ខេត្តបន្ទាយមានជ័យ ៖ បើតាមសេចក្តីរាយការណ៍បានឱ្យដឹងថា ដោយសារតែស្ពានឈើចាស់ ហើយមានសភាពទ្រុឌទ្រោមប្រឈមនឹងបាក់ ប្រជាពលរដ្ឋក៏បានរ៉ៃលុយគ្នាកសាងស្ពានថ្មឆ្លងស្ទឹង តែនៅខ្វះលុយសុំឱ្យសប្បុរសជនជួយ ខណៈដែលកំពុងកសាងស្ពាននេះស្ថិតភូមិបឹងត្រាវ ឃុំបត់ត្រង់ ស្រុកមង្គលបូរី។
បើតាមលោក រ័ត្ន ដាស៊ីណង អភិបាលស្រុកមង្គលបូរី បានប្រាប់ថា ស្ពានថ្មដែលកំពុងកសាងឆ្លងស្ទឹង ស្ថិតឃុំបត់ត្រង់ នេះ មានប្រវែងបណ្តោយ៣៦ម៉ែត្រ និងទទឹង៥ម៉ែត្រ ដែលត្រូវបានកសាងឡើងកាលពីចុងខែធ្នូ ឆ្នាំ២០១៩ រហូតមកដល់ថ្ងៃទី២៣ ខែមករា ឆ្នាំ២០២០នេះ ការកសាងបានប្រមាណជា៣០ទៅ៤០ភាគរយហើយ។
លោកបានបញ្ជាក់ថា ស្ពានថ្មដែលត្រូវបានកសាងឡើងនេះ គឺជាថវិការបស់ប្រជាពលរដ្ឋរ៉ៃអង្គាសគ្នា និងសប្បុរសជនក្នុងស្រុក បានចូលរួមកសាង ដែលគម្រោងថវិកាប្រមាណជិត៤ម៉ឺនដុល្លារ។ ហើយការកសាងស្ពានថ្មនេះ ទោះជាមានសប្បុរសជនជួយក៏ដោយ ក៏នៅតែខ្វះខាតថវិកាដែរ ដូច្នេះមានតែអំពាវនាវសុំឱ្យថ្នាក់ដឹកនាំ និងសប្បុរសជនទាំងក្នុង និងក្រៅប្រទេស ជួយផង ដើម្បីកសាងស្ពានថ្មនេះឱ្យយរួចរាល់សម្រាប់ប្រជាពលរដ្ឋនៅដងស្ទឹងត្រើយខាងលិច បានឆ្លងកាត់ និងដឹកកសិផល។
លោក រ័ត្ន ដាស៊ីណង់ បានបញ្ជាក់ថា មូលហេតុដែលប្រជាពលរដ្ឋសម្រេចចិត្តកសាងស្ពានថ្មីឆ្លងកាត់ស្ទឹងនេះ គឺដោយសារតែស្ពានឈើចាស់មានភាពទ្រុឌទ្រោមខ្លាំង ដាច់ជើងក្រោមអស់ ដែលជាការព្រួយបារម្ភ ។ ហើយស្ពានឈើចាស់នេះមានអាយុកាលជាង២៩ឆ្នាំមកហើយ ទើបប្រជាពលរដ្ឋសម្រេចចិត្តរ៉ៃលុយគ្នាកសាងស្ពានថ្មថ្មី។ ហើយការកសាងស្ពានថ្មថ្មីនេះ គឺគម្រោងកសាងអស់ថវិកា៣៨.០០០ដុល្លាសហរដ្ឋអាមេរិក ហើយនៅកំពុងខ្វះខាតលុយ ដូច្នេះមានតែសុំអំពាវដល់សប្បុរសជនក្នុង និងក្រៅប្រទេស សុំឱ្យជួយផង ដើម្បីឱ្យស្ពានថ្មនេះ បានរួចរាល់ឆាប់ បានប្រជាបលរដ្ឋឆ្លងកាត់៕ (កែសម្រួលដោយ ៖ បុប្ផា)
ចែករំលែកព័តមាននេះ