ខេត្តស្ទឹងត្រែង ៖ តាមរយៈនៃការអភិវឌ្ឍន៍នូវតំបន់ទេសចរណ៍នានាក្នុងដែនដីភាគឦសាន្តខេត្តស្ទឹងត្រែងភ្ញៀវទេសចរជាតិនិងអន្តរជាតិចំនួនជាង២,៣០០០នាក់ បាននាំគ្នាសម្រុកចូលមកទស្សនា ក្នុងខេត្តស្ទឹងត្រែងក្នុងរយៈពេល៣ថ្ងៃនៃពិធីបុណ្យចូលឆ្នាំថ្មីប្រពៃណីជនជាតិចិន-វៀតណាម ចាប់ពីថ្ងៃទី ២៤មករាដល់ថ្ងៃទី២៦ មករា ឆ្នាំ២០២០ ។
ប្រធានមន្ទីរទេសចរណ៍ខេត្ត លោក អ៊ន ប៉ោសឿន អះអាងថា មានការកើនឡើងជាង៦១% បើធៀបនឹងឆ្នាំកន្លងៗទៅ។ យោងរបាយការណ៍មន្ទីរទេសចរខេត្តស្ទឹងត្រែងបានបង្ហាញថា ស្ថិតិភ្ញៀវទេសចរដែលបានមកទស្សនាខេត្តស្ទឹងត្រែង ក្នុងរយៈពេល៣ថ្ងៃ នាឱកាសបុណ្យចូលឆ្នាំថ្មីប្រពៃណី ជនជាតិចិន និងវៀតណាមគិត ចាប់តាំងពីថ្ងៃទី២៤ មករា ដល់ថ្ងៃទី២៦ មករា ២០២០ លំហូរចូលនៃអ្នកទេសចរជាតិ និងអន្តរជាតិមានចំនួន២ម៉ឺន៣,៨៨៣នាក់ មានការកើនឡើង៩,១២៦នាក់ ។
របាយការណ៍នោះបានបង្ហាញទៀតថា រមណីយដ្ឋានដែលបានបើកទទួលភ្ញៀវទេសចរជាតិ និងអន្តរជាតិនោះ គឺមានចំនួន១៥កន្លែង រួមមាន ១-រមណីយដ្ឋានទេសចរណ៍ សម្រស់សេសាន ២-រមណីយដ្ឋានទេសចរណ៍កោះខ្សាច់សេកុង ៣-រមណីយដ្ឋានទេសចរណ៍ចំការក្រូច ៤-រមណីយដ្ឋានទេសចរណ៍ទឹកឈូជួរចាប ៥-រមណីយដ្ឋានទេសចរណ៍ចំការខេ ៦-រមណីយដ្ឋានទេសចរណ៍បក្សីមេគង្គ ៧-រមណីយដ្ឋានទេសចរណ៍អូរប្ញស្សីកណ្តាល ៨-រមណីយដ្ឋានទេសចរណ៍អន្លង់ផ្សោតឈើទាល ៩-រមណីយដ្ឋានទេសចរណ៍។
កោះសំរោង និងសហគមន៍ទេសចរណ៍មានចំនួន៦កន្លែង ១-សហគមន៍អេកូទេសចរណ៍ បុរីអូរស្វាយ ២- សហគមន៍អេកូទេសចរណ៍សម្រស់កោះហាន ៣-សហគមន៍អេកូទេសចរណ៍ព្រះរំកិល ៤-សហគមន៍អេកូទេសចរណ៍ភ្នំជម្រកសត្វ ៥-សហគមន៍អេកូទេសចរណ៍កោះព្រះ និង៦-សហគមន៍អេកូទេសចរណ៍អូរប្ញស្សីកណ្តាល ដែលសហគមន៍មួយនេះ នឹងធ្វើការកែសម្រួលជារមណីយដ្ឋានទេសចរណ៍ធម្មជាតិអូរប្ញស្សីកណ្តាលវិញនៅពេលខាងមុខនេះ។
របាយកាណ៍ដដែលបានលំអិតនៃចំនួនភ្ញៀវទេសចរជាតិ និងអន្តរជាតិ ដែលចូលមកកម្សាន្តខេត្តស្ទឹងត្រែង ក្នុងនោះ ភ្ញៀវជាតិមានចំនួន២,៣៦៦៤នាក់ កើនឡើង៨,៩៦៦នាក់ ស្មើនឹង៦១% និងទេសចរណ៍អន្តរជាតិ មានចំនួន២១៩ នាក់ កើនឡើង១៦០នាក់ ស្មើនឹង២៧១,១៨ % ទាំងភ្ញៀវជាតិ និងទេសចរអន្តរជាតិ មានចំនួនសរុប២,៣៨៨៣នាក់ គឺមានការកើនឡើង៩,១២៦នាក់ ស្មើនឹង៦១,៨៤% ដូច្នេះ ឃើញថា មានការកើនឡើង បើប្រៀបធៀបនឹងឆ្នាំ២០១៩ កន្លងទៅ៕
ចែករំលែកព័តមាននេះ