រាជធានីភ្នំពេញ ៖ ក្រសួងកសិកម្មរុក្ខាប្រមាញ់ និងនេសាទ បានប្រកាសកាត់បន្ថយចំនួនក្រុមហ៊ុន និងចំនួនកូតានាំចូលមាន់រស់ពីបរទេសមកកាន់កម្ពុជាពី១៣ក្រុមហ៊ុនមកនៅត្រឹមតែចំនួន៧ក្រុមហ៊ុនវិញ ដែលចំនួននាំចូលពីមុន៤៤០០០ក្បាលក្នុងមួយថ្ងៃ មកនៅត្រឹមតែ១៧០០០ ក្បាលក្នុងមួយថ្ងៃប៉ុណ្ណោះ ។
ការកាត់បន្ថយក្រុមហ៊ុននេះ បន្ទាប់ពីឃើញភាពអសកម្មរបស់ក្រុមហ៊ុននាំចូលមាន់រស់ នេះ បើតាមសេចក្ដីប្រកាសព័ត៌មានរបស់ក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី៩ ខែមករា ឆ្នាំ២០២០ ។ សេចក្តីប្រកាសបានឲ្យដឹងថា នាពេលថ្មីៗនេះអគ្គនាយកដ្ឋានសុខភាពសត្វ និងផលិតកម្មសត្វក៏ដូចជា ក្រសួងកសិកម្ម រុក្ខាប្រមាញ់ និងនេសាទ បានពិនិត្យឃើញថា មានសារព័ត៌មានមួយចំនួនបានចុះព័ត៌មានមិនមានការពិត ហើយបានចោទប្រកាន់មកលើអគ្គនាយកដ្ឋាន និងក្រសួងយ៉ាងងងើលថែមទៀត ដោយមិនបានស្វែងយល់ពីវិធានការ និងចំណាត់ការរបស់ក្រសួង កន្លងមកទាក់ទងទៅនឹងការចរាចរណ៍ និងចែកចាយសត្វនៅកម្ពុជា ។
សេចក្ដីប្រកាសបញ្ជាក់ថា ចាប់ពីដើមឆ្នាំ២០១៩ អគ្គនាយកដ្ឋានសុខភាពសត្វ និងផលិតកម្មសត្វនៃក្រសួងកសិកម្មរុក្ខាប្រមាញ់ និងនេសាទបានពិនិត្យឃើញថា កសិករ សមាគមន៍ និងក្រុមហ៊ុនចិញ្ចឹមសត្វនៅកម្ពុជាបានជួបប្រទះនឹងបញ្ហាធ្លាក់ចុះតម្លៃមាន់រស់ យ៉ាងគំហុក ។ ពោល គឺថ្លៃដើមផលិតក្នុងមួយគីឡូក្រាមត្រូវចំណាយអស់៥០០០រៀល តែចំពោះការលក់ចេញមាន់រស់មានតម្លៃត្រឹមតែ៤៨០០រៀល ក្នុងមួយគីឡូក្រាម ។ ទន្ទឹមនឹងមានគម្រោងកម្មវិធីជាច្រើន តាមរយៈទទួលបានហិរញ្ញប្បទានដៃគូ និងថវិកាជាតិជាបន្តបន្ទាប់ក្នុងការបណ្តុះបណ្តាលសហគមន៍ចិញ្ចឹមបក្សីនៅកម្ពុជា ហើយសមាជិកសហគមន៍មានក្តីសង្ឃឹមថា ទទួលបានប្រាក់ចំណូលបានគ្រប់គ្រាន់ក្នុងការដោះស្រាយជីវភាពរបស់ប្រជាពលរដ្ឋស្របតាមកំណើនសេដ្ឋកិច្ចកម្ពុជាពេលបច្ចុប្បន្ន ។
ក្រសួងបានបញ្ជាក់ថា ៖« ដោយមើលឃើញពីសភាពការណ៍ខាងលើនេះក្រសួងកសិកម្ម រុក្ខាប្រមាញ់ និងនេសាទបានកាត់បន្ថយចំនួនក្រុមហ៊ុន និងចំនួនកូតានាំចូលមាន់រស់ពីបរទេសមកកាន់ព្រះរាជាណាចក្រកម្ពុជាពី១៣ក្រុមហ៊ុន មកត្រឹមចំនួន៧ក្រុមហ៊ុនវិញ ដែលចំនួននាំចូលពីមុន៤៤០០០ក្បាលក្នុងមួយថ្ងៃ មកត្រឹម ១៧០០០ ក្បាលក្នុងមួយថ្ងៃ» ។
ក្រសួងបន្តថា លទ្ធផលដែលទទួលបានក្រោយពីការកាត់បន្ថយចំនួនក្រុមហ៊ុន និងចំនួនកូតានាំចូលបក្សីពីបរទេសមានជាអាទិ៍ ៖ តម្លៃមាន់រស់កើនឡើងបានល្អប្រសើរពី ៦៩០០ , ៧៤០០រៀលក្នុងមួយគីឡូក្រាម ,អ្នកចិញ្ចឹមបក្សីប្រជាជនក្រុមហ៊ុនចិញ្ចឹមបក្សី និងសមាគមអ្នកចិញ្ចឹមសត្វកម្ពុជាបានគាំទ្រ និងកោតសរសើរចំពោះចំណាត់ការរបស់ក្រសួងលើការកាត់បន្ថយចំនួនក្រុមហ៊ុន និងចំនួនកូតានាំចូលមាន់រស់ពីបរទេស មកកាន់កម្ពុជា ដើម្បីលើកទឹកចិត្តដល់ផលិតកម្មចិញ្ចឹមបក្សីក្នុងស្រុកគ្រប់រូបភាព ក្នុងការក្សាតុល្យភាពតម្លៃមិនប៉ះពាល់ដល់អ្នកចិញ្ចឹម និងជួយរក្សាកម្លាំងពលកម្ម និងកាត់បន្ថយការចំណាកស្រុក , បង្កើនទីផ្សារជូនអ្នកចិញ្ចឹមបក្សីក្នុងស្រុក ,គ្រប់គ្រងបានល្អប្រសើរនូវស្ថានភាពនៃការរាលដាលនៃជំងឺឆ្លងបក្សី ,ស្របតាមផែនការយុទ្ធសាស្ត្រអភិវឌ្ឍន៍វិស័យកសិកម្ម២០១៩-២០២៣ បានកំណត់អត្រាកំណើនផលិតផលសាច់កើន៣%ក្នុងមួយឆ្នាំ ៕ កែសម្រួលដោយ ៖ សុឃាក់
ចែករំលែកព័តមាននេះ