អ្នកមានភាគច្រើនមាននិយមន័យថា ជាមនុស្សដែលមានទ្រព្យសម្បត្តិច្រើនលើសតម្រូវការ តែចុះពាក្យថា អ្នកមានក្លែងក្លាយវិញ ? ប្រសិនបើអ្នកមិនដែលរៀនសូត្រពីសេដ្ឋកិច្ច ឬមានបទពិសោធន៍គ្រប់គ្រងលុយអ្នកអាចគិតថា អ្នកមានជាមនុស្សដែលពាក់អាវធំជិះរថយន្តទំនើបៗ ឬរស់នៅក្នុងផ្ទះប្រណិតៗជាដើម ហើយវាស្របទៅនឹងអ្វីដែលសង្គមគិតថា ជារូបរាងរបស់អ្នកមានទ្រព្យសម្បត្តិដែរ ។
ប៉ុន្តែគ្រាន់តែមានរូបរាងសំបកក្រៅទាំងនេះមិនគ្រប់គ្រាន់ក្នុងការឲ្យយើងដឹងថា មនុស្សម្នាក់ពិតជាមានទ្រព្យសម្បត្តិស្តុកស្តម្ភទេ ។ ដូច្នេះប្រសិនបើអ្នកមិនចង់ចាញ់បោកអ្នកទាំងនេះ អ្នកគួរតែវិភាគមើលមុខសញ្ញាខាងក្រោមនេះ៖
១. មានប្រាក់សន្សំតិច ៖
មនុស្សទាំងនេះភាគច្រើនរវល់តែចាយវាយអស់ពីហោប៉ៅ និងមិនព្រួយបារម្ភច្រើនពីថ្ងៃអនាគតទេ ។ ដោយហេតុដូចនេះ ពួកគេមិនមានប្រាក់សន្សំសម្រាប់ថ្ងៃអនាគតទាល់តែសោះ ឬច្រើនឡើយ ។
២. ត្រូវការការទទួលស្គាល់ពីអ្នកដទៃ៖
អ្នកមានក្លែងក្លាយត្រូវការឲ្យអ្នកដទៃបញ្ចេញយោបល់ ឬខ្វល់ខ្វាយពីសម្ភារៈដែលពួកគែមានដូចជាផ្ទះសម្បែង រថយន្ត ឬការងាររបស់ពួកគេជាដើម ។ ជាលទ្ធផលពួកគេតែងតែនិយាយអួតអាងពីអ្វីដែលខ្លួនមាន ដើម្បីឲ្យអ្នកដទៃទទួលស្គាល់ថាពួកគេជាអ្នកមាន ។
៣. ចូលចិត្តធ្វើអ្វីឲ្យលើសអ្នកដទៃ៖
មនុស្សទាំងនេះចូលចិត្តបង្ហាញថា ពួកគេកំពុងរស់នៅល្អជាងអ្នកដទៃដែលនៅជុំវិញខ្លួនដូចជា មានការងារល្អជាងអ្នកដទៃ បើករថយន្តល្អជាងអ្នកដទៃ ឬមានផ្ទះធំជាងអ្នកដទៃជាដើម ។ ប៉ុន្តែពួកគេមិននិយាយប្រាប់អ្នកចំៗទេ ផ្ទុយមកវិញពួកគេចូលចិត្តនិយាយបង្ហើបៗដើម្បីធ្វើឲ្យអ្នកស្តាប់សួរបន្ថែម ។
៤. ស្លៀកពាក់ប្រេនៗ៖
ជាក់ស្តែង មិនមែនគ្រប់គ្នាដែលប្រើរបស់ ឬស្លៀកសម្លៀកបំពាក់ប្រេនៗមានន័យថាពួកគេជាអ្នកមានក្លែងក្លាយទេ ប៉ុន្តែរាល់ពេលដែលអ្នកឃើញរូបភាពនេះ អ្នកមិនគួរសន្មត់ថាមនុស្សម្នាក់នោះជាអ្នកមានទាំងស្រុងឡើយ ។ ព្រោះវិធីមួយដែលអ្នកមានក្លែងក្លាយអាចបង្ហាញអ្នកដទៃថា ពួកគេមានលុយ គឺតាមរយៈសម្លៀកបំពាក់លើខ្លួន បើទោះជាខ្លួនរាល់ថ្ងៃជួលផ្ទះអ្នកដទៃក៏ដោយ ៕ កែសម្រួលដោយ ៖ សុឃាក់
ចែករំលែកព័តមាននេះ