ខេត្តបាត់ដំបង ៖ កម្លាំងសមត្ថកិច្ចបាននិងកំពុងតាមចាប់ខ្លួនជនសង្ស័យចំនួន២នាក់ ដែលជិះម៉ូតូតាមកាប់យ៉ាងសាហាវ បណ្ដាលឱ្យយុវជនម្នាក់បាត់បង់ជីវិត និងម្នាក់ទៀតរងរបួស កាលពីយប់ថ្ងៃទី២៩ មករា នៅលើដងផ្លូវមួយកន្លែងនៅក្នុងភូមិបោះពោធិ៍ ឃុំអូរដំបង១…
ខេត្តបាត់ដំបង ៖ កម្លាំងសមត្ថកិច្ចបាននិងកំពុងតាមចាប់ខ្លួនជនសង្ស័យចំនួន២នាក់ ដែលជិះម៉ូតូតាមកាប់យ៉ាងសាហាវ បណ្ដាលឱ្យយុវជនម្នាក់បាត់បង់ជីវិត និងម្នាក់ទៀតរងរបួស កាលពីយប់ថ្ងៃទី២៩ មករា នៅលើដងផ្លូវមួយកន្លែងនៅក្នុងភូមិបោះពោធិ៍ ឃុំអូរដំបង១ ស្រុកសង្កែ ។
មន្ត្រីការិយាល័យព្រហ្មទណ្ឌកំរិតធ្ងន់បាននិយាយថា អំពើនេះ បង្កឡើងដោយពួកក្មេងទំនើង២នាក់ដែលគេមិនទាន់ស្គាល់អត្តសញ្ញាណនៅឡើយ ។ ពួកគេបានជិះម៉ូតូដេញតាមកាប់ទៅលើយុវជន២នាក់ទៀត ដែលកំពុងជិះម៉ូតូដែរបណ្ដាលឲ្យម្នាក់បាត់បង់ជីវិត និងម្នាក់ទៀតរងរបួស ហើយជនដៃដល់បានជិះម៉ូតូគេចខ្លួនបាត់ទាំងយប់ ។
មន្ត្រីដដែលបានបញ្ជាក់ថា បើតាមការស្រាវជ្រាវបឋមជនសង្ស័យជិះម៉ូតូម៉ាកអុីសិចទ័រ ពណ៌ខៀវ គ្មានស្លាកលេខ តែអ្នកជិះក្រោយមានកាន់កាំបិតវែង ។ យោងតាមរបាយការណ៍សមត្ថកិច្ច ជនរងគ្រោះទាំង២នាក់ ម្នាក់ឈ្មោះ លន់ កែវ ភេទប្រុស អាយុ១៧ឆ្នាំ នៅភូមិអូរដំបង ឃុំអូរដំបង២ ស្រុកសង្កែ រងរបួសក្បាលខាងឆ្វេងយ៉ាងធ្ងន់ធ្ងរ តែបានបាត់បង់ជីវិតពេលបញ្ជូនដល់មន្ទីរពេទ្យខេត្ត និងម្នាក់ទៀតឈ្មោះ ផាន ភក្តី ភេទប្រុស អាយុ១៦ឆ្នាំ នៅភូមិអូរដំបង ឃុំអូរដំបង២ ស្រុកសង្កែ (អ្នកឌុប) រងរបួសក្បាលខាងឆ្វេងមួយកន្លែង៥ថ្នេរ ។
បើតាមមន្ត្រីជំនាញដែលបានស្រង់សំដីជនរងគ្រោះបានឱ្យដឹងថា មុនពេលកើតហេតុជនរងគ្រោះបានជិះម៉ូតូជាក្រុមចំនួន៤គ្រឿង ហើយជនរងគ្រោះបានជិះនៅកណ្ដាល ក្នុងចំណោមទាំង៤គ្រឿងនោះ។ ប៉ុន្តែជិះដល់ចំណុចកើតហេតុ ស្រាប់តែមានជន២នាក់ជិះម៉ូតូតាមមកក្រោយ ហើយដកកាំបិតកាប់ទៅលើជនរងគ្រោះតែម្ដង ។
មន្ត្រីជំនាញបានបញ្ជាក់ថា បើតាមការសាកសួរ និងការស្រាវជ្រាវ ជនដៃដល់អាចមានគំនុំជាមួយជនរងគ្រោះ ទើបពួកគេជិះម៉ូតូតាមកាប់យ៉ាងសាហាវបែបនេះ។ ទោះយ៉ាងណា ពេលនេះ កម្លាំងការិយាល័យជំនាញកំពុងតាមស្រាវជ្រាវ ដើម្បីកំណត់មុខសញ្ញាជនសង្ស័យទាំង២នាក់នោះហើយ ៕
ចែករំលែកព័តមាននេះ