ខេត្តតាកែវ ៖ បើតាមសេចក្តីរាយការណ៍បឋមបានឱ្យដឹងថា ជនសង្ស័យម្នាក់ត្រូវប៉ូលិសស្រុកទ្រាំង ឃាត់ខ្លួន រួចកសាងសំណុំរឿងបញ្ជូនមកការិយាល័យកំរិតស្រាលខេត្ត ដើម្បីចាត់ការបន្ត ខណៈពេលដែលជនសង្ស័យរូបនេះបានយកកាំបិតកាប់ទៅលើបុរស២នាក់ បណ្តាលឱ្យរងរបួស ដោយសារតែខឹងរឿងសើចចំអកឱ្យ ហេតុការណ៍នេះកើតឡើងកាលពីម៉ោង៤និង៣០នាទីល្ងាច ថ្ងៃទី២០ ខែមករា ឆ្នាំ២០២០ ស្ថិតនៅចំណុចភូមិពោធិ៍ ឃុំសំបួរ ស្រុកទ្រាំង ខេត្តតាកែវ ។
បើតាមនគរបាលស្រុកទ្រាំង បានឱ្យដឹងថា ជនសង្ស័យមានឈ្មោះ គន ជឿន ភេទប្រុស អាយុ៣៤ឆ្នាំ រស់នៅភូមិ-ឃុំកើតហេតុ ហើយបានធ្វើសកម្មភាពដោយយកកាំបិតកាប់ទៅលើជនរងគ្រោះទាំង២នាក់ ទី១-ឈ្មោះ បុ៑ន សល់ ភេទប្រុស អាយុ៣០ឆ្នាំ បណ្តាលឱ្យរងរបួសត្រង់កំភួនដៃឆ្វេង និងជនរងគ្រោះទី២-ឈ្មោះ សាន ដា គឺរងរបួសត្រង់ក្រោយកញ្ចឹង.កផ្នែកខាងឆ្វេង ខណៈពេលជនរងគ្រោះកំពុងផឹកស្រាក្រោមផ្ទះ ។
ប្រភពដដែលបន្តថា ក្រោយពេលឃាត់ខ្លួន ជនសង្ស័យបាននិយាយសារភាពថា មូលហេតុដែលឈានដល់ការប្រើអំពើហិង្សា គឺដោយសាររូបគេខឹងជនរងគ្រោះសើចចំអក ខណៈពេលដែលរូបគេជិះម៉ូតូដួលនៅមុខផ្ទះកើតហេតុ ។
លោកវរសេនីឯក យ៉ុង ញ៉ីវ នាយការិយាល័យព្រហ្មទណ្ឌកំរិតស្រាលខេត្ត បានឱ្យដឹងថា នៅពេលនេះជនសង្ស័យត្រូវកម្លាំងជំនាញកសាងសំណុំរឿងបញ្ជូនទៅសាលាដំបូងខេត្ត ដើម្បីចាត់ការតាមច្បាប់។ (កែសម្រួលដោយ ៖ បុប្ផា)
ចែករំលែកព័តមាននេះ