រាជធានីភ្នំពេញ ៖ សេចក្តីរាយការណ៍ឲ្យដឹងថា ប្រមាណជាង២សប្តាស៍កន្លងមកនេះ មណ្ឌលអប់រំកែប្រែ(ម១) ហៅពន្ធនាគារព្រៃស ដែលជាកន្លែងឃុំខ្លួនអ្នកទោសធំជាងគេនៅក្នុងប្រទេសកម្ពុជានោះ បានផ្អាកការទទួលជនសង្ស័យ ដែលតម្រូវយកទៅឃុំខ្លួនជាបណ្តោះអាសន្នហើយ បណ្តាលមកពីពន្ធនាគារ ព្រៃស«ម១»មានផ្ទុកទណ្ឌិត និងជនជាប់ពិរុទ្ធដល់ទៅប្រមាណ១០.០០០នាក់ណែនប៉ែសទៅហើយ ។ នេះបើតាមការឱ្យដឹងពីមន្ត្រីបម្រើការនៅពន្ធនាគារម១ ។ ទណ្ឌិត និងពិរុទ្ធជនប្រមាណ១ម៉ឺននាក់នេះភាគច្រើនជាអ្នកមានទោស និងមិនទាន់មានទោសពាក់ព័ន្ធគ្រឿងញៀន ហើយមនុស្សដែលប្រើប្រាស់គ្រឿងញៀនមន្ត្រីថ្ងូរថាពិតជាពិបាកគ្រប់គ្រងបំផុត ។
សេចក្តីរាយការណ៍បន្តថា ការផ្អាកមិនទទួលយកជនសង្ស័យទៅឃុំខ្លួននៅពន្ធនាគារព្រៃសនោះ មិនមានការប្រកាសជាផ្លូវការណាមួយពីសំណាក់អ្នកគ្រប់គ្រងពន្ធនាគារទេ ។ នេះគ្រាន់តែជាការបង្ហើបឲ្យដឹងពីមន្ត្រីនគរបាលអនុវត្តច្បាប់មកពីគ្រប់បណ្តាអង្គភាព ស្នងការដ្ឋាននគរបាលរាជធានីភ្នំពេញ ក្រសួងមហាផ្ទៃ កងរាជអាវុធហត្ថ និងខណ្ឌនានា ដែលចាប់ខ្លួនជនសង្ស័យបញ្ជូនទៅតុលាការ ហើយតុលាការសម្រេចឲ្យឃុំខ្លួនដាក់ពន្ធនាគារជាបណ្តោះអាសន្ននោះ ។
មន្ត្រីពន្ធនាគារបានឲ្យដឹងថា បច្ចុប្បន្នជនសង្ស័យត្រូវជាប់ឃុំក្នុងមួយថ្ងៃមិនក្រោម៤០នាក់ទេ ភាគច្រើនពាក់ព័ន្ធគ្រឿងញៀន លួច ឆក់ប្លន់ អំពើហិង្សា រំលោភទំនុកចិត្ត។ល។ ដូច្នេះចំនួននេះបានធ្វើឲ្យពន្ធនាគារព្រៃសហៅថាមណ្ឌលអប់រំកែប្រែម១ ពេញលើសចំណុចគ្មានកន្លែងដាក់ ជាហេតុមិនអាចទទួលយកបានទៀតឡើយ ។ ទោះបីជាបែបនេះក្តី ក្រោយពេលពន្ធនាគារព្រៃស បានសម្រេចចិត្តផ្អាកការទទួលឃុំខ្លួនជនសង្ស័យនោះ មានចម្ងល់ថា ចុះបើសមត្ថកិច្ចចាប់ខ្លួនជនសង្ស័យមួយថ្ងៃៗច្រើន យ៉ាងនេះ តើឲ្យយកពួកគេទៅទុកឯណា ?
