ក្រៅពីបង្រៀនណែនាំកូនៗពីសីលធម៌មូលដ្ឋានហើយ ឪពុកម្តាយដើរតួយ៉ាងសំខាន់ក្នុងការបង្ហាញផ្លូវដល់កូនៗទាក់ទិននឹងរឿងលុយផងដែរ ជាពិសេសក្នុងសម័យកាលដែលប្រព័ន្ធសង្គម និងការផ្សព្វផ្សាយពាណិជ្ជកម្មព្យាយាមជំរុញទឹកចិត្តឲ្យមនុស្សគ្រប់ស្រទាប់ក្នុងការទិញសម្ភារៈដែលមិនចាំបាច់សម្រាប់ខ្លួន ។ ដូច្នេះឪពុកម្តាយគួរធ្វើយ៉ាងណាដើម្បីជួយឲ្យកូនៗយល់ដឹងបន្ថែមពីបញ្ហាលុយ?
១. បង្រៀនកូនឲ្យចេះកំណត់គោលដៅ៖
លើកក្រោយពេលដែលកូនៗសុំឲ្យអ្នកទិញអ្វីមួយឲ្យទៅពួកគេដូចជាហ្គេម ឬកាតាបថ្មី អ្នកត្រូវតែឲ្យពួកគេរកវិធីដោយខ្លួនឯងដើម្បីសន្សំលុយសម្រាប់វា ។ អ្នកអាចណែនាំពួកគេពីវិធីងាយៗដែលពួកគេអាចធ្វើដើម្បីសន្សំបានថវិកាគ្រប់គ្រាន់ ដើម្បីសម្រេចបានគោលដៅដែលខ្លួនកំណត់ រួចបង្រៀនពួកគេឲ្យចេះពិចារណាលើការសម្រេចចិត្តផ្សេងៗថាវាជួយឲ្យពួកគេខិតកាន់តែជិតដល់គោលដៅខ្លួនទេ ។
២. បង្រៀនពួកគេឲ្យចេះរកលុយ៖
វាមិនមែនមានន័យថាឪពុកម្តាយគួរឲ្យកូនដើរចេញទៅរកស៊ី ឬធ្វើការរកលុយចិញ្ចឹមជីវិតដោយខ្លួនឯងនិងលះបង់ការសិក្សាទេ ។ ផ្ទុយមកវិញក្រៅពីការសិក្សាហើយ កូនៗគួរតែទទួលបានលុយបន្ថែមដោយប្តូរនឹងការបំពេញកិច្ចការរផ្សេងៗក្នុងផ្ទះ ដូចជាលាងចាន បោកសម្លៀកបំពាក់ ឬបោសសម្អាតផ្ទះជាដើម ។
៣. បង្រៀនឲ្យពួកគេយល់ពីតម្រូវការ និងចំណង់៖
ក្រៅពីចេះរកលុយសម្រាប់ចាយវាយហើយ ពួកគេត្រូវដឹងពីវិធីចាយវាយជាពិសេសភាពខុសគ្នារវាងតម្រូវ ការនិងចំណង់ ។ ការយល់ដឹងពីភាពខុសគ្នានេះនឹងជួយទប់ស្កាត់មិនឲ្យពួកគេខ្ជះខ្ជាយ ។ ក្រៅពីនេះហើយ អ្នកត្រូវជួយពួកគេក្នុងការស្រាវជ្រាវពីផលិតផល និងប្រៀបធៀបតម្លៃមុនពេលសម្រេចចិត្តទិញផងដែរ ។
៤. គិតការប្រាក់ពីកូនៗ៖
វាមិនលឿនពេកឡើយក្នុងការបង្រៀនកូនៗពីការប្រាក់ ហើយឪពុកម្តាយអាចបង្រៀនវាដល់ពួកគេបានដោយឲ្យពួកគេខ្ចីលុយដើម្បីទិញអ្វីមួយ និងអនុញ្ញាតឲ្យពួកគេខិតខំសន្សំលុយដើម្បីសងវិញជាមួយនឹងការប្រាក់ផងដែរ ៕ កែសម្រួលដោយ ៖ សុឃាក់
ចែករំលែកព័តមាននេះ