រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីបានថា ការធ្វើហាត់ប្រាណជាប្រចាំនឹងធ្វើឲ្យ សម្តេចដឹកនាំប្រទេសបានយូរអង្វែង ។ សម្តេចតេជោបានសរសេរលើបណ្តាញសង្គម នៅថ្ងៃទី២០ មករានេះថា អរគុណបងប្អូនជនរួមជាតិ និងកូនក្មួយដែលជានិច្ចជាកាល តែងតែចង់បានខ្ញុំមានសុខភាពល្អរឹងប៉ឹង ។
សម្តេចបានបញ្ជាក់ថា ៖«ពិតណាស់ រាល់ថ្ងៃក្រៅពីលេងកីឡាវាយកូនគោល គឺខ្ញុំហាត់ប្រាណជាប្រចាំ ។ មានសុខភាពល្អដូចសព្វថ្ងៃ ខ្ញុំអាចបន្តដឹកនាំប្រទេសជាតិបានយូរអង្វែងទៅមុខ» ។ សម្តេចបានបន្ថែមថាទន្ទឹមនឹងនេះ ខ្ញុំក៏ចង់បានពលរដ្ឋខ្មែរមានសុខភាពល្អទាំងអស់គ្នា ។ ខ្ញុំពិតជាសប្បាយចិត្តដែលបានឃើញបងប្អូនយកឱកាសសន្តិភាពប្រកបរបររកស៊ីទទួលទានអភិវឌ្ឍន៍សង្គមគ្រួសារឲ្យរីកចម្រើនមានបានគ្រប់ៗគ្នា ។
សូមជម្រាបថា សម្តេចតេជោ ហ៊ុន សែនធ្លាប់បានអះអាងថា សម្តេចនឹងបន្តដឹកនាំប្រទេសរយៈពេល២អាណត្តិស្មើ១០ឆ្នាំបន្តទៀត ។ ជាមួយគ្នានោះដែរ សម្តេចក៏បានបញ្ជាក់ទៅកាន់ក្រុមប្រឆាំងក៏ដូចជា អ្នកវិភាគមួយចំនួនថា ការផ្ទេរតំណែងមិនអាចផ្ទេរពីឪពុកទៅកូនផ្ទាល់តែម្តងបានទេ គឺត្រូវឆ្លងកាត់កាតបោះឆ្នោតជាមុនសិន ដោយសារកម្ពុជាជាប្រទេសកាន់លទ្ធិប្រជាធិបតេយ្យ ហើយនាយករដ្ឋមន្ត្រីត្រូវឆ្លងកាត់ការបោះឆ្នោតគាំទ្រពីប្រជាពលរដ្ឋ ៕
ចែករំលែកព័តមាននេះ