រាជធានីភ្នំពេញ ៖ ក្នុងន័យលើកស្ទួយដល់វិស័យដឹកជញ្ជួនតាមផ្លូវដែកនៅកម្ពុជា ស្របពេលក្រសួងសាធារណការ និងដឹកជញ្ជូនសន្យាជំរុញសកម្មភាពដឹកជញ្ជូនទំនិញតាមផ្លូវដែកឱ្យកាន់តែរស់រវើក ដើម្បីកាត់បន្ថយខូតខាតផ្លូវជាតិ និងកាន់បន្ថយការគ្រោះថ្នាក់ចរាចរណ៍នោះ ពេលនេះមានក្រុមហ៊ុនបានទិញរថភ្លើងចំនួន ១០គ្រឿងបន្ថែមដែលមានលក្ខណៈកាន់តែទំនើប និងអស្ចារ្យជាងមុន ។
លោក តូច ចាន់កុសល់ រដ្ឋលេខាធិការក្រសួងសាធារណការ និងដឹកជញ្ជូនបានថ្លែងថា បន្ថែមពីនេះទៀត ក្រុមហ៊ុនឯកជនបានទិញរថភ្លើងចំនួន១០គ្រឿងបន្ថែម ដើម្បីលើកស្ទួយការដឹកជញ្ជូនតាមផ្លូវដែកប្រកបដោយប្រសិទ្ធភាព ដែលដឹកទំនិញបានច្រើន ខណៈផ្លូវដែកបានកំពុងតភ្ជាប់ដាក់ឱ្យដំណើរការដល់បច្ចុប្បន្ននេះ ។
លោកបានបញ្ជាក់ថ្លែងក្នុងកិច្ចប្រជុំបូកសរុបលទ្ធផលការងារសុវត្ថិភាពចរាចរណ៍ផ្លូវគោកប្រចាំឆ្នាំ២០១៩ និងទិសដៅការងារឆ្នាំ២០២០ កាលពីថ្ងៃទី២១ ខែមករានេះ ការដឹកជញ្ជូនតាមរថភ្លើងនេះ គឺបើកទាំងយប់ទាំងថ្ងៃ ដើម្បីបង្កលក្ខណៈងាយស្រួលក្នុងការដឹកជញ្ជូនទំនិញមានភាពឆាប់រហ័សឆ្លើយតបទៅនឹងតម្រូវការរបស់អាជីវករ ហើយសកម្មភាពនេះនឹងធានាឱ្យការដឹកជញ្ជូនទំនិញតាមផ្លូវជាតិមានការធ្លាក់ចុះផងដែរ ។
លោកបានថ្លែងថា «ធ្វើយ៉ាងណាឱ្យស្ថានភាពតាមផ្លូវជាតិមានភាពធូរថយ ព្រោះគោលបំណងរបស់រថភ្លើងធំ ទី១-កាត់បន្ថយការដឹកជញ្ជូនធ្ងន់លើផ្លូវជាតិ ដើម្បីកុំឱ្យខូចផ្លូវ ទី២ -កាត់បន្ថយការគ្រោះថ្នាក់ចរាចរណ៍កើតមានឡើង ការធ្វើចរាចរណ៍តាមរថភ្លើងមានសុវត្ថិភាពជាងផ្លូវឡាន ទី៣-កាត់បន្ថយការបំពុលបរិស្ថាន ព្រោះរថភ្លើងអូសក្បាលបីបានរហូតទំនិញ៣០ទូ ៤០ទូ ចឹងវាស្មើនឹង៣០ឡាន ៤០ឡាន ចឹងការបំពុលបរិស្ថាន និងការគ្រោះថ្នាក់ចរាចរណ៍ត្រូវបានកាត់បន្ថយ» ៕
ចែករំលែកព័តមាននេះ