ខេត្តកណ្តាល ៖ សមត្ថកិច្ចចម្រុះស្រុកកោះធំ កាលពីវេលាព្រឹកថ្ងៃទី០១ សីហា បានធ្វើការដកហូតយកវត្ថុតាងនានាជាច្រើនប្រភេទ ភាគច្រើនជារូបថត ដែលមានរូបលោកគ្រូធម្មាចារ្យ បានតាំងខ្លួនឯងជាមនុស្សអស្ចារ្យលើលោក និងជាព្រះសិអារ្យមេត្រិយជាដើម ។
វត្ថុតាងទាំងនោះ បានដកហូតពីស្ត្រីឈ្មោះ ហ៊ន ចាន់ណា ដែលជាអ្នកលក់រូបភាពទាំងនោះ មានផ្ទះនៅក្បែរវត្តទួលព្រះរាជា ស្ថិតក្នុងភូមិកំពង់គរ ឃុំពោធិ៍បាន ស្រុកកោះធំ ដែលរូបថតភាគច្រើនជាការកែច្នៃបន្ថែមតាមបច្ចេកវិទ្យាថ្មី ។
មន្ត្រីសមត្ថកិច្ចបានឱ្យដឹងថា វត្ថុតាងដែលដកហូតរួមមាន រូបថតសន្លឹកតូចធំ ចំនួន២១៨០សន្លឹក រូបថតមានស៊ុំកញ្ចក់ចំនួន៦៤ស៊ុំ ឌីសចំនួន៧៨៧បន្ទះ យ័ន្តក្រណាត់ក្រហមចំនួន១៧៥០យ័ន្ត យ័ន្តកាតរឹងចំនួន៤១០សន្លឹក និងយ័ន្តប្រាក់ដុល្លារ ក្រដាសមួយលានចំនួន១១០សន្លឹកទៀត ។ វត្ថុតាងទាំងនេះ គឺសុទ្ធតែមានការអនុញ្ញាតពីលោកគ្រូធម្មាចារ្យ ធាន វុទ្ធី ធ្វើការកែច្នៃ ដើម្បីដាក់លក់ជូនដល់ប្រជាពលរដ្ឋ និងពុទ្ធបរិស័ទ្ធដែលមានជំនឿតាមការភូតកុហកបោកប្រាស់របស់បុគ្គល ធាន វុទ្ធីនេះ ។
មន្ត្រីសមត្ថកិច្ចឱ្យដឹងទៀតថា រូបថតច្នៃប្រឌិតនិងយ័ន្តទាំងនេះ ត្រូវបានលក់ឱ្យពុទ្ធបរិស័ទ្ធ ជិតឆ្ងាយ ដែលមានជំនឿ ក្នុងមួយៗរាប់ពាន់សន្លឹក ។ វត្ថុតាងទាំងនេះ ត្រូវបានសមត្ថកិច្ចធ្វើកំណត់ហេតុ ដកហូត និងវេចខ្ចប់ ដើម្បីយកទៅរក្សាទុក និងបញ្ជូនទៅមន្ទីរធម្មការនិងសាសនា រក្សាទុក ៕
ចែករំលែកព័តមាននេះ