ក្នុងនាមជានាយកប្រតិបត្តិរបស់ក្រុមហ៊ុនប្រព័ន្ធសង្គមដែលធំជាងគេលើលោក និងជាឪពុករបស់កូនស្រីតូចៗពីរនាក់ លោក ម៉ាក ហ្សាក់កាបឺក (Mark Zuckerberg) គឺជាបុគ្គលដែលរវល់ស្ទើរតែគ្មានពេលសម្រាក ។ លោកបានចំណាយពេលជាច្រើនលើការងាររបស់លោក តែលោកនៅតែបានបែងចែកពេលវេលាគ្រប់គ្រាន់សម្រាប់ការធ្វើលំហាត់ប្រាណ ធ្វើដំណើរទេសចរណ៍ និងពេលសម្រាប់គ្រួសារផងដែរ ។ លោកធ្វើដូច្នេះបានដោយលះបង់នូវរាល់ជម្រើសផ្សេងៗដែលមិនសំខាន់ក្នុងជីវិតរបស់លោក និងកំណត់គោលដៅធំៗសម្រាប់ខ្លួន ។ ខាងក្រោមគឺជាការសង្ខេបនៃជីវិតរស់នៅប្រចាំថ្ងៃរបស់លោកមហាសេដ្ឋីខាងលើ ។
ជារៀងរាល់ព្រឹក លោក ហ្សាក់កាបឺក ក្រោកពីដំណេកនៅម៉ោង ៨ព្រឹក និងប្រញាប់ឆែក Facebook Messenger និង WhatsApp លើទូរស័ព្ទរបស់លោកមុនគេមុននឹងចាប់ផ្តើមពាក់ Contact Lense របស់លោក ។ បន្ទាប់ពីលោកទទួលបានព័ត៌មានថ្មីៗហើយ លោកចាប់ផ្តើមលំហាត់ប្រាណរបស់លោកយ៉ាងហោចណាស់ហើយបាន ៣ដងក្នុងមួយសប្តាហ៍ ។ មានពេលខ្លះ លោកនាំកូនឆ្កែរបស់លោកទៅជឫមួយផងដែរ ។
ពេលដែលរួចរាល់ លោកមិនគិតគូរច្រើនពីអាហារពេលព្រឹកទេ ហើយលោកតែងតែទទួលទានអ្វីដែលលោកចង់ទទួលទាននៅថ្ងៃនោះ ។ លោកជាមនុស្សដែលមិនចូលចិត្តខ្ជះខ្ជាយពេលវេលាលើការសម្រេចចិត្តតូចៗនិងមិនសំខាន់ ។ វាជាក៏ជាមូលហេតុដែលលោកតែងតែពាក់អាវយឺតដូចៗគ្នាជារៀងរាល់ថ្ងៃដែរ ។
ជារៀងរាល់សប្តាហ៍ លោកចំណាយពេលប្រមាណពី ៥០ ទៅ ៦០ ម៉ោងសម្រាប់ការងារទាក់ទិននឹង Facebook ប៉ុន្តែលោកតែងតែគិតគូរពីប្រព័ន្ធសង្គមនេះជានិច្ច ។ សារព័ត៌មាន The Verge បានឲ្យដឹងថាលោកមានក្រុមការងារប្រមាណ ១២នាក់ដែលជួយគ្រប់គ្រងប្រព័ន្ធសង្គមរបស់លោកដូចជាលុបបំបាត់ Comments ដែលមិនសមរម្យ និងចែករំលែកព័ត៌មានថ្មីៗជាដើម ។
ពេលដែលលោកមិនធ្វើការ លោកចំណាយពេលវេលាដើម្បីអភិវឌ្ឍន៍ខ្លួនឯង ។ បច្ចុប្បន្ននេះលោកកំពុងតែរៀនភាសាចិន ហើយលោកក៏ព្យាយាមអានសៀវភៅឲ្យបានច្រើនដែរ ៕ កែសម្រួលដោយ ៖ សុឃាក់
ចែករំលែកព័តមាននេះ