប្បន្ន មិនអោយសង់ដល់ចិញ្ចើមផ្លូវបេតុង។ បើតាមលោកអភិបាលស្រុកថា អ្វីដែលធ្វើនាពេលនេះគឺដើម្បីប្រយោជន៍សាធារណៈ និងសុំអោយប្រជាពលរដ្ឋយោគយល់ចូលរួមទាំងអស់គ្នា ដើម្បីបានផ្លូវធំទូលាយ ៕ (កែសម្រួលដោយ ៖ ធីតា)
ចែករំលែកព័តមាននេះ