ខេត្តបន្ទាយមានជ័យ ៖ មន្ត្រីការិយាល័យផលិតកម្ម និងបសុព្យាបាលនៃមន្ទីរកសិកម្មរុក្ខាប្រមាញ់ និងនេសាទខេត្តបន្ទាយមានជ័យបានបន្តបង្ក្រាបបាននូវមាន់រស់ដែលឈ្មួញលួចនាំចូលពីប្រទេសថៃមកប្រទេសកម្ពុជាតាមច្រករបៀងនៃព្រំដែនកម្ពុជា- ថៃ ក្នុងភូមិសាស្ត្រស្រុកស្វាយចេក ខេត្តបន្ទាយមានជ័យ ។
លោក ហ៊ុយ ទូច ប្រធានការិយាល័យផលិតកម្ម និងបសុព្យាបាលនៃមន្ទីរកសិកម្មរុក្ខាប្រមាញ់ និងនេសាទខេត្តបន្ទាយមានជ័យបានឲ្យដឹងនៅថ្ងៃទី២៣ ខែមករា ឆ្នាំ២០២០ថា ៖ នៅវេលាម៉ោង១០និង១០នាទីយប់ ថ្ងៃទី២២ ខែមករានេះ ក្រុមអន្តរាគមន៍នៃមន្ត្រីការិយាល័យផលិតកម្ម និងបសុព្យាបាលនៃមន្ទីរកសិកម្ម រុក្ខាប្រមាញ់ និងនេសាទខេត្តបានធ្វើការស្ទាក់ឃាត់ចាប់បានរថយន្តដឹកមាន់រស់១គ្រឿង ១បាំងកន្លះ ពាក់ស្លាកលេខបាត់ដំបង ២A.៤៨៩៣ ពណ៌ទឹកប្រាក់ ដែលផ្ទុកមាន់រស់ចំនួន៩១២ក្បាល ស្មើនឹង១១៤ត្រការ (ទ្រុង) ។
មាន់រស់ទាំងអស់ត្រូវបានម្ចាស់ និងអ្នកដឹកប្រាប់ថា បានលួចនាំចូលពីប្រទេសថៃមកប្រទេសកម្ពុជាតាមច្រករបៀងចម្ការគ ភូមិចម្ការគ ឃុំស្វាយចេក ស្រុកស្វាយចេក ខេត្តបន្ទាយមានជ័យ (ដែលឈរជើងដោយយោធាកងការពារព្រំដែនលេខ៥០៣) ។ ហើយកម្លាំងជំនាញបានដេញស្ទាក់ឃាត់រថយន្តនោះបាននៅលើផ្លូវជាតិលេខ៥៨ ចំនុចមុខវត្តព្រៃចាន់ ភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ។
ម្ចាស់រថយន្តជាអ្នកបើកបរ និងជាម្ចាស់ទំនិញមាន់រស់នោះមានឈ្មោះ ឆោម នាវ ភេទប្រុស រស់នៅភូមិទួលពង្រ ឃុំទួលពង្រ ស្រុកម៉ាឡៃ ។ ហើយគោលដៅនៃការដឹកជញ្ជូនសត្វមាន់រស់នេះ គឺយកទៅបោះដុំអោយម៉ូយនៅខេត្តសៀមរាបក្នុងរដូវបុណ្យចូលឆ្នាំចិននេះ ។ បន្ទាប់មកសមត្ថកិច្ចជំនាញបាននាំយកវត្ថុតាងខាងលើមកបង្ខាំងទុកនៅកន្លែងចត្តាឡីស័កការិយាល័យនៃមន្ទីរកសិកម្មខេត្ត ដើម្បីយកសំណាកវិភាគផ្ញើទៅអគ្គនាយកដ្ឋានសុខភាពសត្វ និងផលិតកម្មសត្វ ដើម្បីរង់ចាំអនុវត្តនីតិវិធី និងផាកពិន័យ ។
គួរបញ្ជាក’ថា ៖ ការទប់ស្កាត់បង្ក្រាបនេះជាការទទួលខុសត្រូវក្នុងតួនាទីភារកិច្ចមន្ត្រីជំនាញពេទ្យសត្វ និងជាពិសេសក៏ជាការអនុវត្តតាមការណែនាំរបស់ឯកឧត្តមរដ្ឋមន្ត្រីក្រសួងកសិកម្ម រុក្ខប្រមាញ់ និងនេសាទ ឯកឧត្តមអគ្គនាយក អគ្គនាយកដ្ឋានផលិតកម្មនិងបសុព្យបាល ហើយវិធានការនេះត្រូវបានបង្កើនឡើងក្នុងឱកាសរដូវបុណ្យចូលឆ្នាំចិន វៀតណាម កូរេ នេះ ។
សូមរំលឹកថា កាលពីយប់ថ្ងៃទី១៩ ខែមករាកន្លងមក ក្រុមអន្តរាគមន៍ពេទ្យសត្វខាងលើ និងនគរបាលប៉ុស្តិ៍រដ្ឋបាលឃុំអូរបីជាន់បានស្ទាក់បង្ក្រាបបានរថយន្តចំនួន០២គ្រឿង ផ្ទុកជ្រូករស់សរុប៤២ក្បាល នៅឃុំអូរបីជាន់ បន្ទាប់ពីវាត្រូវលួចនាំចូលតាមច្រករបៀងណងចាន់ភូមិជោគជ័យឃុំអូរបីជាន់ ។
បទល្មើសរត់ពន្ធ រួមទាំងបទល្មើសលើអនុវិស័យផលិតកម្ម និងបសុព្យាបាលមានមាន់ ទា ជ្រូក និងផលិតផលដើមកំណើតពីបក្សី ពីជ្រូកនៅតែបន្តកើតមានតាមច្រករបៀងមួយចំនួនក្នុងចំណោមច្រករបៀងជាង៦០កន្លែងលើបណ្តោយខ្សែបន្ទាត់ព្រំដែនកម្ពុជា-ថៃ ក្នុងភូមិសាស្ត្រខេត្តបន្ទាយមានជ័យ ៕
ចែករំលែកព័តមាននេះ