ចម្លើយបានតបមកវិញពីមន្ត្រីនគរបាលអនុវត្តច្បាប់ដដែលថា មិនទាន់ទាល់ច្រកទេ ពន្ធនាគារម១ មិនទទួលគឺនៅមានពន្ធនាគារប៉េហ្ស៊ី របស់ស្នងការដ្ឋាននគរបាលរាជធានីភ្នំពេញទទួលយកដែរ ព្រោះពន្ធនាគារប៉េហ្ស៊ីទើបនឹងផ្ទេរចេញពីកណ្តាលក្រុង ទៅបោះទីតាំងជាប់គ្នាជាមួយមណ្ឌលអប់រំកែប្រែម១នោះដែរ។ ប្រភពដដែលថា ពន្ធនាគារប៉េហ្ស៊ីទើបតែមានទណ្ឌិត និងជនសង្ស័យច្រើនរយនាក់ មិនទាន់ដល់ពាន់នាក់នៅឡើយទេ ដូច្នោះចៀសវាងការចង្អៀតណែន ពិបាកក្នុងការគ្រប់គ្រង តុលាការសម្រេចជាង២សប្តាហ៍ចុងក្រោយនេះ តម្រូវឱ្យឃុំខ្លួនជនសង្ស័យនៅពន្ធនាគារប៉េហ្ស៊ីវិញ ។
បានសង្កេតឃើញនៅសាលាដំបូងរាជធានីភ្នំពេញវិញ ចុងឆ្នាំ២០១៩ រហូតមកដល់ពេលនេះ មួយថ្ងៃៗគ្រប់បណ្តាអង្គភាព នគរបាលជាតិ និងកងរាជអាវុធហត្ថ ដែលមានភារកិច្ច និងតួនាទីបង្ក្រាបបទល្មើស បានចាប់បញ្ជូនជនសង្ស័យប្រុសស្រីពាក់ព័ន្ធគ្រឿងញៀន លួច ឆក់ ប្លន់ រំលោភទំនុកចិត្ត មិនក្រោមពី៤០នាក់នោះទេ ដែលត្រូវឃុំខ្លួនហើយនោះ គឺជាកត្តាធ្វើឲ្យគុកព្រៃសមិនអាចផ្ទុកអ្នកទោសបានទៀតនោះទេ ដែលមន្ត្រីនិយាយពាក្យសាមញ្ញថា ណែនដូចកន្តំទៅហើយ…ស្រួលមិនស្រួលដូរវេនគ្នាដេក ។
ខេត្តតាកែវផ្លាស់ប្តូរអ្នកទោសទៅដាក់នៅពន្ធនាគារថ្មី
ខេត្តតាកែវ ៖ អ្នកទោសជាទណ្ឌិតនិងជនមានពិរុទ្ធភាព ជាប់ឃុំនៅពន្ធធនាគាខេត្តចំនួន៧៦២នាក់ ក្នុងនោះស្រីចំនួន២៩នាក់ កាលពីថ្ងៃទី២០ ខែមករា ឆ្នាំ២០២០ ត្រូវបានដឹកបញ្ជូនចេញពីពន្ធធនាគារចាស់ដែលទ្រុឌទ្រោម ទៅដាក់នៅពន្ធធនាគាថ្មីដែលមានទីតាំងនៅក្នុងភូមិចុងថ្នល់ សង្កាត់បារាយណ៍ ក្រុងដូនកែវ មានចម្ងាយពីពន្ធធនាគាចាស់ប្រមាណ៣.០០០ម៉ែត្រ ។ ទន្ទឹមនឹងការដឹកបញ្ជូនអ្នកទោសនេះ គេសង្កេតឃើញមានកម្លាំងការពារដែលមាន នគរបាល កងរាជអាវុធហត្ត និងយោធាប្រចាំការនៅតាមដងផ្លូវ ការពារយ៉ាងម៉ត់ចត់ផងដែរ ។
លោកឧត្តមសេនីយ៍ទោ គង់ សុីថា ប្រធានពន្ធនាគារខេត្ត បានប្រាប់កោះសន្តិភាពតាមទូរស័ព្ទថា អ្នកទោសដែលមានជនត្រូវចោទ ពិរុទ្ធជន និងទណ្ឌិត យើងផ្លាស់ប្តូរទៅទីតាំងថ្មីដែលមានអគារចំនួន៥ខ្នងស្មើ១៧បន្ទប់សម្រាប់ដាក់អ្នកជាប់ចោទ និងទណ្ឌិត ។ ចំពោះការបែងចែកអ្នកទោសមានកម្រិតធ្ងន់ឬស្រាលមានប៉ុន្មានបន្ទប់ និងបន្ទប់សម្រាប់ធ្វើការងាររបស់លោកក៏ដូចជាមន្ត្រីពន្ធនាគានោះ លោកប្រាប់ថាមានច្រើនបន្ទប់រាប់មិនអស់ទេ ។
លោកប្រធានពន្ធនាគារថ្លែងទៀតថា ក្នុងការដឹកអ្នកទោសចេញពីពន្ធនាគារចាស់ទៅពន្ធនាគារថ្មីនេះ មានរថយន្តក្រុងចំនួន៣គ្រឿង និងមានកងកម្លាំងការពារដែលមាន នគរបាលអន្តរាគមន៍ខេត្ត អមដោយរថយន្តសុីរ៉ែននាំមុខចំនួន៦០រូប កងរាជអាវុធហត្ថ៣០រូប និងទាហាន២០រូប ៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