រាជធានីភ្នំពេញ ៖ នៅថ្ងៃសៅរ៍ទី២៥ មករា នេះ គណៈកម្មការរៀបចំការប្រកួតប្រចាំ សង្វៀនទូរទស្សន៍ស៊ីអិនស៊ីបានផ្គូផ្គងកីឡាករជើងខ្លាំងកម្ពុជា៣រូបឱ្យជួបប្រកួតជាមួយកីឡាករបរទេសក្នុងកម្មវិធីអ្នកតស៊ូគុនខ្មែរគោជល់។ កីឡាករជើងចាស់ នី សុភី…
រាជធានីភ្នំពេញ ៖ នៅថ្ងៃសៅរ៍ទី២៥ មករា នេះ គណៈកម្មការរៀបចំការប្រកួតប្រចាំ សង្វៀនទូរទស្សន៍ស៊ីអិនស៊ីបានផ្គូផ្គងកីឡាករជើងខ្លាំងកម្ពុជា៣រូបឱ្យជួបប្រកួតជាមួយកីឡាករបរទេសក្នុងកម្មវិធីអ្នកតស៊ូគុនខ្មែរគោជល់។
កីឡាករជើងចាស់ នី សុភី មកពីក្លិបសាលវ័ន្តកីឡា ត្រូវជួបប្រកួតជាមួយកីឡាករថៃ ភូសាង យ៉ៃ ក្នុងប្រភេទទម្ងន់៦៧គីឡូក្រាម។ នី សុភី មកទល់ពេលនេះមានវ័យរាងជ្រេបន្តិចទៅហើយ តែល្បិចប្រយុទ្ធនៅលើសង្វៀនរបស់គេនៅល្អដដែលជាពិសេសស្នៀតកែងនិងជង្គង់នៅតែសាហាវគ្មានគូប្រៀប ។ ប៉ុន្តែនី សុភី អន់កម្លាំងបន្តិចនិងល្អបានតែវាយជាប្រយោលប៉ុណ្ណោះ ។ លើកនេះគេត្រូវប៉ះជាមួយជើងខ្លាំងមកពីថៃដែលមិនធ្លាប់ជួបគ្នាពីមុនមកទើបគេពិបាកប៉ាន់ស្មានពីលទ្ធផលចុងក្រោយ។
មួយគូទៀតកីឡាករកំពូលល្បិច ប៉ោ ភារិទ្ធមកពីសមាគមកីឡាប្រដាល់ក្រសួងកសិកម្ម ត្រូវប្រកួតជាមួយកីឡាករថៃ កងណាផា ក្នុងប្រភេទទម្ងន់៦៣,៥គីឡូក្រាម ។ ប៉ោ ភារិទ្ធគឺជាអ្នកប្រដាល់ជើងខ្លាំងវ័យក្មេងមួយរូបដែលមានល្បិចប្រយុទ្ធនៅលើសង្វៀនមិនធម្មតា ។
ស្នៀតកែងនិងជង្គង់របស់គេក៏សាហាវណាស់ដែរតែងតែធ្វើឱ្យគូប្រកួតញាក់សាច់គ្រប់គ្នាឯ ចិត្តរបស់គេក៏សឿងខ្លាំងណាស់ ។ ប៉ុន្តែគេមិនអាចដឹងមុនថា ការមកប៉ះចំកំពូលអ្នកប្រដាល់ជើងខ្លាំថៃដែលមិនធ្លាប់ប៉ះគ្នាពីមុនមកម្នាក់នេះ អាចតតាំងជាមួយគ្នាបានប៉ុន្មានទឹកនោះទេ។កីឡាករថៃ កងណាផា ធ្លាប់មកប្រកួតនៅស្រុកខ្មែរជាច្រើនលើករួចមកហើយ ថ្វីដៃប្រកួតរបស់គេពិតជាមិនអន់ឡើយ ។ ទោះ បីយ៉ាងណា អ្នកគាំទ្រកីឡាករកម្ពុជាមានការជឿជាក់លើ ប៉ោ ភារិទ្ធ ថាពិតជាឈ្នះច្រើនជាងចាញ់។
មួយគូទៀត កីឡាករ ឡុង ជិន មកពីក្លិបខ្លារខិនមានរិទ្ធ ត្រូវជួបប្រកួតជាមួយកីឡាករឥណ្ឌា មុយឃឺជី អានុប ក្នុងប្រភេទទម្ងន់៦០គីឡូក្រាម ។ នេះជាលើកទី១ហើយដែលកីឡាករឥណ្ឌាឈានជើងមកប្រកួតនៅស្រុកខ្មែរ ។ ចំពោះថ្វីដៃប្រកួតរបស់គេខ្លាំងប៉ុនណានោះនៅមិនទាន់ដឹងនោះទេ ចាំមើលការប្រកួតជាក់ស្ដែងទាំងអស់គ្នា ។ រីឯគូប្រកួតមិត្តភាពធម្មតាវិញ កីឡាករ ឡុង សុវណ្ណ មកពីក្លិបសាលវ័ន្តកីឡា ប្រកួតជាមួយកីឡាករ រំចង់ ថងណយ មកពីក្លិបបុរីរាជសីហ៍៕ (កែសម្រួលដោយ ៖ បុប្ផា)
ចែករំលែកព័តមាននេះ