ខេត្តប៉ៃលិន ៖ បើគេធ្វើដំណើរចេញពីក្រុងប៉ៃលិនឆ្ពោះទៅទិសខាងលិចឈាងខាងត្បូងចម្ងាយប្រមាន៤ទៅ៥គីឡូម៉ែត្រគេនឹងឃើញមានរមណីយដ្ឋានឯកជនមួយកន្លែង ដែលល្បីល្បាញទូទាំងខេត្តប៉ៃលិនថា មានទេសភាពល្អស្រស់បំព្រង និងមានទឹកអូរសម្រាប់ហែលលេងដែលហូរធ្លាក់មកពីភ្នំផល្លីផល្លាជាប់ប្រទេសថៃ ។ រហូតមកដល់ថ្ងៃទី២៥ ខែមករា ឆ្នាំ២០២០…
ខេត្តប៉ៃលិន ៖ បើគេធ្វើដំណើរចេញពីក្រុងប៉ៃលិនឆ្ពោះទៅទិសខាងលិចឈាងខាងត្បូងចម្ងាយប្រមាន៤ទៅ៥គីឡូម៉ែត្រគេនឹងឃើញមានរមណីយដ្ឋានឯកជនមួយកន្លែង ដែលល្បីល្បាញទូទាំងខេត្តប៉ៃលិនថា មានទេសភាពល្អស្រស់បំព្រង និងមានទឹកអូរសម្រាប់ហែលលេងដែលហូរធ្លាក់មកពីភ្នំផល្លីផល្លាជាប់ប្រទេសថៃ ។
រហូតមកដល់ថ្ងៃទី២៥ ខែមករា ឆ្នាំ២០២០ ដែលជារដូវបុណ្យចូលឆ្នាំចិនវៀតណាម គឺមានភ្ញៀវទេសចរចូលទៅលេងដ៏ច្រើនគួរឱ្យកត់សម្គាល់ ខណ:ផ្លូវចូលទៅលេងទីនោះក៏មានភាពងាយស្រួល រីឯម្ចាស់វិញក៏រួសរាយរាក់ទាក់ ។
បើតាមការរៀបរាប់ពីស្ត្រីម្នាក់ ឈ្មោះ ទិត្យ ផល្លា អាយុ៥១ឆ្នាំ មានប្តីឈ្មោះ មួន យ៉ត អាយុ៥១ឆ្នាំ ដូចគ្នារស់នៅភូមិបរហ៊ុយត្បូង សង្កាត់បរយ៉ាខា ក្រុងប៉ៃលិន បានរៀបរាប់ទាំងទឹកមុខសប្បាយរីករាយញញឹមបញ្ចេញជើងធ្មេញសស្ញាចប្រាប់ភ្នាក់ងារយើងឱ្យដឹងថា រមណីយដ្ឋានចម្ការខ្នុររបស់ពួកគាត់ពេលចូលឆ្នាំចិន២០២០នេះ មានភ្ញៀវទេសចរច្រើនជាងឆ្នាំមុនៗ ដោយពួកគេបានធ្វើដំណើរមកពីក្នុងខេត្តប៉ៃលិន បាត់ដំបង បន្ទាយមានជ័យ សៀមរាប រហូតដល់រាជធានីភ្នំពេញ ។
គាត់បន្តទៀតថា ម្ហូបអាហារនៅក្នុងរមណីយដ្ឋាននេះមានតម្លៃដូចទៅនឹងកន្លែងផ្សេងទៀតដែរ គឺត្រីរ៉ស់១ក្បាលត្រឹមតែ១០០០០រៀល មាន់១ក្បាលតម្លៃ៥០០០០រៀល និងមានមុខម្ហូបផ្សេងៗទៀតជាច្រើន ដូចជា សម្លរម្ជួរគ្រឿងសាច់គោ កង្កែបភ្នំបំពង ឆាក្រវ៉ាញសាច់ជ្រូក ស្ងោរជ្រក់មាន់ ទា ជាដើម ។ គាត់បន្តទៀតថា ចំណែកតម្លៃចូលទៅទស្សនារថយន្ត១គ្រឿង ត្រូវបង់ប្រាក់ចំនួន១០០០០រៀល ដោយមានសន្តិសុខឈរយាមកាមគ្រប់ទីកន្លែងក៏មានខ្យុសចំនួន១៥០ខ្នង សង់នៅក្បែរមាត់អូរផងដែរ ដោយខ្យុស១ខ្នងភ្ញៀវអាចជួលអង្គុយលេងតម្លៃ១៥០០០រៀល ។
គាត់បន្ថែមទៀតថា ការលក់ដូរម្ហូបអាហារ នាឱកាសបុណ្យចូលឆ្នាំចិននេះ គឺដាច់ជាងឆ្នាំមុនៗខ្លាំងណាស់ដោយ១ថ្ងៃៗអាចលក់ត្រី និងមាន់ ទា ដាច់រាប់រយក្បាល ព្រោះភ្ញៀវចូលមកកុម្ម៉ង់ស្ទើរតែអាំងលក់មិនទាន់នោះឡើយ ហើយពួកគាត់ក៏មិនខ្លាចនឹងភាពនឿយហត់នេះដែរ ព្រោះជាឱកាសប្រមូលលុយកាក់បានមកដល់ ។ គាត់ពិតជាសប្បាយរីករាយយ៉ាងខ្លាំង ខណៈឃើញភ្ញៀវទេសចរមកពីតាមបណ្តាខេត្តទាំងអស់ចូលទៅលេងកន្លែងរមណីយដ្ឋានរបស់ខ្លួន ៕ កែសម្រួលដោយ ៖ សុឃាក់
ចែករំលែកព័តមាននេះ